Ginpang-ayo ni Jesus ang mga Masakiton sa Genezaret

Balasahon Subong nga Adlaw

(Lunes, February 5, 2018)

Nahauna nga Balasahon:

1 Mga Hari 8:1-7, 9-13 

Ginpatawag ni Haring Salomon ang mga pangulo sang Israel, ang mga pangulo sang mga tribo kag mga baranggay, sa pagkadto sa Jerusalem sa pagkuha sang Kaban sang Kasugtanan sang GINOO halin sa Sion, ang Siyudad ni David, kag dalhon ini sa Templo. Nagtipon sila tanan sing tingob sa Piesta sang mga Tolda sa bulan sang Etanim, ang ikapito nga bulan. Sang makatipon ang tanan nga mga pangulo, ang mga pari nagkuha sang Kaban sang Kasugtanan, kag sa bulig sang mga Levita gindala ini, upod ang balaan nga tolda  kag ang tanan nga mga gamit sini, pakadto sa Templo. Si Haring Salomon kag ang tanan nga mga tawo sang Israel nagtipon sa atubangan sang Kaban sang Kasugtanan kag naghalad sang indi maisip nga kadamuon sang mga karnero kag mga baka nga toro. Dayon ang mga pari nagkuha sang Kaban sang Kasugtanan kag ginbutang ini sa nasulod nga santuaryo sang Templo, ang Labing Balaan nga Duog, sa idalom sang mga pakpak sang mga sapat nga may pakpak. Ang ila mga pakpak nga nagahumlad sa ibabaw sang Kaban sang Kasugtanan, nagtabon sini kag sang mga yayongan. Wala sing iban nga sulod ang Kaban sang Kasugtanan luas sang duha ka tapitapi nga bato nga ginbutang ni Moises didto sa bukid sang Sinai, sa diin ang GINOO naghimo sing kasugtanan sa mga mga tawo sang Israel sang nagapagwa sila halin sa Egipto. Sa napagwa ang mga pari sa Templo, ang panganod nagapuno sini. Indi na sila makabalik sa sulod sa paghimo sang ila bulohaton kay ang himaya sang GINOO nagpuno sang Templo. Dayon si Salomon nagpangamuyo, “Ikaw, O GINOO nagbutang sang adlaw sa langit, pero ginpili mo ang pagpuyo sa mga gal-om kag kadudolman. Karon nagpatindog ako sing templo para sa imo, isa ka duog nga imo pagapuy-an sa walay katubtoban.”

Salmo sa Pagsabat:

Mga Salmo  132:6-7, 8-10

Nakabati kami sa Bethlehem nahanungod sang Kaban sang Kasugtanan, kag nakita namon ini sa latagon sang Jaar. Nagsiling kami, “Makadto kita sa balay sang GINOO; masimba kita sa atubangan sang iya trono!” Kari ka sa imo palahuwayan, O GINOO, upod sa imo Kaban sang Kasugtanan, ang tanda sang imo gahom. Kabay ang imo mga pari magbantala nga ikaw nagaluwas sang imo mga tawo; kabay ang imo mga tawo maghugyaw sa kalipay! Nagsaad ka sa imo alagad nga si David, indi pagsikwaya ang imo pinili nga hari, O GINOO! 

Ebanghelyo Subong nga Adlaw:

Marcos 6:53-56

Nagtabok sila sa linaw kag nagdungka sa Genezaret sa diin ginpundo nila ang sakayan. Sang pagtakas nila, sa gilayon nakilala sang mga tawo si Jesus. Gani ang mga tawo nagkadto sa palibot nga mga duog kag gindala nila sa iya ang mga masakiton nga nayayungan sa ila mga hiligdaan sa bisan diin nga duog nga mabatian nila nga didto si Jesus. Kag bisan diin sia magkadto, sa mga baryo, banwa ukon uma, ang mga tawo nagdala sang ila mga masakiton sa mga tiyendahan, kag nagpakiluoy sa iya nga kon mahimo makatandog ang mga balatianon bisan sa sidsid lamang sang iya kunop, kag ang tanan nga nagtandog sini nag-ayo.

February 4 | February 6