"Ang Bisan Sin-o nga Nagahimo sing Milagro paagi sa Akon Ngalan"

Balasahon Subong nga Adlaw

(Miyerkules, Mayo 23, 2018)

Nahauna nga Balasahon:

Santiago 4:13-17

Karon pamati kamo sa akon, kamo nga nagasiling, “Karon ukon buas magakadto kita sa isa ka siyudad. Didto kita mapuyo sing isa ka tuig, manegosyo kag magpangita sing madamo nga kuwarta.” Wala gani kamo makahibalo kon ano ang matabo sa inyo sa buas! Kay kaangay kamo sang manipis nga ambon, nga nagapakita sa indi lamang madugay kag nagakawala. Gani amo ini ang dapat ninyo isiling, “Kon itugot sang Ginoo, magakabuhi kita kag magahimo sini ukon sina.” Pero karon nagapabugal kamo, kag nagapadayawdayaw. Ina tanan nga pagpadayawdayaw malain. Gani, ang nakahibalo sang maayo nga dapat niya himuon kag wala niya ginahimo ini nagapakasala.

Salmo sa Pagsabat:

Mga Salmo 49:2-3, 6-7, 8-10, 11

Mga dungganon kag kubos, mga manggaranon kag mga imol man. Magahunahona ako sang mapuslanon nga mga hunahona, magahambal ako sang mga pulong sang kaalam. Sang mga tawo nga nagasalig sa ila mga manggad, nga nagapabugal sang ila madamo nga mga pagkabutang. Ang tawo indi gid makatubos sang iya kaugalingon; indi sia makasarang sa pagbayad sa Dios sang bili sang iya kabuhi, tungod kay tama ka mahal ang kabuhi sang isa ka tawo. Ang iya sarang mabayad indi tuman sa pagpalikaw sa iya sa lulobngan, agod magkabuhi sia sing walay katapusan. Makita niya nga bisan ang mga maalam nagakamatay, subong man ang mga buangboang kag mga balingag. Ginabilin nila ang ila mga manggad sa ila mga kaliwat. Ang ila mga lulobngan amo ang ila puloy-an sa wala sing katapusan, didto magapabilin sila sa tanan nga tion, bisan pa nga sang una may mga duta sila nga kaugalingon.

Aleluya:

Juan 14:6

Ako amo ang dalan, ang kamatuoran, kag ang kabuhi; wala sing may makakadto sa Amay kon indi paagi sa akon. 

Ebanghelyo Subong nga Adlaw:

Marcos 9:38-40

Si Juan nagsiling sa iya, “Manunodlo, nakakita kami sang isa ka tawo nga nagatabog sang mga yawa sa imo ngalan, kag gintapna namon sia kay indi sia kaupod naton.” Si Jesus nagsiling, “Pabay-i lang ninyo sia kay wala sing may nagahimo sing milagro paagi sa akon ngalan kag makahambal dayon sing malain batok sa akon. Kay ang bisan sin-o nga indi batok sa aton kaapin naton.

Mayo 22 | Mayo 24