1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
☆☆☆
Ang Paglugos kay Dina
1 Karon si Dina nga anak ni Jacob kag ni Lea naggwa sa pagduaw sang mga babayi nga taga-Canaan.
2 Pagkakita ni Siquem, ang anak ni Hamor nga Hebinhon kag pangulo sadto nga lugar, kay Dina, gindakop niya sia kag ginlugos.
3 Pero nagtubo ang iya gugma kay Dina, kag tungod kay ginhigugma niya sia, gintinguhaan niya nga maluyag si Dina sa iya.
4 Dayon si Siquem nagsiling kay tatay niya, “Pasugoi ninyo ining dalaga agod nga mangin-asawa ko.”
5 Nabatian ni Jacob nga ang iya bata nga babayi gindagtaan, pero tungod kay ang iya mga anak nga lalaki didto sa latagon nga nagaatipan sang mga hayop, naghipos lang sia anay tubtob nakaabot sila.
6 Si Hamor nga amay ni Siquem nagkadto kay Jacob kag nagpakighambal sa iya,
7 sang nagahinampot halin sa latagon ang mga anak nga lalaki ni Jacob. Sang pagkabati nila sini nakibot sila kag naakig gid tungod sang malain nga butang nga ginhimo ni Siquem kay ginpakahuy-an niya ang mga tawo sang Israel tungod sang iya paglugos sang anak nga babayi ni Jacob.
8 Si Hamor nagsiling sa ila, “Ang akon anak nga si Siquem naluyag gid sa imo bata nga babayi. Kon mahimo ipaasawa sia sa akon anak.
9 Maghimo kita sing kasugtanan nga mag-alasawahay ang aton mga kabataan.
10 Dayon sarang kamo makapuyo sa amon duta upod sa amon. Sarang kamo makapuyo bisan diin nga luyag ninyo, makanegosyo, kag makaangkon sing mga pagkabutang.”
11 Dayon si Siquem nagsiling sa amay kag sa mga utod nga lalaki ni Dina, “Ihatag man ninyo ang akon pangayo, kag hatagan ko kamo sang bisan ano nga pangayuon ninyo.
12 Magsiling lang kamo kon ano nga mga regalo ang luyag ninyo, kag kon ano ang pangayuon ninyo, kay ihatag ko sa inyo, kon inyo sia ipaasawa sa akon.”
13 Ang mga anak nga lalaki ni Jacob nagsabat kay Siquem kag sa iya amay nga si Hamor, sa tuyo nga malimbungan sila tungod kay gindagtaan ni Siquem ang ila utod nga babayi nga si Dina.
14 Nagsiling sila, “Indi namon pag-ipaasawa ang amon utod sa lalaki nga wala matuli, kay kahuloy-an ina sa amon.
15 Mapasugot lamang kami kon manginsubong kamo sa amon, kag ina kon inyo tulion ang inyo tanan nga mga lalaki.
16 Dayon masugot kami nga mag-alasawahay ang aton mga himata. Magapuyo kami upod sa inyo kag mangin-isa kita ka grupo sang mga tawo.
17 Pero kon indi kamo magsugot sang amon ginapangayo kag indi kamo magpatuli, dalhon namon sia pauli.”
18 Nakita ni Hamor kag sang iya anak nga si Siquem nga ang ginapangayo daw nagakabagay man,
19 gani ang pamatan-on wala na mag-usik sing tion sa paghimo sang ginapahimo sa iya, kay naluyag gid sia sa bata ni Jacob nga babayi. Si Siquem ginatahod sing labi sa bug-os nga panimalay sang iya amay.
20 Si Hamor kag ang iya anak nga si Siquem nagkadto sa ginatipunan sang mga tawo sa puwerta sang banwa, kag nagsiling sa ila mga kasimanwa,
21 “Ini nga mga tawo mainabyanon. Papuy-on naton sila diri sa aton duta kag indi ninyo sila pag-anha. Ang aton duta may lugar pa para sa ila. Pangasaw-on ta ang ila mga anak nga babayi kag ipaasawa ta man sa ila ang aton mga anak nga babayi.
22 Pero ini nga mga tawo magasugot lang sa pagpuyo upod sa aton kag mangin-isa sa aton, kon tulion ta ang tanan naton nga mga lalaki, subong sa ila.
23 Sa ulihi ang tanan nila nga mga kahayupan, mga pagkabutang, kag mga baka mangin-aton. Gani magpasugot kita nga makapuyo sila upod sa aton.”
24 Ang tanan nga pumoluyo sang banwa nagsugot sang ginhinyo ni Hamor kag ni Siquem kag ang tanan nga mga lalaki gintuli.
25 Sang makaligad ang tatlo ka adlaw, sang ginahapdian pa ang mga lalaki sa ila pagpatuli, ang duha ka anak nga lalaki ni Jacob, si Simeon kag si Levi, nga mga utod ni Dina, nagkuha sang ila mga espada, nagsulod sa banwa nga wala mahibal-i nga malain ang ila tuyo, kag ginpamatay nila ang tanan nga mga lalaki.
26 Ginpatay nila si Hamor kag ang iya anak nga lalaki nga si Siquem, ginkuha nila si Dina sa balay ni Siquem kag naglakat.
27 Ang iban nga mga anak nga lalaki ni Jacob nagsalakay sa mga napilasan, kag ginpanguha nila ang tanan nga mapuslan nila sa banwa, tungod kay ang ila utod nga babayi gindagtaan.
28 Ginpanguha nila ang mga karnero, mga baka, mga asno, kag ang tanan nga makuha nila sa banwa kag sa latagon.
29 Ginkuha nila ang tanan nga mga butang nga mapuslan, gindakop ang tanan nga mga babayi kag kabataan, kag gindala nila ang tanan nga makuha nila sa mga balay.
30 Si Jacob nagsiling kay Simeon kag kay Levi, “Ginhatagan ninyo ako sing palaligban. Karon ang mga Canaanhon, ang mga Pereznon kag ang tanan nga mga pumoluyo sang duta, nagadumot sa akon. Wala ako sing madamo nga mga tinawo. Kon magtingob sila sa pagsalakay sa akon, ang aton bug-os nga panimalay maubos gid kalamatay.”
31 Pero nagsabat sila, “Indi mahimo nga ang amon utod nga babayi pagakabigon nga kaangay sang isa ka babayi nga nagabaligya sang iya dungog.”
No comments:
Post a Comment