Genesis 49

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ang Katapusan nga Pamilinbilin ni Jacob

1 Si Jacob nagtawag sang iya mga anak nga lalaki kag nagsiling, “Magtipon kamo sing tingob, kag sugiran ko kamo kon ano ang mahanabo sa inyo sa palaabuton:

2 “Tilipon kamo kag magpamati, mga anak ni Jacob, pamati kamo sa inyo amay nga si Israel.

3 “Ruben, panganay ko nga anak, ikaw ang akon kusog, kag ang nahauna nga anak sang akon pagkalalaki, ang labing bugalon kag labing makusog sa akon mga anak.

4 Kaangay ikaw sang nagahuganas nga baha, pero indi ikaw ang labing importante, kay nagpakighilawas ka sa akon babayi. Gindagtaan mo ang akon katre, kay ginsakaan mo ini!

5 “Si Simeon kag si Levi mag-utod, ginagamit nila ang ila mga hinganiban sa pagpamintas.

6 Indi ako magbuylog sa ila paghimbon, indi ako magsimpon sa ila pagtilipon, kay nagpatay sila sang tawo sa ila kaakig, kag nagpamiang sila sang mga baka nga toro sa hulohigala.

7 Pakamalauton ang ila kaakig, kay tama ini kabangis, kag ang ila kasingkal, kay ini tama kapintas, palaptahon ko sila sa bug-os nga duta sang Israel, paalaplaagon ko sila sa mga Israelinhon.

8 “Juda, ang imo utod magadayaw sa imo. Ginakuga mo ang imo mga kaaway, ang imo mga utod magasaludo sa imo.

9 Si Juda kaangay sang isa ka leon. Ginapatay niya ang iya tulokbon kag nagabalik sia sa iya palanaguan, nagauntayan sia kag nagaluko, kag wala sing may nagapangahas sa pagtublag sa iya.

10 Si Juda magauyat sang harianon nga setro, ang iya mga kaliwat magagahom sa gihapon. Ang mga pungsod magahatag sa iya sing dulot.

11 Ginahigot niya ang iya tinday nga asno sa balagon sang ubas, sa pinakamaayo gid nga mga balagon, ginalabhan niya ang iya mga bayu sa bino nga mapula.

12 Ang iya mga mata nagapula tungod sa pag-inom sang bino, ang iya mga ngipon maputi sa pag-inom sang gatas.

13 “Si Zabulon magapuyo sa higad sang dagat, ang iya mga baybayon mangindungkaan sang mga sakayan. Ang iya duta magalambot tubtob sa Sidon.

14 “Si Isacar indi maglabaw sa asno, nga nagaluko sa tunga sang iya mga hampilo.

15 Pero nakita niya nga ang palahuwayan maayo, kag ang duta makaluloyag. Gani, ginahanda niya ang iya abaga sa pagpas-an sang dalal-on kag ginpilit sia sa pag-obra subong isa ka ulipon.

16 “Si Dan magagahom sa iya mga tawo. Manginkaangay sila sang iban nga mga tribo sang Israel.

17 Si Dan mangin-isa ka man-og sa higad sang dalan, isa ka dalitan nga man-og sa higad sang banas, nga nagabuntog sang tikod sang kabayo, kag ang nagasakay mahulog nga nagatingkaya.

18 “Nagahulat ako sa imo pagluwas, O Ginoo.”

19 “Si Gad pagasalakayon sang grupo sang mga makawat, pero pagabalusan niya kag lagson sila.

20 “Ang duta ni Aser magapatubas sing manamit nga mga kalan-on. Magapatubas sia sing kalan-on nga bagay sa hari.

21 “Si Neftali usa nga nabuhian, nga nagabata sing matahom nga mga tinday.

22 “Si Jose asno nga talunon sa luyo sang tuboran, talunon nga tinday sang asno sa kilid sang bakulod.

23 Ang mga kaaway nagasalakay sa iya sing mapintas, ginalagas nila sia sang ila mga pana.

24 Pero ang iya pana nagapadayon nga mabakod, kag ang iya mga butkon ginapabakod sang gahom sang Gamhanan nga Dios ni Jacob, sang Manugbantay, ang daku nga Bato sang Israel.

25 Ang Dios sang imo amay amo ang nagabulig sa imo, ang Dios nga Makagagahom nga nagabendisyon sa imo, bugay sang ulan gikan sa ibabaw, kag sang madalom nga mga tubig sa idalom sang duta, mga kaayuhan gikan sa mga suso kag tiyan,

26 mga kaayuhan gikan sa uyas kag mga bulak, mga kaayuhan gikan sa dumaan nga mga bukid. Mga butang nga nagahatag kalipay gikan sa mga bakulod nga wala sing katapusan. Kabay nga matungtong ini nga mga bugay sa ulo ni Jose, sa agtang sang isa nga napain sa iya mga utod.

27“Si Benjamin isa ka lobo nga nagapamatay, adlaw kag gab-i nagapamatay sia kag nagakaon.”

28 Amo ini ang dose ka mga tribo sang Israel, kag amo ini ang ginsiling sang ila amay sa ila samtang nagahambal sia sang nagakabagay nga pamilinbilin sa tagsatagsa sa ila.

Ang Kamatayon kag Paglubong kay Jacob

29 Dayon si Jacob nagpamilinbilin sa ila, “Karon nga madali na lang ako mapatay kag magbuylog sa akon mga himata, ilubong ako upod sa akon mga ginikanan sa kuweba nga yara sa uma ni Efron nga Hethanon,

30 sa Macpela, sa nasidlangan sang Mamre, sa duta sang Canaan. Si Abraham nagbakal sini nga kuweba kay Efron nga Hethanon agod himuon nga lulobngan.

31 Didto nila ginlubong si Abraham kag ang iya asawa nga si Sara, si Isaac kag ang iya asawa nga si Rebeca, kag didto ginlubong ko si Lea.

32 Ang uma kag ang kuweba sa sini ginbakal sa mga Hethanon. Ilubong ako ninyo didto.”

33 Sang makatapos si Jacob pamilinbilin sa iya mga anak, naghigda sia liwat kag napatay sia.

Genesis 48 | Genesis 50