Mga Salmo 68

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Pungsodnon nga Ambahanon sang Pagdaog

1 Kabay nga magbangon ang Dios kag magpaalaplaag sang  iya mga kaaway! Kabay nga magpalagyo ang tanan nga nagadumot sa iya!
2 Subong sang pagpalid sang aso, subong man pagatabogon niya sila, subong nga ang kandila nagakatunaw sa kalayo, subong man ang mga malauton nagakawala sa atubangan sang Dios.
3 Pero ang mga matarong magakasadya, kag magahinugyaw sa atubangan sang Dios, magakalipay sila.
4 Mag-amba kamo sa Dios, mag-amba sing mga pagdayaw sa iya ngalan; amana ang dalan para sa iya nga nagasakay sa mga panganod. Ang iya ngalan amo ang Ginoo—magkalipay kamo sa iya atubangan!
5 Ang Dios, nga nagapuyo sa iya balaan nga Templo, nagaatipan sang mga ilo kag nagatatap sang mga balo nga babayi.
6 Nagahatag sia sang puloy-an sa nagaisahanon, kag ginahilway niya kag ginapauswag ang mga binilanggo; pero ang mga rebelde magapuyo sa desierto.
7 O Dios, sang pagtuytoy mo sang imo mga tawo, sang paglatas mo sa desierto,
8 nagtay-og ang duta, kag ang langit nagbubo sang ulan, tungod sang pag-abot sang Dios sang Sinai, ang pag-abot sang Dios sang Israel.
9 Nagpadala ikaw sang bugana ngaulan, kag ginhimo mo nga mapatubason ang lamgod nga duta;
10 didto naghimo sing puloy-an ang imo mga tawo, sa imo kaayo ginhatagan mo ang mga imol sang ila kinahanglanon.
11 Nagsugo ang Ginoo, kag madamo nga mga babayi ang nagdala sini nga balita:
12 "Nagapalagyo ang mga hari kag ang ila mga soldado!” Ang mga babayi sa balay nagpartida sang mga inagaw;
13 kaangay sila sang mga pating nga gindurar sa pilak, nga ang ila mga pakpak nagaidlak sa puraw nga bulawan. (Ngaa bala ang iban sa inyo nagpuyo sa toril sang mga karnero?)
14 Sang ginpaalaplaag sang Makagagahom nga Dios ang mga hari sa bukid sang Salmon, ginpaulan niya ang yelo didto.
15 Daw ano kadaku sang bukid sang Basan, isa ka bukid nga madamo sing putokputokan!
16 Ngaa bala nga gikan sa imo mataas nga mga putokputokan, ginatulok mo nga may paghikay ang bukid nga ginpili sang Dios nga iya pagapuy-an? Didto magapuyo ang Ginoo sa walay katubtoban!
17 Upod sa linibo sang iya madamo nga mga karuwahi ang Ginoo nagakari halin sa Sinai pakadto sa balaan nga duog.
18 Nagapasaka sia sa kahitaasan, dala ang madamo nga mga bihag upod sa iya, nagabaton sia sang mga dulot halin sa mabinatuon nga mga tawo. Ang GINOONG Dios magapuyo didto.
19 Dayawon ang Ginoo, nga nagapas-an sang aton mga kabug-atan adlaw-adlaw, sia amo ang Dios nga nagaluwas sa aton.
20 Ang aton Dios amo ang Dios nga nagaluwas, sia amo ang Ginoo, ang aton Ginoo, nga nagaluwas sa aton sa kamatayon.
21 Pat-od gid nga buk-on sang Dios ang ulo sang iya mga kaaway, sadtong mga nagapadayon sa ila malaut nga mga pagginawi.
22 Nagsiling ang Ginoo, “Pabalikon ko ang imo mga kaaway halin sa Basan, pabalikon ko sila halin sa kadadalman sang dagat,
23 agod nga mag-ubog ikaw sa ila dugo, kag ang imo mga ido makapaayaw sa paglaklak sini.
24 Ang imo pagparada sang pagdaog, O Dios, nakit-an sang tanan, ang prosesyon sang Dios nga akon hari pakadto sa iya santuaryo.
25 Ang mga manugkanta yara sa atubangan, ang mga manugtokar yara sa likod, sa ulot nila ang mga dalaga nga nagatukar sang magamay nga mga tambor.
26 "Dayawa ninyo ang Dios sa katilingban sang iya mga tawo; dayawa ang Ginoo, tanan kamo nga mga kaliwat sang Israel!”
27 Nagapanguna ang pinakadiutay nga tribo ni Benjamin, dayon ang mga pangulo sang Juda kag sang ila hubon, nagasunod sa ila ang mga pangulo sang Zabulon kag Neftali.
28 Ipakita O Dios, ang imo gahom, ang gahom nga imo gingamit tungod sa amon.
29 Gikan sa imo Templo sa Jerusalem, sa diin ang mga hari nagadala sa imo sing mga dulot,
30 sabdunga ang Egipto, inang mabangis nga sapat sa mga katabun-akan; sabdunga man ang mga pungsod, inang manara sang toro nga mga baka upod sang ila mga tinday, tubtob nga magyaub sila tanan kag magdulot sa imo sang ila pilak. Paalaplaaga ang mga tawo nga palaaway!
31 Ang mga embahador magaabot halin sa Egipto; ang mga taga-Etiopia magabayaw sang ila mga kamot sa Dios sa pagpangamuyo.
32 Magkanta kamo sa Dios, mga ginharian sang kalibutan, magkanta kamo sing pagdayaw sa Ginoo,
33 sa iya nga nagapanakayon sa kalangitan, ang dumaan nga kalangitan! Pamati kamo sa iya singgit nga nagadaguob!
34 Ibantala ang gahom sang Dios; ang iya pagkahalangdon yara sa bug-os nga Israel, ang iya gahom yara sa kalangitan.
35 Daw ano ka halangdon ang Dios sa iya balaan nga puloy-an, ang Dios sang Israel! Nagahatag sia sang kusog kag gahom sa iya mga tawo. Dayawon ang Dios!

Mga Salmo 67 | Mga Salmo 69