Mga Salmo 107

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

IKALIMA NGA LIBRO

(Mga Salmo 107-150)

Pagdayaw sa Kaayo sang Dios

1 Magpasalamat sa Ginoo, kay maayo sia, ang iya gugma wala sing katapusan!
2 Buylog kamo sa pagdayaw sa Ginoo, tanan kamo nga iya ginluwas.
3 Ginluwas niya kamo sa inyo mga kaaway, kag gindala kamo pabalik halin sa iban nga mga pungsod, halin sa sidlangan kag nakatundan, halin sa aminhan kag bagatnan.
4 Ang iban nagdalangdalang sa desierto nga wala sing dalan, kag indi sila makatultol sang alagyan pakadto sa isa ka siyudad nga ila pagapuy-an;
5 gingutom kag gin-uhaw sila, kag nadulaan sang tanan nga paglaom.
6 Sa ila kapipit-an nagpanawag sila sa Ginoo, kag ginluwas niya sila sa ila mga kalisdanan.
7 Gintuytoyan niya sila sa matadlong nga dalanon, padulong sa isa ka siyudad nga ila mapuy-an.
8 Dapat sila magpasalamat sa Ginoo tungod sang iya mapinadayunon nga gugma, tungod sang makatilingala nga mga butang nga iya ginhimo sa ila!
9 Ginatablaw niya ang mga ginauhaw, kag ang ginagutom iya ginabusog sang maayo nga mga butang.
10 Ang iban nagakabuhi sa kalisod kag kadudolman, mga binilanggo nga nakadenahan,
11 kay nagpamatok sila sa mga sugo sang Dios nga Makagagahom, kag nagsikway sang iya mga pagtudlo.
12 Nalapyo sila tungod sang mabudlay nga bulohaton, nagakapukan sila, kag wala sing may nagabulig.
13 Sa ila kapipit-an nagpanawag sila sa Ginoo, kag ginluwas niya sila sa ila mga kalisdanan.
14 Ginluwas niya sila sa kalisod kag kadudolman, kag ginpangbugras niya ang ila mga kadena.
15 Dapat sila magpasalamat sa Ginoo tungod sang iya mapinadayunon nga gugma, tungod sang makatilingala nga mga butang nga iya ginhimo sa ila.
16 Ginabungkal niya ang saway nga mga puwertahan, kag ginapangbali niya ang mga rehas nga salsalon.
17 Ang iban masakiton tungod sang ila mga sala, nagaantos tungod sang ila kalautan;
18 nagakangil-ad sila sa pagtan-aw sa pagkaon, kag madali na lang sila mapatay.
19 Sa ila kapipit-an nagpanawag sila sa Ginoo, kag ginluwas niya sila sa ila mga kalisdanan.
20 Gin-ayo niya sila paagi sa iya mando, kag ginluwas niya sila sa lulobngan.
21 Dapat sila magpasalamat sa Ginoo tungod sang iya mapinadayunon nga gugma, tungod sang makatilingala nga mga butang nga iya ginhimo sa ila.
22 Dapat sila magpasalamat sa iya paagi sa mga halad, kag paagi sa mga ambahanon sang kalipay magsugid sila sang iya ginhimo!
23 Ang iban nagpanakayon sa mga bapor sa kadagatan, nga nagakuha sang ila pangabuhiwan sa kalalawran;
24 nakita nila ang ginhimo sang Ginoo, ang iya makatilingala nga mga buhat sa kadagatan.
25 Sa iya mando ang isa ka mabaskog nga hangin naghuyop kag nag-ukay sang mga balod.
26 Ang mga sakayan gin-alsa sing mataas sa kahanginan kag ginhaboy pa-kadadalman, sa amo nga katalagman, ang mga tawo nadulaan sing kaisog;
27 nagdulingdoling sila kag nagkalapukan kaangay sang hubog nga mga tawo; ang tanan nila nga kinaadman nanginwalay pulos.
28 Sa ila kapipit-an nagpanawag sila sa Ginoo, kag ginluwas niya sila sa ila mga kalisdanan.
29 Ginpauntat niya ang bagyo, kag naglinong ang mga balod.
30 Nagkalipay sila tungod sang kalinaw, kag gindala niya sila nga wala maano sa dulongkaan nga luyag nila.
31 Dapat sila magpasalamat sa Ginoo tungod sang iya mapinadayunon nga gugma, tungod sang makatilingala nga mga butang nga iya ginhimo para sa ila.
32 Dapat nila ibantala ang iya pagkagamhanan sa katilingban sang mga tawo, kag dayawon nila sia sa atubangan sang konsilyo sang mga katigulangan.
33 Ang Ginoo nagpamala gid sang mga suba, kag ginpauntat ang pagtubod sang mga tuboran.
34 Ginhimo niya ang mapatubasan nga duta nga mangindesierto nga maasin, tungod sang kalautan sang mga nagapuyo didto.
35 Ginhimo niya ang mga desierto nga manginpunong sang tubig, kag ang mamala nga duta nga mangintuboran nga nagailig.
36 Ginpapuyo niya didto ang ginagutom nga mga tawo, kag naghimo sila sing siyudad nga pagapuy-an,
37 ginsab-ugan nila ang mga uma kag nagtanom sila sing mga ubas, nga nagpatubas sing bugana.
38 Ginbendisyunan niya ang iya mga tawo kag may madamo sila nga mga kaanakan, kag wala niya pagtugoti nga mabuhinan ang ila mga kahayupan.
39 Sang malutos kag mapakahuy-an ang mga tawo sang Dios, tungod sang mapintas nga pagpigos kag pag-antos,
40 ginpakita niya ang iya pagtamay sa ila mga manugpigos, kag iya sila ginpadalangdalang sa mga desierto nga wala sing dalan.
41 Pero iya ginatabangan ang nawad-an sa ila kapiutan, kag iya ginpamuad ang ila mga panimalay kaangay sang mga panong.
42 Ang mga matarong nakakita sini kag nagakasadya, pero ang tanan nga mga malaut ginapahipos.
43 Kabay nga ang mga maalam magpamalandong sini nga mga butang; kabay nga ila kilalahon ang mapinadayunon nga gugma sang Ginoo.

Mga Salmo 106 | Mga Salmo 108