1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
☆☆☆
Si Jose kag ang Iya mga Utod
1 Si Jacob nagpadayon sa pagpuyo sa duta sang Canaan, sa diin ang iya amay nagpuyo anay.
2 Amo ini ang maragtas sang panimalay ni Jacob. Si Jose nga nagaedad sing 17 ka tuig nagbantay sang mga karnero kag mga kanding upod sa iya mga utod nga lalaki nga mga anak ni Bilha kag ni Zilpa nga mga babayi sang iya amay. Ginsugiran niya ang iya amay sang malain nga mga butang nga ginahimo sang iya mga utod.
3 Si Jacob nagpalangga kay Jose labaw sa tanan niya nga mga kabataan nga lalaki, kay si Jose natawo sang tigulang na sia. Ginhimuan niya sia sing malaba nga bayu nga may malaba nga pako.
4 Sang makita sang iya mga utod nga ang ila amay nagpalangga kay Jose sing labi sang sa ila, naakig gid sila sa ila utod kag wala sila nagbugno sa iya.
5 Isa ka adlaw si Jose nagdamgo, kag sang ginsugid niya ini sa iya mga utod naakig pa gid sila tapat sa iya.
6 Nagsiling sia sa ila, “Pamatii ninyo ang damgo ko.
7 Sa akon damgo, didto kita tanan sa uma nga nagapangbugkos sing mga trigo. Ang akon binugkos nagbangon kag nagtindog sing tadlong. Ang inyo mga binugkos naglibot kag nagsaludo sa akon binugkos.”
8 Ang iya mga utod nagsiling, “Nagahunahona ka bala nga magahari ka sa amon? Magagahom ka bala sa amon?” Gani, naakig pa gid sila sa iya tungod sang ginsugid niya nahanungod sang iya damgo.
9 Dayon si Jose nagdamgo na man kag ginsugiran niya ang iya mga utod nga lalaki. Nagsiling sia, “May isa na man ako ka damgo kag sa sini nga damgo nakita ko ang adlaw, ang bulan kag ang onse ka mga bituon nga nagasaludo sa akon.”
10 Ginsugid man niya ini nga damgo sa iya amay kag sa iya mga utod nga lalaki, kag ang iya amay nagsabdong sa iya nga nagasiling, “Ano man ina nga damgo! Naghunahona ka bala nga ang imo iloy, ang imo mga utod nga lalaki, kag ako magasaludo sa imo?”
11 Ang mga utod ni Jose nahisa gid sa iya, pero ang iya amay nagpanghunahona sing madalom nahanungod sini nga butang.
Si Jose Ginbaligya kag Gindala sa Egipto
12 Isa ka adlaw sang pagkadto sang mga utod ni Jose nga lalaki sa Siquem sa pag-atipan sang mga hayop sang ila amay,
13 si Jacob nagsiling kay Jose, “Ang imo mga utod nagaatipan sang mga hayop sa Siquem. Maghimos ka, kay paapason ko ikaw sa ila.” Si Jose nagsabat, “Sigi.”
14 Ang iya amay nagsiling sa iya, “Lakat ka kag tan-awa kon maayo man ang imo mga utod kag ang mga hayop. Dayon balik ka diri kag sugiri ako.” Gani ginpadala sia sang iya amay gikan sa kapatagan sang Hebron. Sang pag-abot ni Jose sa Siquem,
15 may isa ka tawo nga nakakita sa iya nga nagadalangdalang sa latagon. Ginpamangkot sia sang tawo, “Ano bala ang ginapangita mo?”
16 Nagsabat sia, “Nagapangita ako sang akon mga utod nga lalaki nga nagapahalab sang ila mga hayop. Masugiran mo bala ako kon diin sila?”
17 Ang tawo nagsabat, “Nakahalin na sila. Nabatian ko sila nga nagsiling nga makadto sila sa Dotan.” Gani, si Jose nag-apas sa iya mga utod nga lalaki kag nakita niya sila sa Dotan.
