"Sin-o ang Naghatag sa Imo sang Awtoridad?"

Liturhiya sang Pulong

(Sabado, Hunyo 2, 2018)

Ang Pagbasa gikan sa Sulat ni:

San Judas nga Apostol 1:17, 20-25

Pero dumdoma ninyo, mga hinigugma ko! Dumdoma ang ginsiling sa inyo sang una sang mga apostoles sang aton Ginoong Jesu-Cristo. Pero kamo, mga hinigugma ko, patuboa ninyo ang inyo kaugalingon sa inyo pagtuo nga labing balaan. Magpangamuyo kamo sa gahom sang Espiritu Santo, kag tipigi ang inyo kaugalingon sa gugma sang Dios, samtang ginahulat ninyo ang aton Ginoong Jesu-Cristo nga sa iya kaluoy, magahatag sa inyo sing kabuhi nga walay katapusan. Kaluoyi ang mga nagapangduhadoha. Luwasa sila paagi sa pagsabnit sa ila gikan sa kalayo. Kaluoyi man ang iban, pero mag-andam kamo, kag kangil-ari bisan pa ang ila mga bayu nga namansahan sang ila lawasnon nga kailigbon. Sa iya nga makasarang sa pagbantay sa inyo agod nga indi kamo mahulog, kag sa pagdala sa inyo nga wala sing dagta kag malipayon sa iya mahimayaon nga atubangan, sa isa lamang ka Dios nga aton Manlulowas, paagi kay Jesu-Cristo nga aton Ginoo, sa iya ang himaya, pagkahalangdon, gahom kag awtoridad, sa tanan nga nagligad nga mga katuigan, sa karon, kag sa walay katubtoban! Kabay pa.

Salmo sa Pagsabat:

Mga Salmo 63:2, 3-4, 5-6

(S) O Ginoo, nga akon Dios, ang akon kalag ginauhaw sa imo.

O Dios, ikaw ang akon Dios, ginahidlaw ako sa imo. Ang akon bug-os nga kaugalingon nagahandom gid sa imo; kaangay sang kigas, lamgod, kag namalhan nga duta, ang akon kalag ginauhaw sa imo. (S)
Tugoti ako nga makita ko ikaw sa santuaryo, ipakita sa akon ang imo pagkagamhanan kag pagkamahimayaon. Ang imo mapinadayunon nga gugma maayo pa sang sa kabuhi, gani dayawon ko ikaw. (S)
Tubtob nga buhi ako magapasalamat ako sa imo; bayawon ko ang akon mga kamot sa pagpangamuyo sa imo. Ang akon kalag magapaayaw-ayaw kag mabusog, kag magakanta ako sa imo sang masadya nga mga ambahanon  sa pagdayaw. (S)

Aleluya:

Colosas 3:16, 17

Ang pulong ni Cristo sa iya kabuganaan dapat magpuyo sa inyo mga tagipusoon; kag magpasalamat kamo sa Dios nga Amay paagi sa iya. 

Ang Pagbasa sang Santos nga Ebanghelyo suno kay:

San Marcos 11:27-33

Nagbalik sila sa Jerusalem. Kag sang nagalakat si Jesus sa sulod sang templo, ang pangulo nga mga pari kag ang mga manunodlo sang Kasugoan kag ang mga katigulangan sang mga Judio nagpalapit sa iya kag nagpamangkot, “Ano bala ang imo awtoridad sa paghimo sining mga butang, ukon sin-o ang naghatag sa imo sang awtoridad sa paghimo sini?” Si Jesus nagsabat sa ila, “Mamangkot ako sa inyo sing isa lang, sabta anay ninyo ako kag ako man magasugid sa inyo kon sa kay sin-o awtoridad ginahimo ko ining mga butang. Sa diin bala naggikan ang pagbautiso ni Juan: sa Dios ukon sa tawo? Sugiri ninyo ako!” Kag nagbinaisay sila sa ila kaugalingon, “Kon magsiling kita, ‘Gikan sa Dios,’ masiling sia, ‘Ngaa wala kamo magpati kay Juan?’ Pero kon kita magsiling, ‘Gikan sa tawo…’ ” (Nahadlok sila sa mga tawo, kay tanan nagakabig kay Juan nga isa ka propeta.) Gani, nagsabat sila kay Jesus, “Wala kami makahibalo.” Kag si Jesus nagsiling sa ila, “Indi ko man kamo pagsugiran kon sa kay sin-o awtoridad ginahimo ko ini nga mga butang.”

Hunyo 1 | Hunyo 3