Genesis 42

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ang mga Utod ni Jose Nagkadto sa Egipto sa Pagdalawat sing Trigo

1 Sang pagkahibalo ni Jacob nga may trigo sa Egipto, nagsiling sia sa iya mga anak, “Ngaa bala nga wala kamo nagagiho?

2 Nakabati ako nga may trigo sa Egipto. Kadto kamo didto kag magdalawat agod indi kita mapatay sa gutom.”

3 Gani ang napulo sang mga utod ni Jose sa amay naglakat sa pagdalawat sing trigo sa Egipto,

4 pero wala ni Jacob pagpaupda si Benjamin, ang utod ni Jose sa amay kag iloy, kay nahadlok sia basi may malain nga matabo sa iya.

5 Upod sa iban nga mga tawo, ang mga anak nga lalaki ni Israel nag-abot sa Egipto sa pagdalawat sing trigo, kay may gutom sa duta sang Canaan.

6 Si Jose, subong nga gobernador sang Egipto, nagpadalawat sing trigo sa tanan nga mga tawo sang kalibutan. Gani, ang mga utod ni Jose nag-abot, kag nagsaludo sa iya nga ang ila guya nagaduot sa duta.

7 Sang pagkakita ni Jose sa iya mga utod, nakilala niya sila, pero wala sia magpakita nga kilala niya sila. Ginpamangkot niya sila sing matigdas, “Diin kamo maghalin?” Nagsabat sila, “Sa Canaan. Nagkari kami sa pagbakal sing kalan-on.”

8 Nakilala ni Jose ang iya mga utod, pero wala sila makakilala sa iya.

9 Nadumdoman niya ang iya mga damgo nahanungod sa ila, kag nagsiling sia sa ila, “Mga espiya kamo! Nagkari kamo sa pagtan-aw kon diin ang maluya nga pamakod sang amon duta.”

10 Nagsabat sila, “Indi, sir, kundi nagkari kami subong mga alagad mo sa pagbakal sing kalan-on.

11 Mag-ulotod kami. Indi kami mga espiya, kundi mga tawo nga nagasugid sing matuod.”

12 Si Jose nagsiling sa ila, “Indi ako magpati! Nagkari gid kamo sa pagtan-aw kon diin ang maluya nga pamakod sang amon duta.”

13 Nagsiling sila, “Sir, dose kami ka mag-utod nga mga anak sang isa lang ka tawo sa duta sang Canaan. Ang kamanghuran yadto didto upod sa amon amay, kag ang isa namon ka utod patay na.”

14 Si Jose nagsabat, “Subong sang ginsiling ko sa inyo, mga espiya gid kamo.

15 Sa sini nga paagi matilawan kamo: nagasumpa ako sa ngalan sang hari nga indi kamo makahalin, kon indi magkari diri ang inyo kamanghuran.

16 Palakta ang isa sa inyo sa pagkuha sa iya. Ang nabilin pagabantayan tubtob mapamatud-an ang inyo ginsiling. Kon indi, subong nga nagakabuhi ang hari, mga espiya gid kamo.”

17 Sa sina nga mga pulong ginbilanggo niya sila sing tatlo ka adlaw.

18 Sa ikatlo nga adlaw si Jose nagsiling sa ila, “Mahinadlukon ako sa Dios, gani luwason ko ang inyo mga kabuhi kon himuon ninyo ini:

19 Kon wala kamo nagabutig nga mga tawo, ang isa sa inyo magapabilin sa bilangguan sa diin kamo ginbilanggo, kag ang iban sa inyo sarang makalakat sa pagdala sang inyo gindalawat nga trigo didto sa inyo ginagutom nga mga panimalay.

20 Dayon dapat ninyo dalhon sa akon ang inyo kamanghuran nga utod, sa pagpamatuod nga wala kamo nagabutig, kag indi ko kamo pagpatyon.” Nagsugot sila sa paghimo sini.

21 Nagsiling sila sa isa kag isa, “Sa pagkamatuod, nakasala kita sa ginhimo naton sa aton utod. Nakita naton ang iya daku nga kalisdanan sang nagpakiluoy sia sa aton, pero indi kita magpamati. Amo ina nga kita na man karon ang ginalisdan.”

