“Ang mga Tawo Magatulok sa Iya nga Ila Ginbuno”

Liturhiya sang Pulong

(Biyernes, Hunyo 8, 2018)

1. Ang Pagbasa gikan sa Libro ni:

Propeta Oseas 11:1, 3-4, 8-9

“Sang bata pa si Israel, ginhigugma ko sia. Sugod sang paghalin niya sa Egipto gintawag ko sia nga akon anak. Pero sa sobra ko nga pagbatiti sa iya kaangay sang isa ka anak, labi nga nagapalayo sia sa akon. Ang akon mga tawo naghalad kay Baal, nagsunog sila sing insyenso sa mga diosdios. Pero ako ang nagtudlo kay Israel sa paglakat, ginkungkong ko sila, pero wala nila ginkilala ang akon pag-atipan sa ila. Ginbutong ko sila pakadto sa akon nga may paghigugma. Ginhakwat ko sila kag ginkugos sing hugot; nagduko ako sa pagpakaon sa ila. Ano bala ang pagsikway ko sa imo, O Israel? Ano bala ang pagpatumbaya ko sa imo? Malaglag ko bala ikaw pareho sa ginhimo ko sa Adma? Ukon mahimo ko bala sa imo ang ginhimo ko sa Seboim? Ang akon tagipusoon indi magtugot sini! Naluoy ako sa imo. Indi ko ikaw pagsilutan sa akon kaakig, indi ko paglaglagon liwat ang Israel. Kay Dios ako kag indi tawo. Ako, ang Balaan, nagaupod sa imo. Indi ako magkadto sa imo nga may kaakig.

Salmo sa Pagsabat:

Isaias 12:2-3, 4, 5-6

(S) Magasag-ob ka nga malipayon sa busay sang kaluwasan.

Ang Dios akon manlulowas; magasalig ako sa iya kag indi magkahadlok. Ang GINOO nagahatag sa akon sing gahom kag kusog; sia akon manlulowas. Subong nga ang mabugnaw nga tubig nagahatag kalipay sa ginauhaw, gani ang mga tawo sang Dios nagakalipay kon luwason niya sila. (S)
Ang adlaw magaabot nga ang mga tawo magaamba: “Magpasalamat kamo sa GINOO! Panawag kamo sa iya sa pagpangayo sing bulig! Isugid sa tanan nga mga kapungsoran ang iya ginhimo! Sugiri sila kon daw ano sia ka gamhanan!  (S)

Sugiri sila kon daw ano ka gamhanan sa GINOO. (12:4)

Magaamba sa GINOO, tungod sang dalagku nga mga butang nga iya ginhimo. Iwaragwag ang balita sa bug-os nga kalibutan. Ang tagsatagsa nga nagapuyo sa Sion magsinggit kag magkanta!  Ang Balaan nga Dios sang Israel gamhanan, kag nagapuyo sia sa tunga sang iya mga tawo.” (S)

2. Ang Pagbasa gikan sa Sulat ni San Pablo nga Apostol, sa mga:

Taga-Efeso 3:8-12, 14-19

Ako kubos pa sa labing kubos sang tanan nga mga tumoluo, wala sapayan ginhatagan ako sang Dios sining pinasahi nga prebilihiyo sa pagdala sa mga Gentil sang Maayong Balita sang indi matungkad nga mga manggad ni Cristo, kag sa pagpakita sa tanan nga mga tawo kon ano ang sekrito nga plano sang Dios. Ang Dios nga Nagtuga sang tanan nga mga butang, nagtago sang iya sekrito sa nagligad nga mga panahon, agod nga sa karon nga panahon, paagi sa iglesia, ang tanan nga mga punoan kag mga kagamhanan sa kalangitan makahibalo sang tanan nga mga sahi sang kaalam sang Dios. Ginhimo ini sang Dios suno sa iya tinutoyo halin pa sang una tubtob sa walay katapusan nga iya gintuman paagi kay Cristo Jesus nga aton Ginoo. Sa aton paghiusa sa iya kag paagi sa aton pagtuo sa iya, hilway na kita sa pagpalapit sa atubangan sang Dios sa bug-os nga pagsalig. Gani, sa sini nga kabangdanan, nagaluhod ako sa atubangan sang Amay, nga gikan sa iya ang tagsa ka panimalay sa langit kag sa duta nagakuha sang ila matuod nga ngalan. Nagapangayo ako sa Dios, nga gikan sa bugana nga manggad sang iya himaya, hatagan niya kamo sing gahom paagi sa iya Espiritu, agod magmalig-on ang inyo espirituhanon nga kinaugali, kag si Cristo magapuyo sa inyo tagipusoon paagi sa pagtuo. Nagapangamuyo ako nga makapanggamot kag mapasad kamo sa gugma, agod nga kamo, upod sa tanan nga mga tumoluo, makaangkon sang gahom sa paghangop kon daw ano ang kasangkaron kag ang kalabaon kag ang kataason kag ang kadalumon sang gugma ni Cristo. Kabay nga makilala ninyo ang iya gugma, bisan nga indi gid ini mahangpan sing bug-os, kag mapun-an kamo sang himpit nga kabug-osan sang Dios. 

Aleluya:

Mateo 11:29

Amo ini ang gugma: indi tungod kay nagahigugma kita sa Dios, kundi ang Dios nagahigugma sa aton kag ginpadala niya ang iya Anak agod paagi sa iya mapatawad ang aton mga sala.

Ang Pagbasa sang Santos nga Ebanghelyo suno kay:

San Juan 19:31-37

Dayon ginpangayo sang mga Judio kay Pilato nga tugotan sila sa pagbalbag sang mga batiis sang mga tawo nga nalansang sa krus kag sa pagtaltal sa ila. Ginhimo nila ini kay Adlaw sadto sang Pag-aman, kag indi sila luyag nga ang mga bangkay magpabilin sa krus sa Adlaw nga Inugpahuway, kay ang madason nga adlaw amo ang Adlaw nga Inugpahuway nga labing balaan. Gani naglakat ang mga soldado, kag ginbalbag nila ang mga batiis sang nahauna, kag sang isa pa gid nga ginlansang man upod kay Jesus. Pero sang pag-abot nila kay Jesus, nakita nila nga patay na sia; gani wala nila pagbalbaga ang iya mga batiis. Ugaling ang isa sang mga soldado nga may bangkaw nagbuno sa kay Jesus sa kilid, kag sa gilayon nag-agay ang dugo kag tubig. Ang isa nga nakakita sini nga hitabo nagapamatuod sini; kag ang iya panaksi matuod, kag nahibaluan niya nga nagahambal sia sang kamatuoran, agod nga kamo man magtuo. Nahanabo ini agod matuman ang kasulatan nga nagasiling, “Wala sing isa sang iya mga tul-an nga mabali.” Kag may isa man ka bahin sang kasulatan nga nagasiling, “Ang mga tawo magatulok sa iya nga ila ginbuno.”

Hunyo 7 | Hunyo 9