Genesis 6

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ang Pagkamalaut sang Tawo

1 Sang magdamo na ang mga tawo sa bug-os nga kalibutan, kag may nagkalatawo nga mga babayi,

2 nakita sang langitnon nga mga tinuga nga ining mga babayi matahom; gani ginpangasawa nila ang ila mga naluyagan.

3 Karon ang GINOO nagsiling, “Indi ako magpahanugot nga ang mga tawo magkabuhi sing walay katapusan, kay sila mamalatyon. Sugod karon magakabuhi sila sing indi magsobra sa 120 ka tuig.”

4 Sa sadtong mga adlaw, kag bisan sang ulihi, may mga higante sa duta nga mga anak sang tawuhanon nga mga babayi kag sang langitnon nga mga tinuga. Sila ang kinilala nga mga baganihan kag bantog nga mga tawo sadto nga panahon.

5 Sang makita sang GINOO nga ang mga tawo tama gid kalaut sa bug-os nga duta, kag ang ila mga panghunahona tama gid kahigko,

6 naghinulsol sia nga gintuga niya ang mga tawo kag ginpapuyo sa duta. Daku gid ang iya paghinulsol,

7 gani nagsiling sia, “Laglagon ko ang tanan nga mga tawo nga akon gintuga sa duta. Laglagon ko man ang tanan nga mga kasapatan kag ang tanan nga mga kapispisan, kay naghinulsol ako nga ginhimo ko sila.”

8 Pero ang GINOO nalipay kay Noe. 

Si Noe

9-10 Amo ini ang kasaysayan sang kabuhi ni Noe. May tatlo sia ka anak nga lalaki nga amo sanday Sem, Ham, kag Jafet. Si Noe amo gid lang ang matarong nga tawo sang iya panahon. Nagkabuhi sia upod sa Dios.

11 Pero ang iban nga mga tawo malaut gid sa atubangan sang Dios kag ang ila kalaut naglapta bisan diin.

12 Gintan-aw sang Dios ang kalibutan kag nakita niya nga malaut ini, kay ang mga tawo nagakabuhi sa kalautan.

13 Ang Dios nagsiling kay Noe, “Nagtapat ako nga laglagon ko ang tanan nga mga tawo. Laglagon ko sila sing bug-os ka yang kalibutan napun-an sang ila malain nga mga binuhatan.

14 Ikaw imo maghimo sing arka kag gamiton mo ang maayo nga mga kahoy. Maghimo ka sing mga hulot sa arka kag balawon mo ini sa sulod kag sa gwa.

15 Himoa nga ang kalabaon sang arka 450 ka tapak, ang kasangkaron 75 ka tapak, kag ang kataason 45 ka tapak.

16 Atupan mo ang arka, kag butangan mo sing antad nga 18 ka pulgada ang dingding kag ang atop. Himoa nga ang arka may tatlo ka panalgan, kag butangan mo sing puwertahan sa kilid.

17 Magapadala ako sing anaw sa paglaglag sang tanan nga nagakabuhi sa duta. Ang tanan sa duta mapatay,

18 pero magahimo ako sing kasugtanan sa inyo. Magsulod ikaw sa arka upod ang imo asawa, ang imo mga kaanakan kag ang ila mga asawa.

19-20 Magdala ka sa arka sang isa ka paris sang tagsa ka sari sang sapat, kag sang tagsa ka sari sang pispis, agod mabuhi sila.

21 Dala ka sang tanan nga sari sang kalan-on kag tipunon mo ini agod manginkalan-on para sa imo kag para sa ila.”

22 Ginhimo ni Noe ini tanan suno sa ginsugo sang Dios sa iya.

Genesis 5 | Genesis 7