Ang mga tawo nagsiling, “Nagbuang sia!”

Balasahon Subong nga Adlaw

(Sabado, January 20, 2018)

Nahauna nga Balasahon: 

2 Samuel 1:1-4, 11-12, 19, 23-27

Sang mapatay si Saul, si David nagbalik halin sa iya pagdaog sa mga Amalecnon, kag nagtener sia sing duha ka adlaw sa Ziklag. Sang madason nga adlaw may isa ka pamatan-on nga lalaki nga nag-abot halin sa kampamento ni Saul. Sa pagpakita sang iya kasubo gingisi niya ang iya bayu kag nagbutang sing yab-ok sa iya ulo. Nagkadto sia kay David kag nagluhod sa duta sa pagpakita sang iya pagtahod. Si David nagpamangkot sa iya, “Diin ka maghalin?” Nagsabat sia, “Nagpalagyo ako gikan sa kampamento sang mga Israelinhon.” Si David nagsiling, “Sugiri ako kon ano ang natabo.” Nagsabat sia, “Ang aton mga hangaway nagpalagyo halin sa inaway, kag madamo sang aton mga soldado ang nagkalamatay. Si Saul kag si Jonatan nga iya anak napatay man.” Gingisi ni David ang iya bayu sa kasubo, kag ang tanan niya nga mga tinawo naggisi man sang ila bayu. Nagpangasubo sila kag naglalaw, kag nagpuasa tubtob sa gab-i para kay Saul kag kay Jonatan, kag para sa Israel, ang mga tawo sang GINOO, kay madamo ang nagkalamatay sa inaway. “Sa mga kabakuloran sang Israel, ang aton mga pangulo nagkalamatay! Ang pinakaisog naton nga mga soldado nagkalapukan!“Si Saul kag si Jonatan, ginpalangga kag ginhigugma; nag-updanay sila sa kabuhi kag sa kamatayon. Madasig pa sila sa mga agila, makusog pa sila sa mga leon! “O mga babayi sang Israel, maglalaw kamo para kay Saul! Ginpabayuan niya kamo sing malahalon nga mga bayu nga pula, kag ginpunihan niya kamo sing alahas kag bulawan. “Ang isganan nga mga soldado nagkalapukan, nagkalamatay sila sa inaway. Si Jonatan nagahamyang nga patay sa mga kabakuloran. “Nagpangasubo ako tungod sa imo, utod ko nga Jonatan; daw ano ka kamahal sa akon! Daw ano ka tam-is sang imo gugma sa akon, nga labaw pa sa paghigugma sang mga babayi. “Ang isganan nga mga soldado nagkalapukan, ang ila mga hinganiban indi na mapuslan.”

Salmo sa Pagsabat: 

Mga Salmo 80:2-3, 5-7

Ipakita man ang imo gugma sa tribo sang Efraim, Benjamin, kag Manases! Ipakita sa amon ang imo kusog; kari kag luwasa kami! Pabalika kami, O Dios! Ipakita sa amon ang imo gugma, kag maluwas kami! Ginhatagan mo kami sing mga luha nga amon kalan-on, isa ka daku nga kupa nga may mga luha nga ilimnon. Gintugtan mo ang kaingod nga mga pungsod sa pag-inagaway sang amon duta, kag ginayaguta kami sang amon mga kaaway. Pabalika kami, Dios nga Makagagahom! Ipakita sa amon ang imo gugma, kag maluwas kami!

Ebanghelyo Subong nga Adlaw:

Marcos 3:20-21

Dayon si Jesus nagpauli. Sa liwat nagdulogok sa iya ang madamo nga mga tawo sa bagay nga sia kag ang iya mga gintuton-an wala na sing tion sa pagkaon. Sang mabatian ini sang iya pamilya, naglakat sila sa pagkuha sa iya, tungod kay ang mga tawo nagsiling, “Nagbuang sia!” 

January 21