Mga Salmo 104

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Sa Pagdayaw sang Manunoga

1 Dayawa ang GINOO, O kalag ko! O GINOO nga akon Dios, daw ano ka gamhanan sa imo! Napanaptan ikaw sang pagkahalangdon kag himaya;
2 ginabayuan mo ang imo kaugalingon sang kapawa. Ginhumlad mo ang mga langit kaangay sang tolda,
3 kag ginpasad mo ang imo puloy-an sa mga tubig sa ibabaw. Ginahimo mo ang mga panganod subong sang imo karuwahi, kag nagalakat ka sa mga pakpak sang hangin.
4 Ginahimo mo ang mga hangin nga imo mga mensahero, kag ang mga idlab sang kilat subong imo mga alagad.
5 Ginpahamtang mo sing malig-on ang duta sa iya mga sadsaran, kag indi gid ini mapahalin sa iya duog.
6 Ginlikupan mo ini sang kadagatan subong sang kunop, kag ang tubig nagtabon sang mga kabukiran.
7 Pero sang pagsabdong mo sang mga tubig, naghawa sila, sang mabatian nila ang imo singgit sang pagmando, nagpalagyo sila sing dalidali.
8 Nagdinaganas sila sa ibabaw sang mga kabukiran padulhog sa mga kapatagan, sa duog nga imo ginhimo para sa ila.
9 Nagbutang ikaw sing dulonan nga indi nila malapawan, agod indi nila matabunan liwat ang duta.
10 Ginpatubod mo ang mga tuboran pakadto sa mga kapatagan, kag nag-ilig ang tubig sa gin-utlan sang mga bakulod.
11 Nagahatag sila sing tubig sa mga kasapatan sa talon; ang talunon nga mga asno nagaumpaw sang ila kauhaw;
12 sa malapit nga mga kakahuyan ang mga pispis nagapugad kag nagaambahan.
13 Halin sa langit nagpadala ka sing ulan sa mga kabukiran, kag ang duta napuno sang imo mga kaayuhan.
14 Ginapatubo mo ang mga hilamon para sa mga kahayupan, kag ang mga tanom para sa tawo, agod makapatubas sia sang iya mga kalan-on,
15 kag bino nga makapasadya sa iya, lana sang olivo nga makapanayanaya sang iya guya, kag kalan-on nga makahatag sa iya sing kusog.
16 Ang mga sedro sang Libano nakaagom sing madamo nga ulan, ang kaugalingon nga mga kakahuyan sang Ginoo nga iya gintanom.
17 Didto ang mga pispis nagapugad; ang mga dugwak nagapugad sa mga kahoy nga abeto.
18 Ang mga kanding nga talunon nagapuyo sa mataas nga mga bukid, kag sa mga pil-as nagapanago ang mga koneho.
19 Gintuga mo ang bulan nga mangintanda sang mga binulan; ang adlaw nakahibalo sang tion sa pagtunod.
20 Ginhimo mo ang kagab-ihon, kag sa kadudolman nagagwa ang tanan nga mga sapat nga talunon.
21 Ang mga tutoy nga leon nagangurob samtang nagaluyong sila, nga nagapangita sang kalan-on nga ginahatag sang Dios sa ila.
22 Sa pagbutlak sang adlaw nagabalik sila kag nagaluko sa ila mga palanaguan.
23 Dayon ang mga tawo nagagwa pakadto sa ila mga obra, kag nagapadayon sila sa pag-obra tubtob sa kahapunanon.
24 Madamo nga mga butang ang imo ginhimo, O GINOO! Daw ano kaalam sang imo paghimo sa ila tanan! Ang duta napuno sang imo mga tinuga.
25 Yara ang kadagatan nga daku kag malapad, sa diin nagapuyo ang di-maisip nga mga tinuga, dalagku kag magamay.
26 Ang mga sakayan nagaagi sa sini, kag ang Balyena nagahampang diri, inang daku nga sapat sa dagat nga imo gintuga.
27 Tanan sila nagasalig sa imo, sa paghatag sa ila sing kalan-on kon ginakinahanglan nila ini.
28 Ginahatag mo ini sa ila, kag sila nagakaon; ginahatagan mo sila sing kalan-on, kag nagakabusog sila.
29 Kon magpalagyo ka, nagakahadlok sila, kon punggan mo ang imo pagginhawa, nagakamatay sila, kag nagabalik sila sa duta nga ila ginhalinan.
30 Pero kon hatagan mo sila sing ginhawa, nagakabuhi sila; ginahatagan mo sang bag-o nga kabuhi ang duta.
31 Kabay nga magpadayon ang himaya sang GINOO sa walay katapusan! Kabay nga magkalipay ang GINOO sa iya mga binuhatan!
32 Ginatulok niya ang duta, kag nagakurog ini; ginatandog niya ang mga bukid, kag nagaaso ini.
33 Magaamba ako sa Ginoo sa bug-os ko nga kabuhi; magakanta ako sing mga pagdayaw sa Dios tubtob nagakabuhi ako.
34 Kabay nga mahamut-an niya ang akon ambahanon, kay ginahatagan niya ako sing kalipay.
35 Kabay nga malaglag ang mga makasasala sa duta; kabay nga ang malaut mawala na! Dayawa ang GINOO, O kalag ko! Dayawa ang GINOO!

Mga Salmo 103 | Mga Salmo 105