Mga Salmo 106

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Ang Kaayo sang GINOO sa Iya mga Tawo

1 Dayawa ang GINOO! Magpasalamat kamo sa GINOO, kay maayo sia, ang iya paghigugma wala sing katapusan.
2 Sin-o bala ang makasugid sang gamhanan nga mga buhat sang GINOO? Sin-o bala ang makadayaw sa iya sing tuman?
3 Bulahan ang mga nagatuman sang iya sugo, nga nagahimo sing matarong sa tanan nga tion!
4 Dumdoma ako, O GINOO, kon ikaw magbulig sa imo mga tawo, indi ako pagkalimti kon ikaw magluwas sa ila.
5 Ipakita man sa akon ang pag-uswag sang imo mga tawo, kag  paambita man ako sang kalipay sang imo pungsod, sa malipayon nga pagpabugal sang imo mga tawo.
6 Nakasala kami subong sang amon mga katigulangan; nanginmalaut kag malain kami.
7 Ang amon mga katigulangan sa Egipto wala makahangop sang makatilingala nga mga buhat sang Dios, wala sila makadumdom sang madamo nga mga tion nga ginpakita sang Dios ang iya paghigugma sa ila, kag ginpamatukan nila ang Makagagahom, didto sa Mapula nga Dagat.
8 Pero ginluwas niya sila suno sa iya ginsaad, sa pagpakita sang iya daku nga gahom.
9 Ginmanduan niya ang Mapula nga Dagat, kag nagmala ini, kag ginpangulohan niya ang iya mga tawo sa pagtabok subong sang sa mamala nga duta.
10 Ginluwas niya sila sa mga nagdumot sa ila; gintabangan niya sila sa ila mga kaaway.
11 Ang tubig naglumos sang ila mga kaaway; wala sing nabilin bisan isa sa ila.
12 Dayon ang iya mga tawo nagtuo sa iya mga saad, kag nagkanta sila sing pagdayaw sa iya.
13 Apang madali nga nalimtan nila ang ginhimo sang Dios, kag wala sila maghulat sang iya laygay.
14 Napun-an sila sing kailigbon sa desierto, kag gintilawan nila ang Dios;
15 gani ginhatag niya sa ila ang ila ginpangayo, pero ginpadalhan niya sila sing makangilidlis nga balatian.
16 Didto sa desierto nahisa sila kay Moises kag kay Aaron, ang balaan nga alagad sang Dios;
17 dayon nagbuka ang duta kag naglamon kay Datan, kag naglubong kay Abiram kag sang iya panimalay;
18 nahulog ang kalayo sa ila mga sumolunod, kag ginsunog yadtong malaut nga mga tawo.
19 Naghimo sila sing tinday nga baka nga bulawan sa Horeb, kag ginsimba nila ini;
20 ginbayluhan nila ang himaya sang Dios, sang larawan sang isa ka sapat nga nagahalab sang hilamon.
21 Nalimtan nila ang Dios nga nagluwas sa ila, paagi sa iya gamhanan nga mga buhat didto sa Egipto.
22 Daw ano ka makatilingala ang mga ginhimo niya didto! Daw ano ka makahalangawa ang mga ginhimo niya didto sa Mapula nga Dagat!
23 Gani nagsiling ang Dios nga iya laglagon ang iya mga tawo; pero si Moises nga iya pinili nga alagad nagpakiluoy sa Dios, sa paglupay sang kaakig sang Dios, agod indi sila malaglag.
24 Dayon ginhikayan nila ang maayo nga duta, kay wala sila magtuo sa saad sang Dios.
25 Nagpabilin sila sa ila mga tolda kag nagreklamo, kag indi sila magpamati sa Ginoo.
26 Gani nagpanumpa sia sa ila nga pamatyon niya sila sa desierto,
27 kag paalaplaagon niya ang ila mga kaliwat sa mga kapungsoran, kag magakalamatay sila sa iban nga mga pungsod.
28 Dayon ang mga tawo sang Dios nagbuylog sa pagsimba kay Baal sa Peor, kag nagkaon sang mga halad nga gindulot sa patay nga mga dios.
29 Ginpaakig nila ang Ginoo tungod sang ila mga ginhimo, kag ang makangilidlis nga balatian nag-abot sa ila;
30 pero nagtindog si Finees, kag ginsilutan ang mga nakasala, kag ang kalalat-an nag-untat,
31 kag halin sadto gindumdom ini tungod sang iya kaayo, kag indi gid ini malimtan sa tanan nga panahon nga palaabuton.
32 Ang Ginoo ginpaakig sang iya mga tawo didto sa mga tuboran sang Meriba, kag si Moises ginbudlayan tungod sa ila.
33 Ginpaakig gid nila si Moises, sa bagay nga naghambal sia sang mga butang nga indi niya dapat ihambal.
34 Wala nila pagpamatya ang mga pagano, suno sa ginsugo sang Ginoo,
35 kundi nag-alasawahay sila sang mga pagano, kag nagsunod sang ila nga mga pagginawi.
36 Ang mga tawo sang Dios nagsimba sa mga diosdios, kag amo ini ang kabangdanan sang ila pagkalaglag.
37 Ginhalad nila ang ila kaugalingon nga anak nga mga lalaki kag mga babayi subong mga halad sa mga dios nga pagano.
38 Ginpamatay nila ining wala sing sala nga mga tawo, ang ila kaugalingon nga mga anak nga lalaki kag babayi, subong halad sa mga diosdios sang Canaan, ang duta nadagtaan tungod sining mga pagpamatay.
39 Gindagtaan nila ang ila mga kaugalingon paagi sa ila mga ginbuhat, kag nangindi-matutom sila sa Dios.
40 Gani ang GINOO naakig sa iya mga tawo; kag naglain gid ang iya buot sa ila.
41 Gintugyan niya sila sa gahom sang mga pagano, kag ang ila mga kaaway naggahom sa ila.
42 Ginpigos sila sang ila mga kaaway, kag gin-ulipon gid sila.
43 Makapila luwason sang Ginoo ang iya mga tawo, pero ginhungod gid nila ang pagpamatok sa iya, kag nadalman pa gid sila sa ila mga sala.
44 Wala sapayan ang Ginoo nagpamati sa ila pagpanawag, kag nagtalupangod sang ila mga pag-antos.
45 Tungod sa ila gindumdom niya ang iya kasugtanan, kag tungod sang iya daku nga gugma nagbaylo ang iya hunahona.
46 Ginbuot niya nga kaluoyan sila sang mga nagbihag sa ila.
47 Luwasa kami, O Ginoo nga amon Dios, kag pabalika kami halin sa mga kapungsoran, agod magdayaw kami sang imo balaan nga ngalan, kag magkalipay sa pagpasalamat sa imo.
48 Dayawon ta ang Ginoo, ang Dios sang Israel, dayawon sia karon kag sa gihapon! Ang tanan nga mga tawo magsiling, "Kabay pa!" Dayawa ang Ginoo!

Mga Salmo 105 | Mga Salmo 107