Ang Inyo Amay sa Langit Nakahibalo na sang Inyo Kinahanglan

Liturhiya sang Pulong

(Huwebes, Hunyo 21, 2018)

Ang Pagbasa gikan sa Libro ni:

Sirac 48:1-14

Dayon nagpahayag kaangay sang kalayo si Elias nga propeta, ang iya mga pulong nagdabdab kaangay sang sulo. Sia amo ang nagdala sing gutom sa ila, nga tungod sang iya kaakig namilagpilag sila. Sa pulong sang Ginoo gintakpan niya ang kalangitan, sa makatlo nagpapanaog sia sing kalayo. Daw ano ka mahimayaon sa imo, sa imo mga milagro, O Elias! May yara bala nga makapabugal kaangay sa imo? Ginbanhaw mo ang patay gikan sa lulobngan tungod sa pulong sang Labing Mataas; ginguyod mo ang mga hari sa kalaglagan, kag ang mga gamhanan nga mga pangulo halin sa ila mga higdaan; makabati ikaw sang pagsabdong sa Sinai kag sang mga mando sa pagsilot sa Horeb; ginhaplas mo ang mga hari subong nga manugtimalos, kag ang mga propeta nga magabulos sa imo; gindala ikaw paibabaw sa isa ka buhawi nga kalayo, sa isa ka karuwahi upod sang nagakalayo nga mga kabayo; ginpili ikaw sa pagtagna sang silot sa paglikaw sang kaakig sang Dios sa wala pa ini magtupa, sa pagpasag-uli sang mga ginikanan sa ila mga kaanakan, kag sa pagpabalik sang mga tribo ni Jacob, malipayon ang mga nakakita sa imo, kag ang mga nagkalatulog sa gugma; kay kita man makaangkon sang kabuhi. Si Elias nalikopan sang buhawi kag si Eliseo napun-an sang iya espiritu; sa bug-os niya nga kabuhi wala sing pangulo nga makapahog sa iya, kag wala sing isa nga makagahom sa iya. Wala sing hilikuton nga mabudlay sa iya, kag bisan sa iya kamatayon ang iya bangkay nagtagna. Sang buhi pa sia naghimo sia sing mga kalatingalahan, kag sa iya kamatayon ang iya mga binuhatan makatilingala.

Salmo sa Pagsabat:

Mga Salmo 97:1-2, 3-4, 5-6, 7

(S) Tanan kamo nga mga matarong, magkalipay sa Ginoo.

Ang GINOO amo ang hari! Magkalipay ka, O duta! Magkalipay kamo, tanan nga mga isla sang kadagatan! Ang mga panganod kag kadudolman yara sa palibot niya; ang iya ginharian napasad sa katarungan kag hustisya. (S)
Ang kalayo nagauna sa iya, kag nagasunog sa iya mga kaaway sa palibot niya. Ang iya kilat nagapasanag sang kalibutan; ang duta nakakita sini kag nagakurog. (S)
Ang mga bakulod nagakatunaw subong sang kandila sa atubangan sang GINOO, sa atubangan sang Ginoo sang bug-os nga duta. Ang kalangitan nagabantala sang iya pagkamatarong, kag ang tanan nga katawuhan nakakita sang iya himaya. (S)
Ang tanan nga nagasimba sa mga larawan nahuya, ang tanan nga nagapabugal sang ila mga diosdios; ang tanan nga mga dios nagayaub sa atubangan niya. (S)

Aleluya:

Roma 8:15

Iya kamo ginahimo nga mga anak sang Dios, kag paagi sa gahom sang Espiritu nagapanawag kita sa Dios, “O Amay, Amay ko!”

Ang Pagbasa sang Santos nga Ebanghelyo suno kay:

San Mateo 6:7-15

“Sa inyo pagpangamuyo indi kamo maggamit sang madamo nga mga pulong nga wala sing pulos subong sang ginahimo sang mga pagano, nga nagahunahona nga pagapamatian sila sang Dios tungod kay malawig ang ila mga pangamuyo. Indi kamo magmanginkaangay sa ila, kay ang inyo Amay nakahibalo na sang inyo kinahanglan sa wala pa kamo makapangamuyo. Gani dapat kamo magpangamuyo sing subong sini: ‘Amay namon nga yara sa langit, pakabalaanon ang imo ngalan, magkari ang imo ginharian, matuman ang imo kabubot-on diri sa duta subong man sang sa langit. Hatagi kami karon nga adlaw sang kalan-on nga amon kinahanglanon, patawara kami sang amon mga sala, subong nga ginapatawad man namon ang mga nakasala sa amon. Indi kami pag-ipadaog sa mga pagsulay, kundi luwasa kami sa malaut.’ “Kay kon ginapatawad ninyo ang mga nakasala sa inyo, ang inyo Amay sa langit magapatawad man sang inyo mga sala. Pero kon wala ninyo ginapatawad ang mga nakasala sa inyo, ang inyo Amay sa langit indi man magpatawad sa inyo.”

Hunyo 20 | Hunyo 22