Mga Salmo 44

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Pangamuyo agod Apinan

1 Nabatian gid sang amon mga dulonggan, O Dios, ginsugiran kami sini sang amon mga katigulangan, nahanungod sang dalagku nga mga butang nga imo ginhimo sa ila panahon, sang una nga mga inadlaw:
2 kon paano nga ikaw gid ang nagtabog sang mga pagano, kag ginpapuyo mo ang imo mga tawo sa ila duta, kon paano ang pagsilot mo sang iban nga mga kapungsoran, pero ginpauswag mo ang imo mga tawo.
3 Ang imo mga tawo wala mag-agaw sang duta paagi sa ila mga espada, wala nila madaog ini paagi sa ila kaugalingon nga gahom, kundi paagi sa imo gahom kag kusog, tungod sang pagsalig nga ikaw nagaupod sa ila, sa pagpakita nga imo sila ginahigugma.
4 lkaw ang akon hari kag ang akon Dios; ginapadaog mo ang mga tawo.
5 Paagi sa imo gahom ginalutos namon ang amon mga kaaway, sa imo pag-upod ginadaog namon ang amon mga kasumpong.
6 Wala ako nagasalig sa akon pana, ukon sa akon espada sa pagluwas sa akon;
7 kay ikaw nagluwas sa amon gikan sa amon mga kaaway, ginlutos mo ang mga nagadumot sa amon.
8 Dayawon namon ikaw sa gihapon kag pasalamatan namon ikaw sa walay katubtoban.
9 Pero karon, O Dios, ginsikway mo kami kag ginpalutos, wala mo na ginaupdi ang amon mga hangaway.
10 Ginpapalagyo mo kami sa amon mga kaaway, kag gin-agaw nila ang amon pagkabutang.
11 Gintugot mo nga ihawon kami kaangay sang mga karnero, ginpaalaplaag mo kami sa iban nga mga pungsod.
12 Ginbaligya mo sing barato ang imo kaugalingon nga mga tawo, kag wala ka gid nakaganansya sa imo pagbaligya.
13 Ang amon mga kaingod nakakita sang imo ginhimo sa amon, kag ginyaguta kag ginlangulango nila kami.
14 Ginhimo mo kami nga talamayon sa mga kapungsoran, nagalungolungo sila sang ila mga ulo sa paghikay sa amon.
15 Pirme lang ako ginatamay, kag naputos ako sang kahuloy-an,
16 sa pagpamati sang pagyaguta kag pagpasipala sang akon mga kaaway kag mga kasumpong.
17 Ini tanan nahanabo sa amon bisan pa nga wala kami magkalipat sa imo, ukon maglalis sang kasugtanan nga aton ginhimo.
18 Wala kami nagdi-mainunongon sa imo, wala man kami naglapas sang imo mga sugo.
19 Pero imo kami ginpabay-an sa mga sapat nga talunon, ginpatumbayaan mo kami sa mangitungito nga kadudolman.
20 Kon nag-untat kami sa pagsimba sa amon Dios, kag nagpangamuyo sa iban nga dios,
21 kuntani nasapwan mo gid ini, kay nahibaluan mo ang tinago nga mga panghunahona sang mga tawo.
22 Pero tungod sa imo ginapamatay kami sa tanan nga tion, kag ginakabig kami nga mga karnero nga ilihawon.
23 Magmata, O Ginoo! Ngaa nagakatulog ikaw? Bangon ka! Indi man kami pagsikwaya sing dayon!
24 Ngaa bala nagapanago ka sa amon? Indi man pagkalimti ang amon pag-antos kag kabudlayan!
25 Nagahagmak kami sa duta, nagahaplak kami sa yab-ok nga nalutos.
26 Bangon ka kag tabangi kami! Tungod sang imo mapinadayunon nga gugma, luwasa kami! 

Mga Salmo 43 | Mga Salmo 45