“Ako Amo ang Tinapay sang Kabuhi"

Balasahon Subong nga Adlaw

(Martes, April 17, 2018)

Nahauna nga Balasahon:

Binuhatan 7:51-8:1

“Sa pagkabatinggilan gid sa inyo! Sa pagkadi-matinuohon sang inyo mga tagipusoon. Sa pagkabungol sa inyo sa mensahi sang Dios! Pareho gid kamo sang inyo mga katigulangan, kag inyo pirme ginasupokan ang Espiritu Santo! May yara bala nga propeta nga wala ginhingabot sang inyo mga katigulangan? Ginpatay nila ang mga mensahero sang Dios nga sang una nagtagna sang pagkari sang iya matarong nga Alagad. Kag karon inyo sia ginluiban kag ginpatay. Kamo ang nagbaton sang sugo sang Dios nga gindala sa inyo sang mga anghel, pero wala ninyo ini pagtumana!” Samtang nagapamati ang mga katapo sang Konsilyo sa kay Esteban naakig gid sila kag nagpabagrot sila sang ila mga ngipon sa kaakig. Pero si Esteban, nga puno sang Espiritu Santo, nagtangla sa langit kag nakita niya ang himaya sang Dios kag si Jesus nga nagatindog sa tuo sang Dios. Nagsiling sia, “Tan-awa ninyo! Nakita ko ang langit nga ginbuksan kag ang Anak sang Tawo nga nagatindog sa tuo sang Dios!” Nagsilinggit sila, dungan ang pagtabon sang ila mga dulonggan, kag nagdinaguso sila pakadto sa iya. Dayon ginpagwa nila sia sa siyudad kag didto ginbato. Ginbilin sang mga saksi ang ila mga kunop sa isa ka pamatan-on nga ginahingalanan kay Saulo. Kag sang ginabato nila si Esteban, nagpanawag sia sa Ginoo, “Ginoong Jesus, batuna ang akon espiritu!” Nagluhod sia kag nagsinggit sing mabaskog, “Ginoo! Indi pag-isipa ini nga sala batok sa ila!” Sang nahambal niya ini, napatay sia. Kag si Saulo nagsugot man sa pagpatay sa iya. Sa sadto gid nga adlaw, nagsugod ang mapintas nga paghingabot sa iglesia sa Jerusalem. Luas sa mga apostoles, ang tanan nga mga tumoluo nag-alaplaag sa probinsya sang Judea kag sang Samaria. 

Si Saulo nagsugot man sa pagpatay sa iya. (8:1)

Salmo sa Pagsabat:

Mga Salmo 31:3-4, 6, 7, 8, 17, 21

Tungod kay Ikaw ang akon dalangpan kag mangangapin, ubayi kag tuytoyi ako suno sa imo ginsaad. Ilikaw ako sa siod nga ila ginbutang para sa akon; ikaw ang akon dalangpan. Ginadumtan mo ang nagasimba sa di-matuod nga mga dios, pero ako akon nagasalig sa imo. Tungod sang imo mapinadayunon nga gugma, magakalipay ako kag magakasadya. Nakita mo ang akon mga pag-antos; nahibaluan mo ang akon mga palaligban. Wala mo ako ginpadakop sa akon mga kaaway; ginbantayan mo ako nga indi maano. Nagapanawag ako sa imo, O Ginoo; indi pag-itugot nga malutos ako! Kabay nga malutos ang mga malaut, kag kabay nga maghipos sila didto sa kalibutan sang mga patay. Dayawa ninyo ang Ginoo! Daw ano ka makatilingala ang pagpakita niya sang iya gugma sa akon, sang ginkibon ako kag ginsalakay!

Aleluya:

Juan 6:35

Ako amo ang tinapay sang kabuhi. Ang nagakari sa akon indi na gid paggutomon.

Ebanghelyo Subong nga Adlaw:

Juan 6:30-35

Nagsabat sila, “Ano nga milagro ang mapakita mo sa amon, agod magtuo kami sa imo? Ano ang himuon mo? Ang amon mga katigulangan nagkaon sang mana sa desierto, suno sa ginasiling sang kasulatan, ‘Ginhatagan niya sila sing tinapay nga kalan-on halin sa langit.’ Si Jesus nagsiling, “Nagasiling ako sa inyo sang matuod: indi si Moises ang naghatag sa inyo sang tinapay halin sa langit, kundi ang akon Amay amo ang nagahatag sa inyo sang matuod nga tinapay halin sa langit. Kay ang tinapay nga ginahatag sang Dios amo sia nga nagapanaog halin sa langit kag nagahatag sing kabuhi sa kalibutan.” Nagsiling sila, “Sir, hatagi kami pirme sini nga tinapay.” Si Jesus nagsiling sa ila, “Ako amo ang tinapay sang kabuhi. Ang nagakari sa akon indi na gid paggutomon, kag ang nagatuo sa akon indi na gid pag-uhawon. 

April 16 | April 18