"Akon Ikaw Banhawon sa Katapusan nga Adlaw"

Balasahon Subong nga Adlaw

(Miyerkules, April 18, 2018)

Nahauna nga Balasahon:

Binuhatan 8:1-8

Kag si Saulo nagsugot man sa pagpatay sa iya. Sa sadto gid nga adlaw, nagsugod ang mapintas nga paghingabot sa iglesia sa Jerusalem. Luas sa mga apostoles, ang tanan nga mga tumoluo nag-alaplaag sa probinsya sang Judea kag sang Samaria. 

Si Saulo nagsugot man sa pagpatay sa iya. (8:1)

Ginlubong si Esteban sang pila ka mga tawo nga diosnon kag naghinibi sila sing tudo gid. Gintinguhaan ni Saulo ang paglaglag sang iglesia. Nagpamalaybalay sia kag ginpangganoy niya ang mga tumoluo, mga lalaki kag mga babayi kag iya sila ginpabilanggo. Ang mga tumoluo nga nag-alaplaag nagkadto bisan diin nga duog nga nagawali sang Maayong Balita. Nagkadto si Felipe sa siyudad sang Samaria kag didto nagwali sia sa mga tawo nahanungod kay Cristo. Ginpamatian sing maayo sang mga tawo ang ginhambal ni Felipe. Nagpamati sila sa iya kag nakita nila ang mga milagro nga ginhimo niya. Nagasinggit sing mabaskog ang malaut nga mga espiritu sa ila paggwa sa madamo nga mga tawo. Madamo man nga mga paralitiko kag mga piang ang nag-alayo. Gani may daku nga pagkinalipay sa Samaria.

Salmo sa Pagsabat:

Mga Salmo 66:1-3, 4-5, 6-7

Dayawa ninyo ang Dios nga may paghinugyaw sa kalipay, tanan kamo nga mga katawuhan! Amba kamo sa paghimaya sang iya ngalan, ihalad sa iya ang mahimayaon nga pagdayaw!

Amba kamo sa paghimaya sang iya ngalan. (66:2)

 Isiling sa Dios, “Daw ano ka makatilingala ang mga butang nga imo ginahimo! Daku gid ang imo gahom sa bagay nga ang imo mga kaaway nagayaub sa imo sa kahadlok. Ang tanan sa duta nagasimba sa imo, nagakanta sila sing mga pagdayaw sa imo, nagakanta sila sing mga pagdayaw sa imo ngalan.” Dali kamo kag tan-awa ninyo ang ginhimo sang Dios, ang iya makatilingala nga mga binuhatan sa tunga sang mga tawo. Ang dagat ginhimo niya nga mamala nga duta, gintabok sang aton mga katigulangan ang suba nga nagalakat lang, didto naghinugyaw kita tungod sang iya ginhimo. Nagagahom sia sa walay katapusan paagi sa iya kusog kag ginabantayan niya sing maid-id ang mga kapungsoran. Kabay nga wala sing may magrebelde batok sa iya!

Aleluya:

Juan 6:40

Kay amo ini ang kabubot-on sang akon Amay: nga ang tanan nga makakita sa Anak kag magtuo sa iya magaangkon sang kabuhi nga wala sing katapusan, kag akon sila banhawon sa katapusan nga adlaw.

Ebanghelyo Subong nga Adlaw:

Juan 6:35-40

Si Jesus nagsiling sa ila, “Ako amo ang tinapay sang kabuhi. Ang nagakari sa akon indi na gid paggutomon, kag ang nagatuo sa akon indi na gid pag-uhawon. Karon, nagsiling ako sa inyo nga nakita na ninyo ako, pero indi kamo magtuo. Ang tagsatagsa nga ginahatag sang Amay sa akon magakari sa akon, kag ang bisan sin-o nga nagakari sa akon indi ko gid pagsikwayon. Kay nagkari ako halin sa langit indi sa pagtuman sang akon kabubot-on, kundi sang kabubot-on sang nagpadala sa akon. Amo ini ang kabubot-on sang nagpadala sa akon: nga wala ako sing madula sang bisan isa sang iya mga gintugyan sa akon, kundi nga akon sila banhawon sa katapusan nga adlaw. Kay amo ini ang kabubot-on sang akon Amay: nga ang tanan nga makakita sa Anak kag magtuo sa iya magaangkon sang kabuhi nga wala sing katapusan, kag akon sila banhawon sa katapusan nga adlaw.” 

April 17 | April 19