Genesis 23

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Si Sara Napatay kag si Abraham Nagbakal sing Lulobngan

1 Si Sara nagkabuhi sing 127 ka tuig.

2 Napatay sia sa Hebron sa duta sang Canaan, kag si Abraham naglalaw sa iya.

3 Karon ginbayaan niya anay ang iya patay nga asawa kag nagsiling sa mga Hethanon,

4 “Dumoluong kag umalagi lamang ako diri sa inyo, pabakla man ninyo ako sing duta para lulobngan, agod malubong ko ang akon asawa.”

5 Nagsabat sila,

6 “Tyoy, pamati ka sa amon. Gamhanan ka nga pangulo sa tunga namon, ilubong ang imo asawa sa pinakamaayo nga lulobngan namon. Wala gid sing isa sa amon nga magadumili sang iya lulobngan, ukon magapugong sa imo sa paglubong sang imo patay.”

7 Dayon si Abraham nagtindog, nagsaludo sa ila,

8 kag nagsiling, “Kon luyag ninyo nga ilubong ko ang akon asawa diri, palihog singgana ninyo si Efron nga Hethanon, nga anak ni Zohar,

9 nga ibaligya niya sa akon ang kuweba sang Macpela nga yara sa higad sang iya uma. Singgana sia nga ibaligya niya ina sa iya gid nagakaigo nga bili nga saksi kamo, agod mangin-akon ina subong nga lulobngan.”

10 Karon si Efron nagapungko man didto upod sa mga Hethanon sa tilipunan sang mga tawo sa puwerta sang siyudad. Nagsabat sia nga nabatian gid sang tanan didto,

11 ‘Tyoy, indi na kinahanglan nga baklon mo pa. Ihatag ko sa imo ang bug-os nga uma kag ang lungib nga yara dira. Saksi ang akon mga kasimanwa nga ihatag ko ini sa imo, agod malubong mo ang imo asawa.”

12 Pero si Abraham nagsaludo sa atubangan sang mga tawo,

13 kag nagsiling kay Efron agod ang tanan makabati, “Kon luyag mo gid man, baklon ko ang bug-os nga uma suno sa iya bili. Batuna ang akon bayad, kag ilubong ko ang akon asawa didto.”

14 Si Efron nagsabat,

15 “Tyoy, ang duta nagabili sing 400 ka bilog nga pilak, pero ano gid ina sa aton? Ilubong ang imo asawa didto.”

16 Nagkasugot sila ni Abraham, kag ginpinsar niya ang kuwarta nga ginsiling ni Efron nga nagapamati gid ang mga anak ni Het. Ang kadamuon sang pilak 400, suno sa talaksan sang mga negosyante.

17 Amo ini ang paagi nga ang pagkabutang ni Efron sa Macpela, sa sidlangan sang Mamre, nangin-iya ni Abraham. Ini nagalakip sang uma, sang kuweba nga yara dira, kag sang tanan nga mga kahoy tubtob sa iya mga dulonan.

18 Ginkilala sang mga Hethanon nga nagtipon didto, nga ini pagkabutang ni Abraham.

19 Dayon ginlubong ni Abraham ang iya asawa nga si Sara sa sini nga kuweba sa duta sang Canaan.

20 Gani ang uma kag ang kuweba sa sini nga duta nga iya anay sang mga Hethanon, nangin-iya ni Abraham subong duta nga lulobngan.

Genesis 22 | Genesis 24