"Ang Nagabuhat sang Luyag sang Dios Amo ang Akon Utod nga Lalaki, kag Utod nga Babayi, kag Iloy"

Liturhiya sang Pulong

(Domingo, Hunyo 10, 2018)

1. Ang Pagbasa gikan sa Libro sang:

Genesis 3:9-15

Pero gintawag sang GINOONG Dios ang lalaki, “Diin ka?” Ang lalaki nagsabat, “Nabatian ko ikaw sa katamnan. Nahadlok ako kag nagpanago ako sa imo kay hubo ako.” Ang Dios nagpamangkot, “Sin-o ang nagsiling sa imo nga hubo ka? Nagkaon ka bala sang bunga sang kahoy nga ginsiling ko sa inyo nga indi ninyo pagkaunon?” Ang lalaki nagsabat, “Ang babayi nga ginhimo mo para sa akon amo ang naghatag sa akon sang bunga sang kahoy kag nagkaon ako.” Ginpamangkot sang GINOONG Dios ang babayi, “Ngaa bala ginhimo mo ini?” Nagsabat sia, “Ang man-og nagganyat sa akon sa pagkaon sadto.” Karon ang GINOONG Dios nagsiling sa man-og, “Pagasilutan ka tungod sini. Ikaw lamang sa tanan nga mga sapat ang magaantos sini nga silot. Sugod karon magasaog ka sa imo tiyan, kag yab-ok ang imo pagakaunon samtang nagakabuhi ka. Ikaw kag ang babayi magadumtanay. Ang mga tawo kag ang mga man-og manginkaaway sa wala sing katubtoban. Ang mga tawo magadugmok sang imo ulo, kag magabuntog ka sang ila mga tikod.”

Salmo sa Pagsabat:

Mga Salmo 130:1-2, 3-4, 5-6, 7-8

(S) Ang Ginoo mainawaon kag maalwan sia sa pagluwas.

Nadulaan ako sing paglaom, gani nagapanawag ako sa imo, O GINOO. Pamatii ang akon pagpanawag, O GINOO, talupangda ang akon pagpangayo sing bulig! (S)
Kon ginalista mo ang amon mga sala, sin-o bala ang makalikaw sang pagsilot? Pero ikaw nagapatawad sa amon, agod nga magtahod kami sa imo. (S)
Nalangkag gid ako sa pagpaabot sang bulig sang GINOO, kag sa iya mga pulong nagasalig ako. Nagapaabot ako sa GINOO, nga may labi pa nga kalangkag sang sa pagpaabot sang mga manugbantay sang kaagahon. (S)
O Israel, magsalig ka sa GINOO, kay ang iya gugma nagapadayon, kag handa sia magluwas sa gihapon. Luwason niya ang iya mga tawo nga Israel sa tanan nila nga mga sala. (S)

2. Ang Pagbasa gikan sa Ikaduha nga Sulat ni San Pablo nga Apostol, sa mga:

Taga-Corinto 4:13-5:1

Ang kasulatan nagasiling, “Naghambal ako kay nagtuo ako.” Sa amo man nga espiritu sang pagtuo, nagahambal man kami kay nagatuo kami. Kay nakahibalo kami nga ang Dios, nga nagbanhaw kay Ginoong Jesus, magabanhaw man sa amon upod kay Jesus kag magadala sa amon upod sa inyo sa iya atubangan. Ini tanan para sa inyo, kag sa nagadamo kag nagadamo ang mga tawo nga ginalambot sang grasya sang Dios, magadamo pa gid ang ila pagpangamuyo sang pagpasalamat, sa himaya sang Dios. Tungod sini wala kami nagapakaluya. Bisan pa nga ang amon lawas nagaamat-amat kadunot, pero ang amon espiritu ginabag-o adlaw-adlaw. Kag ining diutay kag umalagi nga kabudlayan nga ginaantos namon magahatag sa amon sing tama ka daku kag mapinadayunon nga himaya, nga mas labi pa sa kabudlayan. Kay ginabug-os namon ang amon pagtamod, indi sa mga butang nga makita, kundi sa mga butang nga indi makita. Kay ang makita umalagi lang, pero ang indi makita wala sing katapusan. Kay nakahibalo kita nga kon mabungkag ining tolda nga aton ginapuy-an—ang aton dutan-on nga lawas—may gin-aman ang Dios nga balay didto sa langit nga aton pagapuy-an, isa ka balay nga wala sing katapusan nga sia gid ang naghimo.

