Mga Salmo 103

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Ang Gugma sang Dios

1 Dayawa ang GINOO, O kalag ko! Dayawa ang iya balaan nga ngalan, bug-os ko nga tagipusoon!
2 Dayawa ang GINOO, O kalag ko, kag indi pagkalimti kon daw ano ang iya kaayo.
3 Ginapatawad niya ang tanan ko nga mga sala kag ginaayo niya ang tanan ko nga mga balatian;
4 ginaluwas niya ako sa lulobngan kag ginalikupan niya ako sang gugma kag kaluoy;
5 ginapuno niya ang akon kabuhi sang maayo nga mga butang, agod magpabilin ako nga pamatan-on kag makusog subong sang agila.
6 Ang GINOO nagahukom sa pag-apin sa mga ginapigos kag nagahatag sa ila sang ila mga kinamatarong.
7 Ginsugid niya ang iya mga plano kay Moises kag ginpakita niya sa mga tawo sang Israel ang iya gamhanan nga mga buhat.
8 Ang GINOO maluloy-on kag mahigugmaon, indi dali mangakig, kag puno sing mapinadayunon nga gugma.
9 Wala sia nagasabdong sing dalayon; ang iya pagpangakig wala nagapadayon.
10 Ang iya silot kulang pa sang nagakabagay sa aton, ukon nagabalos sa aton tungod sang aton mga sala kag kasaypanan.
11 Subong sang kataas sang langit sa ibabaw sang duta, amo man kadaku ang iya paghigugma sa mga nagatahod sa iya.
12 Subong sang kalayo sang sidlangan sa nakatundan, amo man kalayo ang iya pagpahilayo sang aton mga sala sa aton.
13 Subong nga ang amay maluloy-on sa iya mga kaanakan, amo man ang GINOO maluloy-on sa mga nagatahod sa iya.
14 Nakahibalo sia kon sa ano kita nahimo ginadumdom niya nga kita yab-ok.
15 Nahanungod sa tawo, ang iya kabuhi kaangay sang hilamon; nagatubo kag nagalambo sia subong sang bulak sa latagon.
16 Dayon ginahuyop ini sang hangin, kag mawala, kag wala na sing may makakita sa iya liwat.

Ginahuyop ini sang hangin, kag mawala. (103:16)

17 Pero ang gugma sang Ginoo sa mga nagapadungog sa iya wala sing katapusan, kag ang iya kaayo nagapadayon sa tanan nga mga kaliwatan,
18 sa mga nagatuman sang iya kasugtanan, kag nagabantay sing matutom sang iya mga sugo.
19 Ang GINOO nagpahamtang sang iya trono sa langit; hari sia sa tanan.
20 Dayawa ninyo ang GINOO, kamo nga makusog kag gamhanan nga mga anghel, nga nagatuman sang iya mga sugo, nga nagapamati sang iya mga ginasiling!
21 Dayawa ninyo ang GINOO, tanan kamo nga gamhanan sa langit, kamo nga mga alagad niya nga nagatuman sang iya naluyagan!
22 Dayawa ninyo ang Ginoo, tanan kamo nga iya mga tinuga, sa tagsa ka duog nga iya ginagamhan!Dayawa ang Ginoo, O kalag ko!

Mga Salmo 102 | Mga Salmo 104