"Ako Amo ang Maayo nga Manugbantay"

Balasahon Subong nga Adlaw

(Domingo, April 22, 2018)

Nahauna nga Balasahon:

Binuhatan 4:8-12

Si Pedro nga puno sang Espiritu Santo nagsabat sa ila, “Mga pangulo sang banwa kag mga katigulangan sang mga Judio, kon ginausisa ninyo kami nahanungod sang pag-ayo sining piang nga tawo, dapat mahibaluan ninyo tanan kag sang bug-os nga Israel, nga ini nga tawo nga nagatindog sa inyo atubangan, nag-ayo sa gahom sang ngalan ni Jesu-Cristo nga taga-Nazaret, nga inyo ginlansang sa krus kag ginbanhaw sang Dios. Si Jesus amo ang ginsiling sang kasulatan: ‘Ang bato nga ginsikway ninyo Nga mga manunokod Nanginpamakod nga bato.’ Ang kaluwasan maagom paagi sa iya lamang, kay wala na sing iban nga ngalan sa bilog nga kalibutan nga ginhatag sang Dios sa mga tawo nga makaluwas sa aton.”

Salmo sa Pagsabat:

Mga Salmo 118:1, 8-9, 21-23, 26, 28, 29

Magpasalamat sa Ginoo, kay maayo siya, kag ang iya gugma nagapadayon sa gihapon. Mas maayo ang magsalig sa Ginoo, sang sa magsalig sa mga tawo. Mas maayo ang magsalig sa Ginoo, sang sa magsalig sa mga tawuhanon nga mga pangulo. Ginadayaw ko ikaw, O Ginoo, kay ginpamatian kag ginpadaog mo ako! Ang bato nga ginsikway sang mga manunokod, nanginpamakod nga bato. Ang Ginoo amo ang naghimo, daw ano ka makatilingala ini tan-awon! Ang Dios magbendisyon sa iya nga nagakari sa ngalan sang Ginoo! Gikan sa Templo sang Ginoo nagadayaw kami sa imo! Ikaw ang akon Dios, kag nagapasalamat ako sa imo; ibantala ko ang imo pagkagamhanan. Magpasalamat sa Ginoo, kay maayo sia, kag ang iya gugma nagapadayon sa gihapon.

Ikaduha nga Balasahon:

1 Juan 3:1-2

Talupangda ninyo kon daw ano ang paghigugma sang Amay sa aton! Ang iya gugma para sa aton tama ka daku sa bagay nga ginatawag kita nga mga anak sang Dios, kag matuod gid man nga amo kita. Gani ang kalibutan wala makakilala sa aton, kay wala ini nakakilala sa Dios. Mga hinigugma ko, karon mga anak na kita sang Dios, ugaling indi pa maathag kon mangin-ano kita sa ulihi. Pero nakahibalo kita nga kon magpahayag si Cristo, manginkaangay kita niya, kay makita naton ang iya matuod nga kinaugali.

Aleluya:

Juan 10:14

Ako amo ang maayo nga manugbantay; Subong nga ang Amay nakakilala sa akon kag ako nakakilala sa Amay.

Ebanghelyo Subong nga Adlaw:

Juan 10:11-18

“Ako amo ang maayo nga manugbantay. Ang maayo nga manugbantay handa sa paghatag sang iya kabuhi para sa mga karnero. Ang sinuholan nga indi amo ang manugbantay, kag indi tag-iya sang karnero, nagapalagyo kag nagabiya sang mga karnero, kon makita niya ang lobo nga nagapakari; gani ang lobo nagataban sang mga karnero kag nagapaaplaag sa ila. Ang sinuholan nagapalagyo, kay sinuholan man lang sia, kag wala sia nagakabalaka sa mga karnero. Ako amo ang maayo nga manugbantay. Subong nga ang Amay nakakilala sa akon kag ako nakakilala sa Amay, sa amo man nga bagay nakilala ko ang akon mga karnero, kag sila nakakilala sa akon; kag ako handa sa paghatag sang akon kabuhi para sa ila. May iban pa ako nga mga karnero nga wala sa sini nga toril. Kinahanglan nga dalhon ko man sila. Magapamati sila sang akon tingog kag mangin-isa sila ka panong nga may isa ka manugbantay. “Ang Amay nagahigugma sa akon, kay handa ako sa paghatag sang akon kabuhi, agod nga akon man mabaton ini liwat. Wala sing may makakuha sang akon kabuhi, kundi ginahatag ko ini sing kinabubot-on. Pagusto ako sa paghatag sini, kag pagusto man ako sa pagbawi sini. Ini amo ang sugo sang Amay sa akon.” 

April 21 | April 23