Mga Salmo 49

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Ang Kabuangan sang Pagsalig sa Manggad

1 Tanan kamo, magpamati sini! Pamati kamo, tanan nga mga tawo bisan diin,
2 mga dungganon kag kubos, mga manggaranon kag mga imol man.
3 Magahunahona ako sang mapuslanon nga mga hunahona, magahambal ako sang mga pulong sang kaalam.
4 Ituhoy ko ang akon igtalupangod sa isa ka hulobaton, kag isaysay ko ang iya kahulogan samtang nagatukar ako sang arpa.
5 Wala ako mahadlok sa tion sang katalagman, kon ginalibutan ako sang malaut nga mga kaaway,
6 sang mga tawo nga nagasalig sa ila mga manggad, nga nagapabugal sang ila madamo nga mga pagkabutang.
7 Ang tawo indi gid makatubos sang iya kaugalingon; indi sia makasarang sa pagbayad sa Dios sang bili sang iya kabuhi,
8 tungod kay tama ka mahal ang kabuhi sang isa ka tawo. Ang iya sarang mabayad indi tuman
9 sa pagpalikaw sa iya sa lulobngan, agod magkabuhi sia sing walay katapusan.
10 Makita niya nga bisan ang mga maalam nagakamatay, subong man ang mga buangboang kag mga balingag. Ginabilin nila ang ila mga manggad sa ila mga kaliwat.
11 Ang ila mga lulobngan amo ang ila puloy-an sa wala sing katapusan, didto magapabilin sila sa tanan nga tion, bisan pa nga sang una may mga duta sila nga kaugalingon.
12 Ang pagkahalangdon sang tawo indi makaluwas sa iya sa kamatayon, mapatay sia subong sang mga sapat.
13 Tan-awa kon ano ang nagakatabo sa mga nagasalig sa ila kaugalingon, ang kapalaran sadtong mga nagasalig sa ila mga manggad,
14 pat-od nga palatyon sila subong sang mga karnero, kag ang kamatayon mangin-ila manugbantay. Ang matarong magadaog sa ila sa pagkaaga samtang ang ila mga bangkay madunot sa duta sang mga patay, nga malayo sa ila mga puloy-an!
15 Pero ang Dios magaluwas sa akon, kuhaon niya ako gikan sa gahom sang kamatayon.
16 Indi ka magkahadlok kon magmanggaranon ang isa ka tawo, kon ang iya manggad magdugang pa gid;
17 kay indi niya madala ini kon mapatay sia; ang iya manggad indi niya mabalon sa lulobngan.
18 Bisan pa kon sa sini nga kabuhi nakapaayaw ang isa ka tawo, kag ginadayaw sia tungod sang iya kauswagan,
19 sa iya pagkapatay magaupod sia sa tanan niya nga mga katigulangan, sa diin wala sing katapusan ang kadudolman.
20 Ang pagkahalangdon sang tawo indi makaluwas sa iya sa kamatayon, mapatay sia subong sang mga sapat.

Mga Salmo 48 | Mga Salmo 50