Aleluya:

Juan 12:31-32

Karon ang nagagahom sining kalibutan pagadag-on; kon ako mabayaw na gikan sa duta, buyokon ko ang tanan nga mga tawo sa akon.

Ang Pagbasa sang Santos nga Ebanghelyo suno kay:

San Marcos 3:20-35

Dayon si Jesus nagpauli. Sa liwat nagdulogok sa iya ang madamo nga mga tawo sa bagay nga sia kag ang iya mga gintuton-an wala na sing tion sa pagkaon. Sang mabatian ini sang iya pamilya, naglakat sila sa pagkuha sa iya, tungod kay ang mga tawo nagsiling, “Nagbuang sia!” May mga manunodlo sang Kasugoan nga nag-abot gikan sa Jerusalem nga nagsiling, “Yara sa iya si Beelzebul!” Ang iban nagsiling, “Ang pangulo sang mga demonyo amo ang naghatag sa iya sing gahom sa pagtabog sa ila.” Gani gintawag ni Jesus ang mga tawo sa pagpalapit sa iya kag naghambal sia sa ila sing pila ka mga palaanggiran, “Ano bala ang pagtabog ni Satanas kay Satanas? Kon ang isa ka pungsod magbinahinbahinay kag mag-ilinaway, ina nga pungsod magabuloblag. Kon ang isa ka panimalay magbinahinbahinay kag mag-ilinaway, ina nga panimalay magabuloblag. Gani, kon ang ginharian ni Satanas mag-ilinaway, magbinahinbahinay, ina nga ginharian indi magdugay, kundi magabuloblag, kag amo ini ang iya katapusan. “Wala sing bisan sin-o nga makasulod sa balay sang isa ka tawo nga makusog sa pagkuha sang iya pagkabutang, luas kon iya anay gapuson ang tawo nga makusog. Kon mahimo na niya ini sarang na sia makapanguha sa amo nga balay. “Dumdoma ninyo ini! Ang mga tawo sarang mapatawad sang tanan nila nga mga sala kag sang tanan nga mga malain nga ila ginhambal, pero ang tawo nga nagahambal sing malain batok sa Espiritu Santo, indi gid mapatawad, kay sia nakahimo sing sala nga wala sing katapusan.” (Ginhambal ini ni Jesus, kay may iban nga nagsiling, “May malaut nga espiritu sa iya.”) Dayon ang iloy kag ang mga utod nga lalaki ni Jesus nag-abot. Nagtindog lang sila sa gwa sang balay kag nagpahibalo nga gusto sila magpakigkita kay Jesus. May madamo nga mga tawo nga nagalingkod sa palibot ni Jesus, kag nagsiling sila sa iya, “Hoy, ang iloy mo kag ang imo mga utod yara sa gwa, kag gusto sila magpakigkita sa imo.” Nagsabat si Jesus, “Sin-o bala ang akon iloy? Sin-o bala ang akon mga utod?” Gintulok niya ang mga tawo nga nagalingkod sa palibot niya, kag nagsiling, “Tan-awa ninyo, yari ang akon iloy kag mga utod! Kay ang nagabuhat sang luyag sang Dios, amo ang akon utod nga lalaki, ang akon utod nga babayi, kag ang akon iloy.”

Hunyo 9 | Hunyo 11