Sa Ano Bala ang Ginharian sang Dios Manginkaangay

Liturhiya sang Pulong

(Domingo, Hunyo 17, 2018)

1. Ang Pagbasa gikan sa Libro ni:

Ezequiel nga Propeta 17:22-24

Amo ini ang ginasiling sang Ginoo nga Gamhanan: “Kuhaon ko ang punta sang isa ka mataas nga sedro, kag kutlon ko ang iya hugbos; itanom ko ini sa isa ka mataas nga bukid, sa pinakamataas nga bukid sang Israel. Magapananga ini kag magapamunga, kag mangin-isa ka matahom nga sedro. Ang tanan nga sahi sang mga pispis magapuyo didto, kag magapasilong sa iya mga landong. Ang tanan nga mga kakahuyan sang duta magakilala nga ako amo ang GINOO. Pukanon ko ang mataas nga mga kahoy kag pataason ko ang manubo nga mga kahoy. Palayaon ko ang malagtom nga mga kahoy kag himuon ko nga magpanalingsing liwat ang laya nga mga kahoy. Ako, ang GINOO, amo ang naghambal sini kag himuon ko ang akon ginsiling.”

Salmo sa Pagsabat:

Mga Salmo 92:2-3, 13-14, 15

(S) O Ginoo, daw ano kaayo ang magpasalamat sa imo.

Daw ano kaayo ang magpasalamat sa imo, O Ginoo, sa pagkanta sing mga pagdayaw sa imo, O Dios nga Labing Mataas, sa pagsugid sang imo mapinadayunon nga gugma sa tagsa ka aga, kag sang imo katutom sa tagsa ka gab-i. (S)
Ang matarong magalambo subong sang mga palma, magatubo sila subong sang sedro sang Libano. Kaangay sila sang mga kahoy nga gintanom sa balay sang GINOO, nga nagalambo sa Templo sang aton Dios. (S)
Nagapamunga pa sa iya katigulangon, kag sa gihapon malagtom kag mabakod. Nagapakita ini nga ang GINOO matarong, wala sing sayup sa iya nga akon mangangapin. (S)

2. Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 5:6-10

Gani, sa tanan nga tion nagasalig gid kita. Nakahibalo kita nga samtang yari pa kita sa sining lawasnon nga puloy-an malayo pa kita sa puloy-an sang Ginoo. Kay nagakabuhi kita karon paagi sa pagtuo, kag indi paagi sa aton makita. Nagasalig gid kita, kag luyag kita nga magbiya sining lawasnon nga puloy-an kag magpuyo upod sa Ginoo. Pero labaw sa tanan, luyag kita maglipay sa iya, bisan sa aton puloy-an diri ukon didto. Kay tanan kita dapat mag-atubang kay Cristo, agod pagahukman niya, kag sa tapos sini ang tagsatagsa magabaton sang nagakaigo sa iya, suno sa iya binuhatan nga maayo ukon malain, sa iya lawasnon nga pagkabuhi.

Aleluya:
Ang binhi amo ang pulong sang Dios, si Kristo ang manugsab-og. Ang bisan sin-o nga nagadangop sa iya magakabuhi nga wala sing katapusan.

Ang Pagbasa sang Santos nga Ebanghelyo suno kay:

San Marcos 4:26-34

Nagsiling pa gid si Jesus, “Ang Ginharian sang Dios kaangay sang tawo nga nagsab-og sang binhi sa iya uma. Nagatulog sia kon gab-i, kag kon adlaw nagaobra sia, samtang ang binhi nagaulhot kag nagatubo, pero wala sia kahibalo kon paano ang pagkahimo sini. Ang duta mismo nagapatubo kag nagapabunga sang mga tanom: nahauna ang dahon, madason ang uhay, kag sa ulihi ang matinggas nga bunga. Kon ang bunga gulang na, nagapadala sia sing manuggarab, kay ang tig-alani nag-abot na.” Si Jesus nagpamangkot, “Sa ano bala mapaanggid ang Ginharian sang Dios? Ano nga palaanggiran ang aton gamiton sa pagpaathag sini? Kaangay ini sang isa ka binhi sang mostasa, ang labing diutay nga binhi sa kalibutan. Ginakuha ini sang tawo kag ginatanom sa duta. Dayon nagatubo ini kag nagadaku sing labaw sa mga kahuykahoy. Ang iya mga sanga nagadalagku sa bagay nga ang mga pispis nagapugad sa iya sanga nga mahandong.” Paagi sa mga palaanggiran nga kasubong sini, nagwali si Jesus sa mga tawo. Naghambal sia sa ila suno sa ila mahangpan. Indi sia maghambal sa ila kon indi paagi sa mga palaanggiran. Pero kon silahanon lang sang iya mga gintuton-an, ginasaysay niya ang tanan sa ila.

Hunyo 16 | Hunyo 18