"Sa Ngalan sang Amay kag sang Anak kag sang Espiritu Santo"

Balasahon Subong nga Adlaw

(Domingo, Mayo 27, 2018)

Nahauna nga Balasahon:

Deuteronomio 4:32-34, 39-40

“Usisaa ang nagligad, sadtong panahon nga wala pa kamo matawo, halin sang pagtuga sang Dios sang tawo sa duta. Usisaa ang bug-os nga duta. May natabo bala halin sang una nga pareho sini ka daku? May nakabati bala sang isa ka butang nga pareho sini. May yara bala nga mga tawo nga nabuhi pa sa tapos nila mabatian ang Dios nga naghambal gikan sa kalayo pareho sang nabatian ninyo? May isa bala ka dios nga nangahas sa pagkuha sang isa ka grupo sang mga tawo gikan sa isa ka pungsod kag himuon niya nga iya kaugalingon nga mga tawo subong sang ginhimo sa inyo sang GINOO nga inyo Dios didto sa Egipto? Sa inyo gid atubangan gingamit niya ang iya daku nga gahom kag kusog kag nagdala sing mga kalalat-an kag inaway, naghimo sang mga milagro kag mga katilingalahan, kag naghimo sing makahaladlok nga mga butang. Gani karon, dumdoma ninyo karon nga adlaw kag indi pagkalimti subong kag itanom sa inyo tagipusuon nga ang GINOO, Dios sa langit kag sa duta. Wala na sing iban nga dios. Tumana ninyo ang tanan niya nga mga kasugoan nga akon ginahatag sa inyo karon nga adlaw, dayon ang tanan manginmaayo para sa inyo kag sa inyo mga kaliwat. Magapadayon kamo sa pagpuyo sa duta nga ginahatag sa inyo sang GINOO nga inyo Dios nga mangin-inyo sa wala sing katapusan.”

Salmo sa Pagsabat:

Mga Salmo 33:4-5, 6, 9, 18-19, 20, 22

Ang mga pulong sang GINOO matuod, kag ang tanan niya nga mga binuhatan masaligan. Ang GINOO nagahigugma sang matarong kag nagakabagay, ang iya mapinadayunan nga gugma nagapuno sang duta. Gintuga sang GINOO ang kalangitan sa iya pagmando, ang adlaw, bulan, kag kabituonan sa iya pulong. Sang paghambal niya, ang kalibutan natuga; sang pagmando niya, ang tanan nagtuhaw. Ang GINOO nagabantay sa mga nagakahadlok sa iya, sa mga nagasalig sa iya mapinadayunon nga gugma. Ginaluwas niya sila sa kamatayon; ginabuhi niya sila sa tion sang tiggulotom. Ang aton paglaom yara sa GINOO; sia ang aton manugbulig kag mangangapin. Kabay nga ang imo mapinadayunon nga gugma magpabilin sa amon, O GINOO, kay ang amon paglaom yara sa imo.

Ikaduha nga Balasahon:

Roma 8:14-17

Ang mga ginatuytoyan sang Espiritu sang Dios mga anak sang Dios. Kay ang Espiritu nga ginhatag sang Dios sa inyo wala nagahimo sa inyo nga ulipon ukon nagapahadlok pa sa inyo, kundi iya kamo ginahimo nga mga anak sang Dios, kag paagi sa gahom sang Espiritu nagapanawag kita sa Dios, “O Amay, Amay ko!” Ang Espiritu sang Dios nagabuylog sa aton espiritu sa pagpamatuod nga kita mga anak sang Dios. Tungod kay mga anak kita sang Dios, mga manunobli kita sang mga kaayuhan nga ginatigana niya para sa iya mga tawo, kag mga manunobli man kita upod kay Cristo sang gintigana sang Dios para sa iya. Kay kon nagaambit kita sang iya mga pag-antos, magaambit man kita sang iya himaya.

Aleluya:

Bugna 1:8

Ang Ginoong Dios nga Makagagahom, nga amo karon, amo man anay, kag amo man ang magakari nagasiling, “Ako amo ang Alpha kag ang Omega.” 

Ebanghelyo Subong nga Adlaw:

Mateo 28:16-20

Ang onse ka mga gintuton-an nagkadto sa isa ka bakulod sa Galilea, sa diin si Jesus nagsiling nga magkadto sila. Sang makita nila sia, nagsimba sila sa iya, bisan pa ang iban sa ila nagpangduhadoha. Nagpalapit si Jesus sa ila kag nagsiling, “Ang bug-os nga awtoridad sa langit kag sa duta ginhatag sa akon. Gani, kadtoi ninyo ang tanan nga mga tawo sa bug-os nga kalibutan kag himoa sila nga mga gintuton-an ko. Bautisohi ninyo sila sa ngalan sang Amay kag sang Anak kag sang Espiritu Santo, kag tudloi ninyo sila sa pagtuman sang tanan nga ginsugo ko sa inyo. Kag dumdoma gid ninyo ini! Magaupod ako sa inyo sa gihapon tubtob sa katapusan sang panahon.”

Mayo 26 | Mayo 28