Balasahon Subong nga Adlaw
(Sabado, January 27, 2018)
2 Samuel 12:1-7, 10-17
Ang GINOO nagpadala kay Natan nga propeta kay David. Si Natan nagkadto sa iya kag nagsiling, “May duha ka tawo nga nagapuy sa isa ka banwa; ang isa manggaranon kag ang isa imol! Ang manggaranon may madamo nga mga baka kag mga karnero, samtang ang imol may isa lang ka cordero nga iya ginbakal. Ginsagod niya ini kag nagdaku sa iya balay upod sa iya mga kabataan. Iya ini ginapakaon sang iya kaugalingon nga pagkaon, ginapainom sa iya kaugalingon nga kupa, kag iya ini ginsabaksabak. Para sa iya ang cordero daw pareho sang bata niya nga babayi. Sang isa ka adlaw, may bisita nga nag-abot sa balay sang manggaranon. Ang manggaranon nga tawo indi luyag mag-ihaw sang isa sang iya kaugalingon nga mga sapat agod ipakaon sa iya bisita; sa baylo, ginkuha niya ang cordero sang imol nga tawo kag ginluto ini para sa iya bisita.” Si David naakig gid sa tawo nga manggaranon kag nagsiling, “Ginagasumpa ko sa buhi nga GINOO nga ang tawo nga naghimo sina dapat patyon! Dapat sia magbayad sing apat ka pilo sang iya ginkuha, tungod sining iya ginhimo nga wala sing patugsiling." Si Natan nagsiling kay David, “Ikaw amo ang tawo. Kag amo ini ang ginasiling sang GINOONG Dios sang Israel, ‘Ginhimo ko ikaw nga hari sang Israel kag ginluwas ko ikaw kay Saul. Karon sa tagsa ka kaliwatan, ang iban sang imo mga kaliwat mapatay sa makangilidlis nga kamatayon, tungod kay wala mo ako gintuman kag ginkuha mo ang asawa ni Urias. Ginasumpa ko sa imo nga ang isa ka katapo sang imo panimalay magagamo sa imo. Makita mo ini kon kuhaon ko ang imo mga asawa kag ihatag sila sa iban nga tawo; kag magapakighilawas sia sa ila sing dayag. Nagpakasala ka sing tago, pero himuon ko nga matabo ini sing dayag, agod nga makita sang bug-os nga Israel.’” Si David nagsiling, “Nakasala ako batok sa GINOO.” Nagsabat si Natan, “Ang GINOO nagapatawad sa imo; indi ikaw mapatay. Pero tungod kay ginlalis mo ang GINOO sa paghimo sini, ang imo anak mapatay. Dayon si Natan nagpauli. Ang GINOO nagpamasakit sang bata nga ginbun-ag sang asawa Urias kay David. Si David nagpangamuyo sa Dios nga ang bata magaayo. Wala sia magkaon bisan ano kag sa kada gab-i nagasulod sia sa iya kuwarto kag maghapaon sa salog. Ang iya mga opisyales sa korte nagkadto sa iya sa pagtinguha nga magbangon sia, pero indi gid sia kag wala sia magkaon sing bisan ano upod sa ila.
Salmo sa Pagsabat:
Mga Salmo 51:12-13, 14-15, 16-17
Iuli sa akon ang kalipay sang imo kaluwasan, kag himoa ang akon espiritu nga magmatinumanon. Dayon tudluan ko ang mga makasasala sang imo mga sugo, kag magabalik sila sa imo. Luwasa ang akon kabuhi, O Dios nga akon manlulowas, kag ibantala ko sing malipayon ang imo pagkamatarong. O Ginoo, buligi ako sa paghambal, kag akon ikaw dayawon. Indi ka luyag sang mga halad, kay kuntani magahalad ako; wala ka malipay sang mga halad nga sinunog. Ang akon halad, O Dios, amo ang mapainuboson nga espiritu, ang mapainuboson kag matinumanon nga tagipusoon indi mo pagsikwayon.
Ebanghelyo Subong nga Adlaw:
Marcos 4:35-41
Sang sirom na sang amo nga adlaw, nagsiling si Jesus sa iya mga gintuton-an, “Dali, matabok kita sa pihak sang linaw.” Gani ginbayaan nila ang madamo nga mga tawo. Dayon ang mga gintuton-an nagsakay sa sakayan nga ginasakyan ni Jesus, kag gindala nila sia upod sa ila. May iban man nga mga sakayan didto. Sa hinali nagmadlos ang hangin kag ang mga balod nagsulod sa sakayan sa bagay nga madali na lang ini makapan. Pero si Jesus didto sa ulin nga nagaulon sa ulonan kag nagakatulog. Ginpukaw sia sang mga gintuton-an, kag nagsiling sila sa iya, “Manunodlo, wala ka bala nagakabalaka nga daw malumos na kita?” Nagbangon si Jesus kag ginmanduan niya ang hangin, “Mag-untat ka!” kag nagsiling sia sa mga balod, “Maglinaw ka!” Nag-untat ang hangin kag may daku nga kalinaw. Dayon si Jesus nagsiling sa ila, “Ngaa bala nahadlok gid kamo? Ano, wala pa bala kamo sing pagtuo?” Pero tama gid ang ila kahadlok, kag nagpamangkutanay sila: “Sin-o bala ini nga tawo? Bisan pa ang hangin kag ang mga balod nagatuman sa iya!”
No comments:
Post a Comment