1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
☆☆☆
Si Isaac Nagpuyo sa Gerar
1 Karon may gutom na man sa duta, wala labot sang gutom sadtong panahon ni Abraham. Si Isaac nagkadto kay Abimelec, ang hari sang mga Filistinhon, sa Gerar.
2 Ang GINOO nagpakita kay Isaac kag nagsiling, “Indi ka magkadto sa Egipto. Magpabilin ka sa duta nga ginasiling ko sa imo nga imo pagapuy-an.
3 Diri ka lang anay magpuyo, kag pagaupdan ko ikaw kag pagahatagan sing mga kaayuhan. Ihatag ko sa imo kag sa imo mga kaliwat ini tanan nga mga kadutaan. Tumanon ko ang ginsaad ko sa imo amay nga si Abraham.
4 Hatagan ko ikaw sing mga kaliwat nga pareho kadamo sang mga bituon sa langit, kag ihatag ko sa ila ini tanan nga mga duta. Ang tanan nga mga pungsod sa duta magapangayo sa akon nga bendisyunan ko man sila subong sang akon pagbendisyon sa imo mga kaliwat.
5 Hatagan ko ikaw sing mga kaayuhan kay si Abraham nagtuman sa akon kag sang tanan ko nga mga sugo kag kasugoan.”
6 Gani si Isaac nagpuyo sa Gerar.
7 Kon pamangkuton sia sang mga tawo sa sina nga duog nahanungod sang iya asawa, nagsiling sia nga utod niya sia kay nahadlok sia magsiling nga asawa niya sia. Nahadlok sia sa mga tawo didto kay basi patyon nila sia, agod makuha nila si Rebeca nga tama gid katahom.
8 Sang nagdugaydogay na si Isaac didto, natabuan nga si Abimelec nga hari nakagwa sa iya bintana kag nakita niya nga nagadaluay si Isaac kag si Rebeca.
9 Ginpatawag ni Abimelec si Isaac kag ginsingganan, “Asawa mo gali sia! Ngaa nagsiling ka nga utod mo sia?” Nagsabat sia, “Naghunahona ako nga basi patyon ako kon magsiling ako nga asawa ko sia.”
10 Si Abimelec nagsiling, “Ano ang ginhimo mo sa amon? Kon abi natabo nga ang isa sang akon mga tinawo nagpakighilawas sa imo asawa, kuntani ikaw ang kabangdanan sang amon pagpakasala.”
11 Si Abimelec nagpaandam sa tanan nga mga tawo, “Ang bisan sin-o nga maghimo sing malain sa sini nga tawo ukon sa iya asawa pagapatyon.”
12 Si Isaac nagsab-og sa sadto nga duta, kag sadto nga tuig nagpatubas sia sing 100 ka pilo sang sa iya ginsab-og, kay ang GINOO nagbendisyon sa iya.
13 Nagpadayon sia sa pag-uswag, kag nagmanggaranon gid sia.
14 Ang mga Filistinhon nahisa sa iya, kay madamo ang iya mga karnero, mga baka, kag mga ulipon.
15 Gani, gintampukan nila ang mga bubon nga ginkutkot sang mga ulipon sang iya amay nga si Abraham sang buhi pa sia.
16 Dayon si Abimelec nagsiling kay Isaac, “Palayo ka sa amon kay naggamhanan ka pa sa amon.”
17 Gani si Isaac naghalin kag nagpatindog sang iya mga tolda sa kapatagan sang Gerar, diin sia nagpuyo sing madugay.
18 Ginpakutkotan na man niya ang mga bubon nga ginkutkot sadto anay sang iya amay nga si Abraham kag gintampukan sang mga Filistinhon sang mapatay na si Abraham. Ginhingalanan ini ni Isaac sang mga ngalan nga ginhingalan sang iya amay.
19 Ang mga ulipon ni Isaac nagkutkot sing bubon sa kapatagan kag nakasapo sila sing tuboran.
20 Ang mga manugbantay sang mga hayop sa Gerar nagpakigsuay sa mga manugbantay sang mga hayop ni Isaac kag nagsiling sila, “Amon ini tubig.” Gani ginhingalanan ni Isaac ang bubon “Kasuayon.”
21 Ang mga ulipon ni Isaac nagkutkot na man sing isa ka bubon, kag nag-inaway na man sila nahanungod sadto nga bubon, gani ginhingalanan niya yadto nga “Kaawayon.”
22 Naghalin na man sia gikan didto kag nagpakutkot sing isa na man ka bubon. Wala na sing sinuay nahanungod sadto nga bubon, gani, ginhingalanan niya yadto nga “Kahilwayan.” Nagsiling sia, “Karon ang GINOO naghatag sa aton sing kahilwayan sa duta, kag magauswag kita diri.”
23 Si Isaac naglakat kag nagkadto sa Beerseba.
24 Sadto nga gab-i ang GINOO nagpakita sa iya kag nagsiling, “Ako ang Dios sang imo amay nga si Abraham. Indi ka magkahadlok kay kaupod nimo ako. Bendisyunan ko ikaw kag hatagan sing madamo nga mga kaliwat, tungod sang akon saad sa akon alagad nga si Abraham.”
25 Si Isaac naghimo sing altar didto kag nagsimba sa GINOO. Dayon naghimo sia sang iya kampamento didto, kag ang iya mga ulipon nagkutkot sing isa na man ka bubon.
Ang Kasugtanan ni Isaac kag ni Abimelec
26 Si Abimelec nag-abot halin sa Gerar sa pagpakigkita kay Isaac, upod kay Ahuzat nga iya palamangkutan kag kay Picol nga pangulo sang iya mga soldado.
27 Si Isaac nagpamangkot, “Ngaa bala nagkari ka sa pagpakigkita sa akon nga sang una ginkontra mo ako kag ginpahalin mo gani ako sa imo duta?”
28 Nagsabat sila, “Karon nahibaluan namon nga ang GINOO kaupod nimo, kag nagahunahona kami nga dapat kita maghimo sing kasugtanan nga may panumpa. Luyag namon nga magsaad ka
29 nga indi mo kami pag-anhon, subong nga wala kami mag-ano sa imo. Nagmaluloy-on kami sa imo kag ginpalakat namon ikaw nga wala pag-anha. Karon maathag nga ang GINOO naghatag sa imo sing mga kaayuhan.”
30 Si Isaac nagpaluto sing manamit nga mga pagkaon para sa ila, kag nagkaon kag nag-inom sila.
31 Aga pa gid sang madason nga adlaw ang tagsatagsa sa ila nagsaad nga nagapanumpa. Si Isaac nagpaalam sa ila kag nagbulagay sila subong nga mga abyan.
32 Sadto nga adlaw ang mga ulipon ni Isaac nag-abot kag nagsugid sa iya nahanungod sang bubon nga ila ginkutkot. Nagsiling sila, “Nakakita kami sing tubig.”
33 Ginhingalanan niya ang bubon Seba. Amo ini ang kabangdanan nga mga banwa ginahingalanan Beerseba.
Ang Dumoluong nga mga Asawa ni Esau
34 Si Esau nagaedad sing 40 ka tuig sang pagpangasawa niya kay Judit nga anak ni Beeri nga Hethanon. Ginpangasawa man niya si Basemat nga bata nga babayi ni Elon nga Hethanon.
35 Ini sila nagtublag sang pangabuhi ni Isaac kag ni Rebeca.
No comments:
Post a Comment