Mga Salmo 78

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Ang Dios kag ang Iya mga Tawo

1 Pamati kamo, mga tawo ko, sa akon mga pagtudlo, kag talupangda ang akon ginasiling.
2 Magahambal ako sa inyo, kag sugiran ko kamo sang mga tinago sang una,
3 sang mga butang nga aton nabatian kag nahibaluan, nga ginsugid sang aton mga katigulangan.
4 Indi naton ini pag-ilikom sa aton mga anak, kundi sugiran ta ang masunod nga kaliwatan nahanungod sang gahom sang GINOO kag sang iya gamhanan nga mga binuhatan kag sang makatilingala nga mga butang nga iya ginhimo.
5 Naghatag sia sing mga kasugoan sa mga tawo sang Israel, kag mga sugo sa mga kaliwat ni Jacob. Ginmanduan niya ang aton mga katigulangan sa pagtudlo sang iya mga kasugoan sa ila mga anak,
6 agod ang masunod nga kaliwatan makatuon sini, kag matudlo man nila ini sa ila mga kaanakan.
7 Sa sini nga paagi magasalig man sila sa Dios, kag indi nila pagkalimtan ang iya mga nahimo, kundi magtuman sa gihapon sang iya mga kasugoan.
8 Indi sila manginsubong sang ila mga katigulangan, mabinatuon kag di-matinumanon nga mga tawo, nga ang ila pagsalig sa Dios indi malig-on, kag wala magpadayon sa pagkamatutom sa iya.
9 Ang mga kaliwat ni Efraim nga naggamit sing mga pana sa pagpakig-away, nagpalagyo sa adlaw sang inaway.
10 Wala sila magtuman sang ila kasugtanan sa Dios; wala sila magtuman sang iya kasugoan.
11 Nalimot sila sang iya mga binuhatan, ang mga milagro nga iya ginpakita sa ila.
12 Samtang ang ila mga katigulangan nagatan-aw, ang Dios naghimo sing milagro sa uma sang Soan, sa duta sang Egipto.
13 Ginpahawa niya ang dagat kag ginpaagi sila, ginhimo niya ang tubig nga daw mga pader.
14 Kon adlaw ginatuytoyan niya sila paagi sa panganod, kag sa bug-os nga gab-i paagi sa kapawa sang kalayo.
15 Ginpalitik niya ang daku nga bato sa desierto, kag ginhatagan niya sila sing tubig gikan sa kadadalman.
16 Ginpatubod niya ang tubig gikan sa daku nga bato, kag ginpailig niya ini kaangay sang suba.
17 Pero nagpadayon sila sa pagpakasala batok sa Dios, kag didto sa desierto nagmabinatuon sila sa Labing Mataas.
18 Gintilawan nila sing hungod ang Dios, paagi sa pagpangayo sing kalan-on nga luyag nila.
19 Naghambal sila batok sa Dios, nga nagasiling, “Makahatag bala ang Dios sing pagkaon sa desierto?
20 Matuod nga iya ginhampak ang daku nga bato, kag ang tubig nagsagawak sing mabaskog, pero makahatag man bala sia sa aton sing kan-on, kag makahatag bala sia sa iya mga tawo sing sud-an?”
21 Gani, ang GINOO naakig sang iya pagkabati sa ila; iya ginpadalhan sing kalayo ang iya mga tawo, kag nagdugang ang iya kaakig sa ila,
22 tungod kay wala sila sing pagtuo sa iya, kag wala sila magtuo nga sia magaluwas sa ila.
23 Pero ginmanduan niya ang langit sa ibabaw, kag ginsugo nga mag-abri ang iya mga puwertahan;
24 ginhatagan niya sila sing kalan-on halin sa langit, paagi sa pagpadala sa ila sing mana nga ila kaunon.
25 Gani nagkaon sila sang kalan-on sang mga anghel. Ang Dios naghatag sa ila sang kalan-on nga makapagusto sila sing kaon.
26 Dayon ginpahuyop niya ang salatan, kag sa iya gahom ginbuy-an niya ang habagat,
27 kag ginpadalhan niya sila sang mga pispis nga nagadulom subong sang yab-ok, subong kadamo sang mga balas sa baybayon;
28 nagtupa ini sa tunga sang ila kampamento, sa palibot sang ila mga tolda.
29 Gani ang mga tawo nagkaon kag nagkalabusog; ang Dios naghatag sa ila sang tanan nga ila luyag.
30 Pero samtang nagakaon pa sila, bisan sa wala pa sila mabusog,
31 ang Dios naakig sa ila, kag ginpamatay niya ang labing mabakod nga mga tawo, ang mga pinakaali nga mga pamatan-on sang Israel!
32 Walay sapayan sang tanan niya nga mga milagro, ang mga tawo nagpadayon sa pagpakasala, kag indi sila magtuo.
33 Gani gintapos niya ang ila mga inadlaw subong sang isa ka huyop, ang ila kabuhi sa hinali nga kalaglagan.
34 Pero sang pamatyon niya ang iban sa ila, ang nabilin nagbalik sa iya; naghinulsol sila kag nagpangamuyo sing hugot sa iya.
35 Nadumdoman nila nga ang Dios amo ang ila mangangapin, nga ang Labing Mataas amo ang ila manlulowas.
36 Pero ang ila mga ginahambal mga kabutigan, kag ang tanan nga ila ginsiling pagdayaw-dayaw lang.