18 Sang malayo pa sia nakita na nila sia, kag sang wala pa sia makaabot, naghimbon sila sa pagpatay sa iya.
19 Nagsiling sila sa isa kag isa, “Yara nagapakari ang paladamgo.
20 Dali kamo, patyon ta sia kag ihulog ang iya bangkay sa isa sining mga bubon kag masiling lang kita nga may talunon nga sapat nga nagpatay sa iya. Dayon tan-awon ta kon ano ang maabutan sang iya damgo.”
21 Pagkabati ni Ruben, gintinguhaan niya ang pagluwas kay Jose sa ila. Nagsiling sia, “Indi naton sia pagpatyon.
22 Sa baylo nga patyon ninyo sia, ihulog lang ninyo sia sa sini nga bubon sa desierto, pero indi ninyo sia pagsakita.” Ginsiling niya ini kay nagaplano sia sa pagluwas kay Jose agod makabalik sia sa iya amay.
23 Sang makaabot si Jose sa iya mga utod, gin-uba nila ang iya bayu nga may malaba sing pako.
24 Gindakop nila sia kag ginhulog sa bubon nga wala sing tubig.
25 Sang nagakaon sila, sa hinali nakita nila ang mga Ismaelinhon nga nagapanglakaton halin sa Galaad pa Egipto. Ang ila mga kamelyo kargado sing mga pahamot, ihalaplas, kag mira.
26 Si Juda nagsiling sa iya mga utod, “Ano ang aton mapulos kon patyon naton ang aton utod kag tagutaguon ta ang iya kamatayon?
27 Ibaligya lang naton sia sa mga Ismaelinhon. Kon amo ini ang himuon ta, indi pa naton sia masakit, kon sa bagay, aton man sia utod, aton unod kag dugo.” Ang iya mga utod nagsugot man.
28 Sang pag-agi sang mga negosyante nga Midianhon, ginbatak nila si Jose halin sa bubon, kag ginbaligya sia sing 20 ka bilog nga pilak sa mga Ismaelinhon kag gindala ini sia sa Egipto.
29 Sang pagbalik ni Ruben sa bubon, kag nasapwan niya nga wala na didto si Jose, gingisi niya ang iya kaugalingon nga bayu sa kasubo.
30 Nagbalik sia sa iya mga utod kag nagsiling, “Ang bata wala na didto! Ano na karon ang himuon ko?”
31 Dayon nagpatay sila sing kanding, kag gintum-oy nila sa dugo ang malaba nga bayu ni Jose.
32 Gindala nila ang bayu sa ila amay kag nagsiling, “Nakita namon ini! Tan-awa kon iya ini sang imo anak.”
33 Nakilala niya ini kag nagsiling, “Huo, bayu ini sang akon anak. Ginpatay sia sang talunon nga sapat. Si Jose ginkusnit sang sapat!”
34 Gingisi ni Jacob ang iya bayu kag nagbayu sing sako sa pagpakita sang iya kasubo. Naglalaw sia sa iya anak sa malawig nga mga inadlaw.
35 Ang tanan niya nga mga anak nga lalaki kag babayi naglipay sa iya, pero indi sia luyag nga lipayon, kundi nagsiling sia, “Magalalaw ako sa akon anak tubtob manginkaupod ako niya sa kalibutan sang mga patay.” Gani, nagpadayon sia sa paglalaw sa iya anak nga si Jose.
 |
| ANG MGA HITABO SA KABUHI NI JOSE (Ang mga numero amo ang kapitulo kag bersikulo sa Genesis) |
36 Sa pihak nga bahin, didto sa Egipto binaligya sang mga Midianhon si Jose kay Potifar, ang kapitan sang mga gwardya sa palasyo nga isa sang mga opisyales sang hari.
No comments:
Post a Comment