Balasahon Subong nga Adlaw
(Domingo, February 11, 2018)
Nahauna nga Balasahon:
Levitico 13:1-2, 44-46
Ang GINOO naghatag kay Moises kag kay Aaron sini nga mga pagsulondan. Ang bisan sin-o nga may katol sa panit, isa ka hubag ukon pagpalanghabal nga mahimo nga isa ka balatian nga makalalaton, pagadalhon sia sa pari nga kaliwat ni Aaron. Ang pari magalawag nga di-matinlo sia, tungod sang makalalaton nga balatian sa iya ulo. Ang tawo nga may makalalaton nga balatian sa panit magsuksok sang gisi nga mga bayu, kag pabay-an niya ang iya buhok nga wala mahusay, tabunan niya ang iya guya halin sa baba paidalom, kag magsinggit, “Di-matinlo ako, di-matinlo ako!” Magapabilin sia nga di-matinlo tubtob nga wala pa sia mag-ayo sa iya balatian kag kinahanglan magpuyo sia sa gwa sang kampamento nga malayo sa iban nga mga tawo.
Salmo sa Pagsabat:
Mga Salmo 32:1-2, 5, 11
Bulahan ang tawo nga ang iya mga sala ginpatawad, nga ang iya mga paglapas ginpanas. Bulahan ang tawo nga wala ginasumbong sang GINOO nga nakahimo sing malaut nga binuhatan, nga hilway sa tanan nga paglimbong. Dayon ginkilala ko ang akon mga sala sa imo, wala ko gintago ang akon mga kasaypanan. Nagtapat ako sa pagtuad sang akon mga sala sa imo, kag ginpatawad mo ang akon mga paglapas. Tanan kamo nga mga matarong, magkalipay kag maghinugyaw, tungod sang mga binuhatan sang GINOO! Tanan kamo nga nagatuman sa iya, magsinggit sa kalipay!
Ebanghelyo Subong nga Adlaw:
Marcos 1:40-45
May isa ka aruon nga nagpalapit kay Jesus, nagluhod sa iya atubangan kag nagpangayo sing bulig. Siling niya: “Kon gusto mo, sarang mo ako maayo.” Si Jesus nagbatyag sing daku nga kaluoy, nagdab-ot sa iya, kag gintandog sia. Nagsabat sia sa iya, “Gusto ko! Mag-ayo ka!” Sa gilayon wala na ang iya aro kag nagtinlo ang iya panit. Ginpaandaman gid sia dayon ni Jesus kag ginpalakat gilayon. Siling ni Jesus: “Tandai, indi mo ini pag-isugid bisan kay sin-o kundi magkadto ka sa pari kag magpatan-aw ka sa iya. Magdulot ka dayon sing halad suno sa sugo ni Moises, sa pagpamatuod sa tanan nga ikaw nag-ayo na.” Pero naglakat ang tawo kag ginpanugid niya ang pag-ayo sa iya bisan diin sia magkadto. Madamo gid ang iya ginsugiran, sa bagay nga si Jesus indi na makasulod sing dayag sa bisan diin nga banwa. Gani nagtener sia sa baw-ing nga mga lugar, pero padayon gihapon ang pagkadto sang mga tawo sa iya halin sa nagakalainlain nga mga lugar.
Ikaduwa nga Balasahon:
1 Corinto 10:31-11:1
Kon amo ina, bisan nagakaon ukon nagainom kamo, ukon ano man ang inyo ginahimo, himoa ini tanan para sa himaya sang Dios. Magkabuhi kamo sa bagay nga indi kamo manginkasablagan sa mga Judio ukon sa mga Gentil ukon sa iglesia sang Dios. Sunda lang bala ninyo ang ginahimo ko. Sa akon ginahimo nagatinguha ako sa paglipay sang tanan, kag wala ako nagapangita sang akon kaayuhan, kundi sang kaayuhan sang tanan, agod nga maluwas sila. Iluga ninyo ako subong nga ako nagailog kay Cristo.
No comments:
Post a Comment