22 Si Ruben nagsiling, “Ginsingganan ko kamo nga indi ninyo pag-anhon ang bata, pero indi kamo magpamati. Kag karon nagabayad kita sang iya kamatayon.”

23 Si Jose nakahangop sang ila ginpanghambal, pero wala sila makahibalo sini, kay ang ila pagpakighambal sa iya paagi sa manugbadbad.

24 Si Jose naghalin sa ila kag naghibi. Sang sarang na man sia makahambal sa ila, nagbalik sia, kag ginpili si Simeon kag ginpagapos sia sa atubangan nila.

Ang mga Utod ni Jose Nagbalik sa Canaan

25 Nagsugo si Jose nga pun-on ang ila mga sulodlan sing trigo, kag ibutang ang kuwarta sang tagsa ka tawo sa iya sako kag pabalunan sila sing pagkaon para sa ila dalanon. Gintuman ini.

26 Dayon ginkarga sang mag-ulotod sa ila mga asno ang trigo nga ila gindalawat, kag naglakat sila.

27 Sa ila ginpahuwayan sang gab-i, ang isa sa ila nagbukad sang iya sako sa pagpakaon sang iya asno, kag nakita niya ang iya kuwarta sa baba sang sako.

28 Nagsinggit sia sa iya mga utod, “Gin-uli sa akon ang akon kuwarta kag yari diri sa akon sako.” Kinulbaan gid sila, kag nagtulokay sila nga nagakurog sa daku nga kahadlok, kag nagpamangkotanay, “Ano bala ining ginhimo sang Dios sa aton?”

29 Sang pag-abot nila sa ila amay nga si Jacob didto sa Canaan, ginsugiran nila sia sang tanan nga natabo sa ila.

30 Nagsiling sila, “Ang gobernador sang duta naghambal sing matigdas sa amon, kag nagsumbong sa amon nga nagapang-espiya kami kuno batok sa ila pungsod.

31 Nagsabat kami sa iya, ‘Indi kami malain nga mga tawo. Indi kami mga espiya.

32 Dose kami ka mag-utod nga lalaki, sa isa lang ka amay. Ang isa namon ka utod patay na, kag ang kamanghuran yadto didto upod sa amon amay sa Canaan.’

33 Ang tawo nagsabat, ‘Sa sini nga paagi mahibal-an ko kon maayo kamo nga mga tawo: ang isa sa inyo magapabilin diri sa akon, kag ang iban magakuha sing trigo para sa inyo ginagutoman nga mga panimalay, kag maglakat.

34 Dalha ninyo diri sa akon ang inyo kamanghuran nga utod. Dayon mahibaluan ko nga indi kamo mga espiya, kundi maayo nga mga tawo. Iuli ko sa inyo ang inyo utod, kag sarang kamo makaestar diri kag makanegosyo.’”

35 Sang ibubo nila ang sulod sang ila mga sako, ang puyo nga may kuwarta sang tagsa ka tawo yara sa sako. Sang makita nila ang mga puyo nga may kuwarta, hinadlukan gid sila kag ang ila amay.

36 Ang ila amay nga si Jacob nagsiling sa ila, “Ubosan gid ninyo ako sing mga kabataan. Si Jose wala na, si Simeon wala na, kag karon kuhaon na man ninyo si Benjamin. Ako ang nagaantos!”

37 Si Ruben nagsiling sa iya amay, “Patya ang duha ko ka bata, kon indi ko mabalik si Benjamin sa imo. Itugyan sia sa akon, kag ibalik ko sia sa imo.”

38 Pero si Jacob nagsiling, “Ang akon anak indi makaupod sa inyo. Ang iya utod patay na, kag sia na lang ang nabilin. Basi ano ang matabo sa iya sa dalanon. Tigulang na ako kag indi na ako makaantos sang kasubo nga inyo pagadalhon sa akon. Magapatay ini sa akon.”

Genesis 41 | Genesis 43