Mga Salmo 88

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Pagpangayo sing Bulig

1 O Ginoong Dios nga akon manlulowas, nagapanawag ako sa imo sa bug-os nga adlaw, kag sa kagab-ihon, nagapalapit ako sa imo atubangan.
2 Pamatii ang akon pangamuyo; pamatii ang akon pagpangayo sing bulig!
3 Madamo gid nga mga kalisdanan ang nag-abot sa akon sa bagay nga daw mapatay na gid ako.
4 Kaangay ako sang iban nga tagumatayon, nadula ang tanan ko nga kusog.
5 Ginbayaan ako upod sa mga patay, kaangay ako sang ginpatay nga nagahamyang sa ila mga lulobngan, nga imo ginkalimtan sing bug-os, nga indi mo na gid matabangan.
6 Ginhaboy mo ako sa kadadalman sang lulobngan, didto sa labing madulom kag labing madalom nga buho.
7 Ang imo kaakig mabug-at nga nagapilpil sa akon, kag ginwaswasan ako sang iya mga balod.
8 Ginbuot mo nga sikwayon ako sang akon mga abyan, ginhimo mo ako nga kangil-aran sa ila. Nakibon ako kag indi makapalagyo,
9 ang akon mga mata nagapalanghuyos tungod sa pag-antos. O Ginoo, adlaw-adlaw nagapanawag ako sa imo, kag nagabayaw ako sang akon mga kamot sa imo sa pangamuyo!
10 Nagahimo ka bala sing mga milagro para sa mga patay? Nagabangon bala sila kag nagadayaw sa imo?
11 Ginabantala bala ang imo mapinadayunon nga gugma sa lulobngan, ukon ang imo pagkamatutom sa duog sang kalaglagan?
12 Makita bala ang imo mga milagro sa sadto nga duog sang kadudolman, ukon ang imo kaayo sa duta sang nagkawala?
13 O Ginoo, nagapanawag ako sa imo sa pagpangayo sing bulig, agaaga nagapangmuyo ako sa imo.
14 Ngaa bala ginasikway mo ako, O Ginoo? Ngaa bala nagapanago ka sa akon?
15 Halin sang pamatan-on pa ako nag-antos ako nga yara sa bibi sang kamatayon, nalapyo na gid ako sa kabug-at sang imo mga silot.
16 Ang imo nagabalingaso nga kaakig nagligsa sa akon, ang imo makakulogmat nga mga pagsalakay naglaglag sa akon.
17 Sa bug-os nga adlaw ginlikupan nila ako subong sang baha; ginakibon nila ako.
18 Ginbuot mo nga sikwayon ako bisan sang akon suod nga mga abyan, ang akon lamang kaupod amo ang kadudolman.

Mga Salmo 87 | Mga Salmo 89