1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150
☆☆☆
Pangamuyo sang Pagsalig sa Dios
1 Nagadangop ako sa imo, O GINOO, agod apinan mo ako; indi pag-itugot nga malutos ako. Ikaw ang Dios nga matarong; ginaampo ko, luwasa man ako!2 Pamatii ako! Karon gid luwasa ako! Ikaw ang akon dalangpan nga magaapin sa akon, ang akon mangangapin nga magaluwas sa akon.
3 Tungod kay Ikaw ang akon dalangpan kag mangangapin, ubayi kag tuytoyi ako suno sa imo ginsaad.
4 Ilikaw ako sa siod nga ila ginbutang para sa akon; ikaw ang akon dalangpan.
5 Sa imo mga kamot ginatugyan ko ang akon kaugalingon, Ikaw, O GINOO, ang magaluwas sa akon; Dios ikaw nga masaligan.
6 Ginadumtan mo ang nagasimba sa di-matuod nga mga dios, pero ako akon nagasalig sa imo.
7 Tungod sang imo mapinadayunon nga gugma, magakalipay ako kag magakasadya. Nakita mo ang akon mga pag-antos; nahibaluan mo ang akon mga palaligban.
8 Wala mo ako ginpadakop sa akon mga kaaway; ginbantayan mo ako nga indi maano.
9 Kaluoyi ako, O GINOO, kay yara ako sa kalisod; sa tuman nga paghibi nagpalangharok ang akon mga mata; lata gid ang akon kaluwasan!
10 Ang kalisod nagpalip-ot sang akon kabuhi, nabuhinan ang akon mga tinuig tungod sang paghinibi. Maluya ako tungod sang tanan ko nga mga kalisdanan; nagakamudmod na ang akon mga tul-an.
11 Ginayaguta ako sang tanan ko nga mga kaaway; ginapakahuy-an ako sang akon mga kaingod, ang mga nakakilala sa akon nahadlok sa akon, kon makita nila ako sa dalan, nagapalagyo sila.
12 Ginakalimtan ako sang tanan, nga daw napatay ako; kaangay ako sang butang nga ila ginsikway.
13 Mabatian ko ang paghinutikay sang madamo nga mga kaaway; ang kahadlok nagalibot sa akon! Nagahimbon sila batok sa akon, nga nagapadihot sa pagpatay sa akon.
14 Pero nagasalig ako sa imo, O GINOO; ikaw ang akon Dios.
15 Yara ako sa gihapon sa imo mga kamot; luwasa ako sa akon mga kaaway kag sa mga nagahingabot sa akon.
16 Ako imo alagad; ipakita ang imo kaayo sa akon, luwasa ako tungod sang imo mapinadayunon nga gugma!
17 Nagapanawag ako sa imo, O GINOO; indi pag-itugot nga malutos ako! Kabay nga malutos ang mga malaut, kag kabay nga maghipos sila didto sa kalibutan sang mga patay.
18 Pahipusa ang mga butigon, ang tanan nga mga hambog kag bugalon, nga nagatamay sang mga tawo nga matarong!
19 Daw ano ka makatilingala ang maayo nga mga butang nga imo ginatigana sa mga nagakahadlok sa imo! Daw ano ka makatilingala ang ginahimo mo sa atubangan sang tanan nga mga tawo, nga nagaapin sa mga nagasalig sa imo.
20 Ginatipigan mo sila nga indi maano sa imo atubangan gikan sa mga paghimbon sang mga tawo; ginatago mo sila agod indi maano sa mga pagpasipala sang ila nga mga kaaway.
21 Dayawa ninyo ang GINOO! Daw ano ka makatilingala ang pagpakita niya sang iya gugma sa akon, sang ginkibon ako kag ginsalakay!
22 Hinadlukan gid ako kag naghunahona nga gintabog mo na ako sa imo atubangan. Pero ginpamatian mo ang akon pagpanawag, sang pagpangayo ko sa imo sang bulig.
23 Higugmaa ninyo ang GINOO, tanan kamo nga mga matutom! Ang mga matutom ginaapinan sang GINOO, pero ang mga bugalon iya ginasilutan sing tama gid.
24 Magpakalig-on kamo, kag magpakaisog, tanan kamo nga nagalaom sa GINOO!
No comments:
Post a Comment