Magpakighusay sa Imo Utod

Liturhiya sang Pulong

(Huwebes, Hunyo 14, 2018)

Ang Pagbasa gikan sa Nahauna nga Libro sang:

Mga Hari 18:41-46

Dayon si Elias nagsiling kay Haring Acab, “Karon lakat ka kag magkaon. Mabatian ko ang huganas sang ulan nga nagapakari.” Samtang si Acab naglakat agod magkaon, si Elias nagsaka sa putokputokan sang bukid sang Carmelo, sa diin nagduko sia sa duta nga ang iya ulo yara sa gin-utlan sang iya duha ka tuhod. Nagsiling sia sa iya suloguon, “Lakat ka kag maglantaw sa dagat.” Ang suloguon naglakat kag nagbalik nga nagasiling, “Wala ako sing may nakita bisan ano.” Kapito gid sia ginsingganan ni Elias nga maglakat kag maglantaw. Sa ikapito nga tion nagbalik sia kag nagsiling, “Nakita ko ang diutay nga gal-om nga indi gani magdaku sa palad sang tawo nga nagapaibabaw halin sa lawod.” Si Elias nagmando sa iya alagad, “Kadto ka kay Haring Acab kag singgana sia nga magsakay sia sa iya karuwahi kag magpauli sa indi pa sia maabtan sang ulan.” Sa wala madugay ang langit nakulapan sang madulom nga gal-om, ang hangin nagsugod sa paghuyop, kag ang madamol nga ulan nagsugod sa pagtupa. Si Acab nagsakay sa iya karuwahi kag nagbalik sa Jezreel. Ang gahom sang GINOO nag-abot kay Elias: ginwagkusan niya sing hugot ang iya bayu sa iya hawak kag nagdalagan sing una kay Acab pakadto sa dulonan sang Jezreel.

Salmo sa Pagsabat:

Mga Salmo 65:10, 11, 12-13

(S) O Dios dalayawon ka sa Sion.

 Nagapakita ka sang imo pag-atipan sang duta sa imo pagpadala sang ulan, ginahimo mo ini nga maayo kag mapinatubason. Ang mga tuboran nga imo ginhatag wala gid nagakahubas, ginapatubo nila ang mga tanom sa duta. (S)
Amo ini ang imo ginhimo, nagapadala ikaw sing madamo nga ulan sa naarado nga kaumhan kag ginapatubigan nimo ini; ginapahumok mo ang duta sa mga talithi kag ginapatubo mo ang bag-o nga mga tanom. (S)
Ang mga pasto puno sang mga kasapatan, ang kilid sang mga bakulod puno sang kalipay. Ang mga latagon puno sang mga karnero, ang kapatagan puno sang trigo; nagahinugyaw kag nagakanta sila sa kalipay! (S) 

Aleluya:

Juan 13:34

Ginahatag ko sa inyo ang isa ka bag-o nga sugo; siling sang Ginoo; maghigugmaanay kamo subong nga ako nagahigugma sa inyo, sa amo man nga bagay dapat kamo maghigugmaanay.

Ang Pagbasa sang Santos nga Ebanghelyo suno kay:

San Mateo 5:20-26

Gani ginasingganan ko kamo, nga sarang lang kamo makasulod sa Ginharian sang langit kon ang inyo katutom sa pagtuman sang ginapaabot sang Dios sa inyo maglabaw sa katutom sang mga manunodlo sang Kasugoan kag sang mga Fariseo.” “Inyo nabatian ang ginsiling sang una sa inyo mga katigulangan, ‘Indi ka magpatay sang tawo. Ang bisan sin-o nga makapatay pagadalhon sa hukmanan.’ Pero karon nagasiling ako sa inyo nga ang bisan sin-o nga nagakaakig sa iya utod, pagadalhon sa hukmanan; kag ang bisan sin-o nga nagapakalain sa iya utod, sa pagsiling sa iya, ‘Hoy, waay ka pulos!’ pagadalhon sa Pinakamataas nga Hukmanan; kag ang bisan sin-o nga nagasiling sa iya utod, ‘Hoy, buang!’ may katalagman nga magpaimpiyerno. Gani kon nagadala ikaw sang imo dulot sa Dios kag madumdoman mo nga ang imo utod may aligutgot sa imo, bayai anay ang imo dulot sa atubangan sang altar kag magpakighusay sa imo utod, kag ugaling magbalik ka kag maghalad sang imo dulot sa Dios. “Kon may tawo nga magsumbong sa imo sa hukmanan, magpakighusay ka sa iya samtang may tion pa kag wala pa kamo makakadto sa hukmanan, kay kon didto na kamo, iya ikaw itugyan sa hukom kag ang hukom magatugyan sa imo sa gwardya, kag isulod ka sa bilangguan. Nagasiling ako sa imo, magapabilin ka didto tubtob mabayaran mo ang tanan mo nga multa.”

Hunyo 13 | Hunyo 15