Genesis 21

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ang Pagkatawo ni Isaac

1 Ginbendisyunan sang GINOO si Sara, suno sa ginsaad niya,

2 kag nagbusong sia kag nagbata sing lalaki tungod kay Abraham nga tigulang na. Ang bata natawo sa tion gid nga ginpat-od sang Dios.

3 Ginhingalanan sia ni Abraham kay Isaac.

4 Sang walo na ka adlaw ang bata, gintuli sia ni Abraham suno sa ginsugo sang Dios sa iya.

5 Si Abraham nagaedad sing 100 ka tuig sang pagkatawo ni Isaac.

6 Si Sara nagsiling, “Ang Dios naglipay kag nagpakadlaw sa akon. Ang tanan nga makabati nahanungod sini magakadlaw upod sa akon.”

7 Dayon nagsiling pa gid sia, “ Sin-o ayhan ang magsiling kay Abraham nga si Sara magapasuso sing mga anak? Pero nahatagan ko sia sing bata nga lalaki sa iya katigulangon.”

8 Ang bata nagdaku, kag sa adlaw nga ginlutas sia, si Abraham naghiwat sing isa ka daku nga punsyon.

Si Agar kag si Ismael Ginpalayas

9 Isa ka adlaw, si Ismael nga bata ni Abraham kay Agar nga Egiptohanon nagahampang upod kay Isaac nga bata ni Sara.

10 Nakita ini ni Sara, gani nagsiling sia kay Abraham, “Palayasa ining ulipon nga babayi kag ang iya bata. Ang bata sining ulipon nga babayi indi dapat magpanubli sang bahin sang imo manggad nga panublion sang akon bata nga si Isaac.”

11 Nagtublag gid si Abraham tungod sini kay si Ismael bata man niya.

12 Pero ang Dios nagsiling kay Abraham, “Indi ka magpalibog nahanungod sa bata kag sa imo ulipon nga si Agar. Himoa ang ginasiling sa imo ni Sara, kay paagi kay Isaac makaangkon ka sing mga kaliwat nga akon ginsaad.

13 Hatagan ko man sing madamo nga mga kaanakan ang bata sang ulipon, agod mahimo sila nga isa ka pungsod. Anak mo man sia.”

14 Aga pa sang madason nga adlaw si Abraham naghatag kay Agar sing pagkaon kag sing sulodlan nga panit nga puno sing tubig. Ginpakugos ni Abraham kay Agar ang bata kag ginpalakat sila. Naglakat si Agar kag nagdalangdalang sa kawayangan sang Beerseba.

15 Sang naubos na ang tubig, ginbilin niya ang bata sa idalom sang kahuykahoy,

16 kag nagpungko sia sa unhan nga ang kalayuon mga 100 ka bara. Nagsiling sia sa iya kaugalingon, “Indi ako makabatas sa pagtan-aw sang akon bata nga mapatay.” Sang nagapungko sia didto ang bata naghibi.

17 Nabatian sang Dios ang hibi sang bata, kag ang anghel sang Dios halin sa langit naghambal kay Agar, “Ano ang ginapaligban mo, Agar? Indi ka mahadlok. Ang Dios nakabati sang hibi sang bata.

18 Magtindog ka, kugosa ang bata, kag pahipusa sia. Pagahimuon ko nga daku nga pungsod ang iya mga kaliwat.”

19 Dayon ginbuksan sang Dios ang iya mga mata kag nakita niya ang isa ka bubon. Nagkadto sia sa bubon kag ginsudlan niya sing tubig ang iya sulodlan kag ginpainom niya ang bata.

20 Ang Dios nag-ubay sa bata sa nagatubo sia. Nagpuyo sia sa kawayangan sang Paran kag nanginmatanda nga manugpana.

21 Ginpaasaw-an sia sang iya iloy sang taga-Egipto.

Ang Kasugtanan ni Abraham kag ni Abimelec

22 Sa sadto nga tion si Abimelec kag si Picol nga pangulo sang iya hangaway nagkadto kay Abraham kag nagsiling, “Ang Dios nagaupod sa imo sa tanan mo nga ginahimo.

23 Gani, magsumpa ka diri sa atubangan sang Dios nga indi mo ako paglimbungan, ukon ang akon mga kabataan, ukon ang akon mga kaliwat. Nagmainunongon ako sa imo, gani magsaad ka nga magmainunongon ka man sa akon kag sa sini nga duta nga imo ginapuy-an.”

24 Si Abraham nagsiling, “Nagasaad ako.”

25 Si Abraham nagyamo kay Abimelec nahanungod sang bubon nga gin-agaw sang mga ulipon ni Abimelec.

26 Si Abimelec nagsiling, “Wala ako makahibalo kon sin-o ang naghimo sini. Wala mo ako pagsugiri, kag amo pa lang ako makabati nahanungod sini.”

27 Dayon ginhatagan ni Abraham si Abimelec sing mga karnero kag mga baka, kag sila nga duha naghimo sing kasugtanan.

28 Si Abraham nagpain sing pito ka cordero gikan sa iya mga karnero.

29 Si Abimelec nagpamangkot sa iya, “Ngaa ginhimo mo ina?”

30 Si Abraham nagsabat, “Batuna ining pito ka mga cordero. Sa imo pagbaton sini ginakilala mo nga ako ang nagkutkot sini nga bubon.”

31 Gani ang duog gintawag nga Beerseba, kay sila nga duha nagsumpaanay didto.

32 Sa tapos sila makahimo sini nga kasugtanan sa Beerseba, si Abimelec kag si Picol nagbalik sa duta sang mga Filistinhon.

33 Dayon si Abraham nagtanom sing isa ka kahoy sa Beerseba, kag nagsimba sia sa GINOO, ang Dios nga Wala sing Katapusan.

34 Si Abraham nagpuyo sa duta sang mga Filistinhon sa malawig nga panahon.

Genesis 20 | Genesis 22