Ang Maayong Balita ni Jesu-Cristo suno kay JUAN
Panguna
Ang Maayong Balita ni Jesu-Cristo suno kay Juan nagapakilala kay Jesus subong nga walay katubtoban nga Pulong sang Dios nga “Nangintawo kag nagpuyo sa tunga naton.” Subong sang ginasiling mismo sini nga libro, ining Maayong Balita ginsulat agod ang bumalasa sini magtuo nga si Jesus amo ang ginsaad nga Manlulowas, ang Anak sang Dios, kag paagi sa ila pagtuo sa iya magaagom sila sing kabuhi (20:31).
Sa tapos ang pagpakilala nga ang walay katubtoban nga Pulong sang Dios amo si Jesus, ang nahauna nga bahin sang Maayong Balita nagapahayag sang mga milagro nga nagapakita nga si Jesus amo ang ginsaad nga Manlulowas, ang Anak sang Dios. Ang masunod sini amo ang mga panaysayon sang ginpahayag sang mga milagro. Ini nga bahin sang libro nagasugid kon paano ang pila ka mga tawo nagtuo kay Jesus kag nanginsumolunod niya, samtang ang iban nagpamatok sa iya kag indi magtuo. Diri sa kapitulo 13-17 nabutang ang mahirop nga kaangtanan ni Jesus sa iya mga gintuton-an sa gab-i nga gindakop sia, kag ang iya mga pulong sa paghanda kag pagpabakod sa ila sina nga gab-i antes sang paglansang sa iya. Ang mga kapitulo sa katapusan nagasugid sang pagdakop kag paghukom kay Jesus, ang paglansang kag pagkabanhaw niya, kag ang mga pagpakita niya sa iya mga gintuton-an sa tapos ang iya pagkabanhaw.
Ang hitabo nahanungod sa babayi nga nadakpan nga nagapanginlalaki (8:1-11) ginabutang sa braket [ ] kay ang iban nga dumaan nga mga kasulatan wala nagalakip sini, kag ang iban nagabutang sini sa iban nga bahin.
Ang Juan nagapatalupangod gid sang dulot sang kabuhi nga walay katapusan paagi kay Cristo. Ini nga dulot nagasugod karon kag maangkon ini nila nga nagabaton kay Jesus nga amo ang dalan, ang kamatuoran, kag ang kabuhi. Ang isa ka pinasahi nga bagay sa Juan amo ang paggamit sang ordinaryo nga mga butang sa adlaw-adlaw nga pagkabuhi sa pagtudlo sang espirituhanon nga mga kamatuoran, pareho abi sang tubig, tinapay, kapawa, ang manugbantay kag ang karnero, kag ang balagon sang ubas kag ang iya bunga.
Balayan sang Kaundan
Panguna 1:1-18
Si Juan Bautista kag ang nahauna nga mga gintuton-an ni Jesus 1:19-51
Ang pag-alagad ni Jesus sa mga katawuhan 2:1-12:50
Ang katapusan nga mga inadlaw sa Jerusalem kag sa kaingod nga mga duog 13:1-19:42
Ang pagkabanhaw kag mga pagpakita sang Ginoo 20:1-31
No comments:
Post a Comment