"Pagkabalaan sang Dios sa Kamatuoran"

Balasahon Subong nga Adlaw

(Miyerkules, Mayo 16, 2018)

Nahauna nga Balasahon:

Binuhatan 20:28-38

Bantayi sing maayo ang inyo kaugalingon kag subong man bantayi ang panong nga gintugyan sa inyo sang Espiritu Santo. Tatapa ninyo ang iglesia sang Dios nga iya ginbakal paagi sa iya kaugalingon nga dugo. Kay nahibaluan ko nga kon makahalin na ako, madamo nga mga lobo nga mapintas ang magasulod sa inyo panong kag magahalit sini nga wala sing luoyluoy. Kag magaabot ang tion nga bisan sa inyo grupo may mga tawo nga magasugid sing mga binutig sa pagpatalang sang mga tumoluo agod magsunod sa ila. Gani, magbantay kamo, kag indi ninyo pagkalimtan nga madamo nga mga luha ang akon ginpatulo sa adlaw kag gab-i sa akon pagtudlo sa tagsa sa inyo sa sulod sang tatlo ka tuig. “Kag karon ginatugyan ko kamo sa pagtatap sang Dios kag sa iya bilidhon nga pulong. Sia sarang makapabakod kag makahatag sa inyo sing mga palanublion nga ginatigana niya para sa tanan niya nga mga tawo. Wala ako magkaibog sang inyo pilak, bulawan ukon bayu. Kamo gid nakahibalo nga nag-obra man ako agod nga masakdag ko ang akon kaugalingon kag ang akon mga kaupdanan. Ginpakita ko sa inyo sa tanan nga bagay, nga paagi sa tudo nga pagpangabudlay dapat kita magbulig sa mga maluya kag aton dumdomon ang ginsiling sang aton Ginoong Jesus, ‘May labi nga kalipay ang paghatag sang sa pagbaton.’ ” Sa tapos makahambal si Pablo, nagluhod sia kaupod nila kag nagpangamuyo. Naghinibi sila tanan sang paghakos nila sa iya kag sang ila paghalok kag pagpaalam sa iya. Nasuboan gid sila sa iya pagsiling nga indi na gid sila magkitaay liwat. Kag gindul-ong nila sia sa sakayan.

Salmo sa Pagsabat:

Mga Salmo 68:29-30, 33-35

Gikan sa imo Templo sa Jerusalem, sa diin ang mga hari nagadala sa imo sing mga dulot, sabdunga ang Egipto, inang mabangis nga sapat sa mga katabun-akan; sabdunga man ang mga pungsod, inang manara sang toro nga mga baka upod sang ila mga tinday, tubtob nga magyaub sila tanan kag magdulot sa imo sang ila pilak. Paalaplaaga ang mga tawo nga palaaway! sa iya nga nagapanakayon sa kalangitan, ang dumaan nga kalangitan! Pamati kamo sa iya singgit nga nagadaguob! Ibantala ang gahom sang Dios; ang iya pagkahalangdon yara sa bug-os nga Israel, ang iya gahom yara sa kalangitan. Daw ano ka halangdon ang Dios sa iya balaan nga puloy-an, ang Dios sang Israel! Nagahatag sia sang kusog kag gahom sa iya mga tawo. Dayawon ang Dios!

Aleluya:

Juan 17:17

Ang imo pulong kamatuoran; pakabalaana sila paagi sa kamatuoran.

Ebanghelyo Subong nga Adlaw:

Juan 17:11-19

Kag karon magakadto ako sa imo; ako wala na sa kalibutan, pero sila yara pa sa kalibutan. O balaan nga Amay! Paagi sa gahom sang imo ngalan bantayi sila nga ginhatag mo sa akon, agod mangin-isa sila subong nga ikaw kag ako isa. Sang ako kaupod pa nila, ginbantayan ko sila paagi sa gahom sang imo ngalan nga ginhatag mo sa akon. Ginbantayan ko sila, kag wala sing isa sa ila nga nadula, luas sa tawo nga madula gid man agod matuman ang kasulatan. Karon magakadto ako sa imo kag ginasiling ko ini nga mga butang sa kalibutan, agod maangkon nila sing bug-os ang akon kalipay. Ginpaalinton ko sa ila ang imo mensahi, kag gindumtan sila sang kalibutan, kay indi sila iya sang kalibutan, subong nga ako man indi iya sang kalibutan. Wala ako nagapangayo nga kuhaon mo sila sa kalibutan, kundi nga apinan mo sila batok sa Malaut. Subong nga ako indi iya sang kalibutan, sila man indi iya sang kalibutan. Pakabalaana sila paagi sa kamatuoran; ang imo pulong kamatuoran. Ginpadala ko sila sa kalibutan subong nga ginpadala mo ako sa kalibutan. Tungod sa ila ginahalad ko ang akon kaugalingon sa imo, agod mangin-imo sila paagi sa kamatuoran. 

Mayo 15 | Mayo 17