Genesis 47

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

1 Dayon gindala ni Jose ang lima sang iya mga utod kag nagkadto sa hari. Nagsiling sia sa hari, “Ang akon amay kag ang akon mga utod nag-abot halin sa Canaan. Dala nila ang ila mga karnero, mga kabakahan kag ang tanan nila nga mga pagkabutang. Yara sila sa duta sang Gosen.”

2 Dayon ginpakilala niya sa hari ang iya lima ka mga utod.

3 Ang hari nagpamangkot sa ila, “Ano ang inyo palangitan-an?” Nagsabat sila, “Sir, manugbantay kami sang hayop kasubong sang amon mga ginikanan.

4 Nagkari kami sa pagpuyo sa sini nga duta, kay sa duta sang Canaan ang gutom tama gid, kag wala kami sing pahalban sang amon mga hayop. Kon mahimo tugoti kami sa pagpuyo sa duta sang Gosen.”

5 Ang hari nagsiling kay Jose, “Karon nga ang imo amay kag mga utod nag-abot,

6 ang duta sang Egipto ila. Papuy-a sila sa duta sang Gosen, ang labing maayo nga bahin sang duta. Kon may yara sa ila nga masaligan, himoa sila nga manugbantay sang akon mga hayop.”

7 Dayon gindala ni Jose ang iya amay kag ginpakilala sa hari. Si Jacob nagbendisyon sa hari,

8 kag ang hari nagpamangkot sa iya, “Pila na ang edad mo?”

9 Si Jacob nagsabat, “Ang akon kabuhi nga pirme lang nagapanglugayaw naglambot na sa 130 ka tuig. Ang mga tinuig diutay kag mabudlay, indi subong sang mga tinuig kag pagpanglugayaw sang akon mga ginikanan.”

10 Sang pagpaalam ni Jacob ginbendisyunan niya liwat ang hari kag naglakat.

11 Dayon ginpapuyo ni Jose ang iya amay kag iya mga utod sa duta sang Egipto, kag ginhatagan niya sila sing labing maayo gid nga duta, malapit sa siyudad sang Rameses, suno sa ginsiling sang hari.

12 Si Jose nagsagod sa iya amay, mga utod, kag sang bug-os nga panimalay sang iya amay, lakip ang mga magamay gid.

Ang Tiggulotom

13 Ang tiggulotom tama gid kag ang bug-os nga kalibutan nawad-an sing kalan-on. Ang mga tawo sang Egipto kag Canaan nagluya tungod sa gutom.

14 Gintipon ni Jose ang tanan nga kuwarta nga gindalawat sang trigo sang mga tawo sang Egipto kag Canaan. Gindala niya ang kuwarta sa palasyo.

15 Sang maubos na ang tanan nga kuwarta sang Egipto kag Canaan, ang tanan nga mga Egiptohanon nagkadto kay Jose kag nagsiling, “Hatagi kami sing kalan-on! Ikaw ang mahibalo agod indi kami magkalamatay! Ang amon kuwarta naubos na.”

16 Si Jose nagsabat, “Dalha ninyo diri ang inyo mga hayop. Bayluhan ko ang inyo mga hayop sing pagkaon kon wala na kamo sing kuwarta.”

17 Gani gindala nila kay Jose ang ila mga hayop, kag ginbayluhan niya sing kalan-on ang ila mga kabayo, mga karnero kag mga kanding, mga baka kag mga asno. Sadto nga tuig ginbayluhan niya sing kalan-on ang tanan nila nga mga hayop.

18 Sang madason nga tuig nagkadto sila kay Jose kag nagsiling, “Sir, indi namon pagtaguon ang kamatuoran nga ang amon kuwarta naubos na, kag ang amon mga hayop yara na sa imo. Wala na sing nabilin nga amon mahatag sa imo, luas sang amon mga lawas kag mga duta.

19 Ikaw ang mahibalo agod indi kami magkalamatay kag indi mapatumbayaan ang amon mga duta. Kuhaa kami kag ang amon mga duta subong bayad sang kalan-on. Dayon mangin-ulipon kami sang hari, kag sia ang magapanag-iya sang amon mga duta. Hatagi kami sing mga binhi agod indi kami mapatay sa gutom kag matamnan namon ang amon mga duta.”

20 Ginbakal ni Jose ang tanan nga duta sa Egipto para sa hari. Ang tagsa ka Egiptohanon napilitan sa pagbaligya sang iya duta, kay ang gutom tama gid. Gani, ang bug-os nga duta nangin-iya sang hari.

21 Ginhimo ni Jose ang mga tawo nga mga ulipon sa bug-os nga duta sang Egipto.

22 Ang wala lang niya mabakal nga duta amo ang iya sang mga pari. Indi na kinahanglan nga ibaligya pa nila ang ila mga duta, kay ang hari naghatag sa ila sing rasyon nga ila pangabuhian.

23 Si Jose nagsiling sa mga tawo, “Dumdoma ninyo nga ginbakal ko kamo kag ang inyo duta para sa hari. Yari ang binhi nga inyo ipanggas sa inyo mga duta.

24 Sa tion sang patubas ihatag ninyo sa hari ang isa sang lima ka bahin sang inyo patubas. Ang nabilin mangin-inyo, para binhi sa inyo palanggasan, kag para kalan-on ninyo kag sang inyo mga panimalay.”

25 Nagsabat sila, “Ginluwas mo ang amon kabuhi kag nagmaayo ka gid sa amon, gani, kami mangin-ulipon sang hari.”

26 Gani, ginhimo ni Jose nga kasugoan para sa duta sang Egipto nga ang isa sang lima ka bahin sang patubas iya sang hari. Ini nga kasugoan nagapadayon tubtob karon. Ang mga duta lamang sang mga pari amo ang wala mangin-iya sang hari.

Ang Katapusan nga Pangabay ni Jacob

27 Ang mga Israelinhon nagpuyo sa Egipto sa duta sang Gosen. Nagmanggaranon sila kag nagdamo ang ila mga kabataan.

28 Si Jacob nagpuyo sa Egipto sing 17 ka tuig tubtob nag-edad sia sing 147 ka tuig.

29 Sang nagahilapit na ang tion sang iya kamatayon, gintawag niya ang iya anak nga si Jose kag nagsiling sa iya, “Kon mahimo magsumpa ka sa akon. Ibutang ang imo kamot sa gin-utlan sang akon duha ka paa kag magsumpa ka sa akon nga indi mo ako pag-ilubong sa Egipto.

30 Luyag ko nga ilubong mo ako sa diin ang akon mga ginikanan ginlubong. Dalhon mo ako sa gwa sang Egipto, kag ilubong mo ako sa ila lulobngan.” Si Jose nagsabat, “Himuon ko ang ginsiling mo.”

31 Si Israel nagsiling, “Magsumpa ka sa akon nga himuon mo ang ginsiling ko.” Si Jose nagsumpa, kag si Jacob nagpasalamat didto sa iya katre.

Genesis 46 | Genesis 48