"Ginoo, Ipakita sa Amon ang Amay"

Balasahon Subong nga Adlaw

(Sabado, April 28, 2018)

Nahauna nga Balasahon:

Binuhatan 13:44-52

Sang madason nga Adlaw nga Inugpahuway halos ang tanan nga mga pumoluyo sang banwa nagtipon sa pagpamati sang pulong sang Ginoo. Sang makita sang mga Judio ang kadamuon sang mga tawo, nahisa gid sila kag naghambal sila batok sa mga ginpanghambal ni Pablo kag ginpakahuy-an nila sia. Pero nagdugang pa gani ang kaisog ni Pablo kag ni Bernabe sa paghambal kag nagsiling sila, “Kinahanglan gid man nga iwali sing una sa inyo ang pulong sang Dios. Pero tungod kay ginasikway ninyo ini, kag wala ninyo ginakilala nga takos kamo sa pagbaton sang kabuhi nga wala sing katapusan, bayaan namon kamo kag magkadto sa mga Gentil. Kay amo ini ang sugo nga ginhatag sang Ginoo sa amon: ‘Ginbutang ko ikaw Nga manginkapawa sa mga Gentil, Nga mangin-alagyan sang kaluwasan Para sa bug-os nga kalibutan.’” Sang pagkabati sang mga Gentil sini nalipay sila kag gindayaw nila ang mensahi sang Ginoo, kag yadtong mga ginpili para sa kabuhi nga walay katapusan nangintumoluo. Naglapnag ang pulong sang Dios sa sadto nga duog. Ugaling ginsudyot sang mga Judio ang kinilala nga mga tawo sa amo nga siyudad, kag subong man ang mga Gentil nga mga babayi sa mataas nga mga katipunan nga nagasimba sa Dios. Ginsugdan nila ang paghingabot kay Pablo kag kay Bernabe, kag gintabog nila sila pa gwa sa ila duta. Gintaktak sang mga apostoles ang yab-ok sa ila mga tiil batok sa ila, kag nagpadayon sila pa Iconio. Ang mga gintuton-an sa Antioquia napun-an sang kalipay kag sang Espiritu Santo.

Salmo sa Pagsabat:

Mga Salmo 98:1, 2-3, 3-4

Magkanta sing bag-o nga ambahanon sa Ginoo kay nakahimo sia sang makatilingala nga mga butang! Paagi sa iya kaugalingon nga gahom kag balaan nga kusog, nagdaog sia. Ginbantala sang Ginoo ang iya pagdaog, ginpakilala niya sa mga pungsod ang iya gahom sa pagluwas. Gintuman niya ang iya saad sa mga tawo sang Israel, nga may mapinadayunon nga gugma kag pag-unong sa ila. Ang tanan nga katawuhan bisan diin nakakita sang pagdaog sang aton Dios! Magkanta kamo sa kalipay sa Ginoo, O bug-os nga duta; dayawa sia sa mga ambahanon kag mga paghinugyaw!

Aleluya:

Juan 8:31-32

Gani si Jesus nagsiling sa mga Judio nga nagtuo sa iya, “Kon ginatuman ninyo ang akon mga ginatudlo, matuod gid nga mga gintuton-an ko kamo, kag makilala ninyo ang kamatuoran.”

Ebanghelyo Subong nga Adlaw:

Juan 14:7-14

Karon nga nakilala ninyo ako, inyo man makilala ang akon Amay, kag sugod karon inyo gid sia nakilala kag nakita.” Si Felipe nagsiling sa iya, “Ginoo, ipakita sa amon ang Amay, kag tuman na ina para sa amon.” Si Jesus nagsabat, “Dugay na ang aton pag-inupdanay, Felipe, kag wala pa ikaw makakilala sa akon? Ang nakakita sa akon nakakita sa Amay. Ngaa bala masiling ka, ‘Ipakita sa amon ang Amay’? Felipe, wala ka bala nagatuo nga ako yara sa Amay kag ang Amay yari sa akon? Ang mga pulong nga ginhambal ko sa inyo, wala nagagikan sa akon. Ang Amay nga yari sa akon amo gid ang nagahimo sang iya mga buhat. Magtuo kamo nga ako yara sa Amay, kag ang Amay yari sa akon. Kon indi gani, magtuo kamo tungod sining mga buhat. Nagasiling ako sa inyo sang matuod: ang nagatuo sa akon magahimo sang mga buhat nga akon ginahimo, kag dalagku pa sini nga mga buhat ang iya himuon, kay ako magakadto sa Amay. Kag akon himuon ang bisan ano nga inyo pangayuon sa akon ngalan, agod nga ang himaya sang Amay mapakita paagi sa Anak. Kon kamo magpangayo sa akon sang bisan ano nga butang sa akon ngalan, akon ina pagahimuon.”

April 27 | April 29