37 Indi sila mainunongon sa iya, ukon matutom sa ila kasugtanan sa iya.
38 Pero ang Dios nagmaluloy-on sa iya mga tawo. Ginpatawad niya ang ila mga sala kag wala niya sila paglaglaga. Sa madamo nga mga tion ginpaiway niya ang iya kaakig kag ginpunggan niya ang iya kasingkal.
39 Nadumdoman niya nga sila mga tawo lamang, kag subong sang hangin nga nagahuyop kag nagataliwan.
40 Masunson sila nagbato sa iya didto sa desierto, makapila nila sia ginpasubo!
41 Sa liwat kag sa liwat gintilawan nila ang Dios, kag ginapaakig ang Balaan sang Israel.
42 Nalimtan nila ang iya daku nga gahom, nalimtan nila ang tion sang pagluwas niya sa ila gikan sa ila mga kaaway,
43 kag ang paghimo niya sang gamhanan nga mga buhat kag mga milagro sa uma sang Soan, sa duta sang Egipto.
44 Ginhimo niya nga dugo ang tubig sa mga suba, agod ang mga Egiptohanon indi makainom sa ila mga kasapaan.
45 Nagpadala sia sing mga langaw nga nagpaantos sa ila, kag sang mga paka nga naghalit sang ila mga uma.
46 Nagpadala sia sing mga ulod sa pagkaon sang ila patubas, kag mga apan sa pagpapas sang ila mga uma.
47 Ginpatay niya ang ila tanom nga mga ubas paagi sa ulan nga yelo nga daw mga bato, kag ang ila higera nga kahoy ginpatay sang yelo nga daw pulbos.
48 Ginpatay niya ang ila mga baka paagi sa ulan nga yelo nga daw mga bato, kag ang ila mga panong paagi sa kilat.
49 Ginpatup-an niya sila sang iya nagabalingaso nga kaakig, kag sang iya nagahingalayo nga kasingkal, nagpadala sia sa ila sing daku nga kalisod paagi sa pagpadala sang manugpatay nga mga anghel.
50 Wala sia magpugong sang iya kaakig, ukon ginluwas ang ila kabuhi, kundi ginpatay niya sila paagi sa peste.
51 Ginpatay niya ang mga panganay nga lalaki sang tanan nga mga panimalay sa Egipto.
52 Dayon gintuytoyan niya ang iya mga tawo pa gwa subong sang manugbantay sang karnero, gintuytoyan niya sila sa desierto.
53 Gintuytoyan niya sila nga wala maano, kag wala sila mahadlok, pero ang dagat nagtabon sa ila mga kaaway.
54 Gindala niya sila sa iya balaan nga duta, sa mga bukid nga sia gid amo ang nag-agaw.
55 Gintabog niya ang mga pumoluyo samtang ang iya mga tawo nagapasulod, ginpanagtag niya ang duta sa mga tribo sang Israel, kag didto ginpapuyo niya sila sa ila mga tolda.
56 Pero nagbato sila sa Dios nga Makagagahom, kag gintilawan nila sia. Wala sila magtuman sa iya mga sugo,
57 pero nagmabinatuon sila kag nagdi-matinumanon subong sang ila mga katigulangan, nga indi masaligan subong sang baslay nga ginpana gikan sa tiko nga pana.
58 Ginpaakig nila sia tungod sa ila di-diosnon nga mga altar, kag ginpaimon nila sia tungod sang ila mga diosdios.
59 Naakig ang Dios sang iya makita ini, gani ginsikway niya sing bug-os ang iya mga tawo.
60 Ginpatumbayaan niya ang iya tolda sa Silo, ang iya ginpuy-an sa tunga sang mga tawo.
61 Gintugotan niya ang mga kaaway sa pag-agaw sang kaban sang kasugtanan, sa diin ang iya gahom kag himaya nakita.
62 Naakig sia sa iya kaugalingon nga mga tawo, kag ginpabay-an niya sila nga mapatay sa ila mga kaaway.
63 Ang mga pamatan-on ginpamatay sa inaway, kag ang mga kadalagahan nawad-an sing palamanahon.
64 Ang mga pari ginpamatay sa mga espada, kag ang ila mga balo indi makalalaw sa ila.
65 Sang ulihi ang Ginoo nagmata nga daw natulogan sia, subong sia sang isa ka makusog nga tawo nga ginpaisog sang bino.
66 Gintabog niya ang iya mga kaaway pabalik, sa dayon kag makahuloya nga pagkalutos.
67 Ginsikway niya ang mga kaliwat ni Jose, wala niya pagpilia ang tribo ni Efraim.
68 Sa baylo ginpili niya ang tribo ni Juda, kag ang Bukid sang Sion nga iya ginapakamahal.
69 Didto ginpatindog niya ang iya Templo, subong sang iya puloy-an sa langit, ginpalig-on niya ini kaangay sang duta, nga indi maano tubtob sa katapusan.
70 Ginpili nya ang iya alagad nga si David; ginkuha niya sia gikan sa pagbantay sang karnero
71 kag sa pagtatap sang iya mga kordero. Ginhimo niya sia nga hari sang Israel, nga manugbantay sang mga tawo sang Dios.
72 Si David nag-atipan sa ila sa bug-os nga katutom kag nagtuytoy sa ila nga may pagkasampaton.

Mga Salmo 77 | Mga Salmo 79