1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
☆☆☆
Si Jacob Naghanda sa Pagpakigkita kay Esau
1 Sang nagapadayon si Jacob sang iya dalanon, may mga anghel sang Dios nga nagsugata sa iya.
2 Sang pagkakita niya sa ila nagsiling sia, “Kampamento ini sang Dios.” Gani, ginhingalanan niya ang duog nga Mahanaim.
3 Si Jacob nagpauna sing mga tawo sa pagpahibalo sa iya utod nga si Esau sa duta sang Seir nga sakop sang Edom.
4 Amo ini ang gintugon niya nga ihambal nila, “Ako, si Jacob, ang imo matinumanon nga alagad, nagapanugid sa akon agalon nga si Esau, nga nagpuyo ako upod kay Laban kag wala ako magpauli tubtob karon.
5 May mga baka ako, mga asno, mga karnero, mga kanding kag mga ulipon. Sir, nagapahibalo ako sa imo, agod magmaayo ka sa akon.”
6 Pagbalik sang mga ginsugo ni Jacob, nagsiling sila, “Nagkadto kami sa imo utod nga si Esau, kag nagapakari na sia sa pagsugata sa imo. May upod sia nga 400 ka mga tawo.”
7 Si Jacob hinadlukan gid kag indi mapahamtang. Ginbahinbahin niya sa duha ka grupo ang mga tawo nga kaupod niya kag ang iya mga karnero kag mga kanding, mga baka, kag mga kamelyo.
8 Naghunahona sia sa iya kaugalingon, “Kon si Esau mag-abot kag magsalakay sang nahauna nga grupo, ang ikaduha nga grupo makapalagyo.”
9 Dayon si Jacob nagpangamuyo, “Dios sang akon lolo nga si Abraham, kag Dios sang akon amay nga si Isaac, pamatii ako! Nagsiling ka sa akon, O GINOO, nga magbalik ako sa akon duta kag sa akon mga himata, kag ikaw ang mahibalo sang kaayuhan ko.
10 Indi ako takos sang tanan nga kaayo kag katutom nga imo ginpakita sa akon nga imo alagad. Gintabok ko ang Jordan nga wala gid sing bisan ano, kundi baston gid lang, kag karon nagbalik ako nga may duha na ka grupo.
11 Ginapangamuyo ko, luwasa ako sa gahom sang akon utod nga si Esau. Nahadlok ako basi nagakari sia sa pagsalakay sa amon kag sa pagpamatay sa amon tanan, bisan pa sang mga babayi kag sang mga kabataan.
12 Dumdoma ang imo ginsaad, nga magahimo ka sa akon sing maayo, kag magahatag ka sa akon sing mga kaliwat nga indi maisip. Manginsubong sila kadamo sang balas sa baybayon.”
13-15 Sang makatener si Jacob didto sing isa ka gab-i, nagpili sia sa iya mga dala sing inugregalo sa iya utod nga si Esau: 200 ka babayi nga kanding kag 20 ka lalaki nga kanding, 200 ka babayi nga karnero kag 20 ka lalaki nga karnero, 30 ka gatasan nga kamelyo nga upod ang ila tinday, 40 ka baka nga babayi, 10 ka baka nga toro, 20 ka asna kag napulo ka asno.
16 Gintugyan niya ang tagsa ka manara sa isa sang iya ulipon kag ginsingganan niya sila, “Una kamo sa akon, kag butangi ninyo sing antad ang isa ka manara sa isa.”
17 Ginsingganan niya ang nahauna nga ulipon, “Kon ang akon utod nga si Esau magsugata sa imo kag magpamangkot, ‘Sin-o ang imo agalon? Diin ka makadto? Sin-o ang tag-iya sining mga hayop nga ginadala mo?’
18 Magsabat ka, ‘Iya ini sang imo alagad nga si Jacob. Ginapadala niya ini nga regalo sa akon agalon nga si Esau. Si Jacob yara sa ulihi namon.’
19 Amo man ini ang ginsiling niya sa ikaduha, sa ikatlo, kag sa tanan nga nagasunod sa mga kahayupan, “Amo ini ang inyo isiling kay Esau kon masugata ninyo sia,
20 ‘Si Jacob nga imo alagad yara sa ulihi namon.’” Si Jacob naghunahona sa iya kaugalingon, “Palugpayan ko sia sang mga regalo nga akon ginapauna, kag kon magkitaay kami, ayhan patawaron niya ako.”
21 Pinauna niya ang mga regalo, kag nagpabilin sia sadtong gab-i sa kampamento.
Si Jacob Nagpakigdumog sa Anghel sa Peniel
22 Sadto nga gab-i nagbangon si Jacob, gindala niya ang duha niya ka asawa, ang iya duha ka babayi, ang iya onse ka mga kabataan, kag nagtabok sa talabukan sang suba sang Jaboc.
23 Sang mapatabok na niya sila, ginpatabok man niya ang tanan niya nga mga pagkabutang.
24 Gani, nabilin sia nga isahanon lang. Dayon may isa ka tawo nga nag-abot kag nagdumog sa iya tubtob sa kaagahon.
 |
| May isa ka tawo nga nag-abot kag nagdumog sa iya. (32:24) |
25 Sang nabatyagan sang tawo nga indi sia makadaog kay Jacob, ginhampak niya si Jacob sa lutalotahan, kag nagliw-as ini.
26 Ang tawo nagsiling, “Buhii na ako, kay nagapamanagbanag na.” Pero si Jacob nagsabat, “Indi ko ikaw pagbuhian kon indi mo ako pagbendisyunan.”
27 Ang tawo nagpamangkot, “Sin-o ang ngalan mo?” Nagsabat sia, “Si Jacob.”
28 Ang tawo nagsiling, “Indi ka na pagtawgon nga Jacob. Nagpakigdumog ka sa Dios kag sa mga tawo kag nagdaog ka, gani pagatawgon ka nga Israel.”
29 Si Jacob nagsiling, “Kon mahimo sugiri ako sang imo ngalan.” Pero nagsabat sia, “Ngaa ginapamangkot mo ang akon ngalan?” Dayon ginbendisyunan niya si Jacob.
30 Si Jacob nagsiling, “Nag-atubangay kami sang Dios, kag karon buhi pa gihapon ako.” Gani ginhingalanan niya ang duog Peniel.
31 Nagabutlak na ang adlaw sang paghalin ni Jacob sa Peniel, kag nagapiangpiang sia tungod sang iya lutalotahan.
32 Amo ini ang kabangdanan kon ngaa tubtob karon ang mga Israelinhon wala nagakaon sang unod sa lutalotahan sang paa. Kay ginhampak si Jacob sa sini nga bahin.
No comments:
Post a Comment