Genesis 48

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ginbendisyunan ni Jacob si Efraim kag Si Manases

1 Sang ulihi, si Jose ginsugiran nga ang iya amay nagamasakit. Gani gindala niya ang iya duha ka anak nga lalaki nga si Manases kag si Efraim kag nagduaw sila kay Jacob.

2 Sang ginsugiran si Jacob nga yara si Jose sa pagduaw sa iya, nagtinguha sia sa pagpungko sa iya katre.

3 Si Jacob nagsiling kay Jose, “Ang Dios nga Makagagahom nagpakita sa akon sa Luz sa duta sang Canaan kag nagbendisyon sa akon.

4 Nagsiling sia sa akon, ‘Hatagan ko ikaw sing madamo nga mga kabataan, agod ang imo mga kaliwat manginmadamo nga mga pungsod. Ihatag ko ining duta sa imo mga kaliwat subong ila pagkabutang sa wala sing katubtoban. ‘”

5 Si Jacob nagsiling pa gid, “Ang imo duha ka anak nga lalaki nga natawo sa imo sa Egipto sa wala pa ako makakari diri, akon man sila. Si Efraim kag si Manases mangin-akon subong nga si Ruben kag si Simeon akon.

6 Pero ang mga kabataan nga matawo sa imo sa ulihi nila mangin-imo, kag sila magabaton sang palanublion halin kay Efraim kag kay Manases.

7 Ginahimo ko ini, tungod sa inyo iloy nga si Raquel. Daku gid ang akon kasubo sang napatay sia sa duta sang Canaan sang nagapabalik ako halin sa Mesopotamia, samtang malapit na kami sa Efrata. Ginlubong ko sia didto sa dalanon pa Efrata.” (Ang Efrata amo na karon ang Betlehem.)

8 Sang pagkakita ni Jacob sang mga anak nga lalaki ni Jose nagpamangkot sia, “Sin-o ining mga kabataan?”

9 Si Jose nagsabat, “Mga kabataan ko ini nga ginhatag sang Dios sa akon diri sa Egipto.” Si Jacob nagsiling, “Kon mahimo dalha sila diri sa akon agod mabendisyunan ko sila.”

10 Ang panulok ni Jacob madulom na tungod sang iya katigulangon, kag indi na sia makakita. Gindala ni Jose ang kabataan sa iya, kag ginhakos niya sila kag ginhalukan.

11 Si Jacob nagsiling kay Jose, “Wala na gid ako maglaom nga makita ko pa ikaw liwat, pero karon ang Dios nagtugot sa akon nga makakita ako bisan pa sang imo mga anak.”

12 Dayon ginkuha sila ni Jose sa sabak ni Jacob, kag nagsaludo sia tubtob sa duta sa atubangan ni Jacob

13 Gin-uyatan ni Jose ang kabataan sa kamot, si Efraim sa iya tuo, agod nga maigo sia sa wala ni Jacob, kag si Manases sa iya wala, agod maigo sia sa tuo ni Jacob, kag gindala niya sila sa kay Jacob.

14 Pero ginpalambid ni Jacob ang iya mga kamot, kag ginbutang niya ang iya tuo nga kamot sa ulo ni Efraim bisan nga manghod sia, kag ang iya wala nga kamot sa ulo ni Manases nga amo ang magulang.

15 Dayon ginbendisyunan niya sila nga nagasiling: “Kabay nga ang Dios magbendisyon sini nga mga kabataan, ang Dios nga gin-alagad sang akon ginikanan nga si Abraham kag si Isaac. Kabay nga ang Dios, nga nagtuytoy sa akon tubtob karon nga adlaw, magbendisyon sa ila.

16 Kabay nga ang anghel, nga nagluwas sa akon sa tanan nga katalagman, magbendisyon sa ila. Kabay nga ang akon ngalan, kag ang ngalan sang akon mga ginikanan nga si Abraham kag si Isaac pagadumdomon gihapon sa ila. Kabay nga magdamo ang ila mga kabataan kag mga kaliwat.”

17 Naglain ang buot ni Jose sang pagkakita niya nga ang iya amay nagtungtong sang iya tuo nga kamot sa ulo ni Efraim. Gani, gin-uyatan niya ang kamot sang iya amay nga halinon kuntani halin sa ulo ni Efraim pakadto sa ulo ni Manases.

18 Nagsiling sia sa iya amay, “Tay, indi amo ina. Amo ini ang magulang. Itungtong ang imo tuo nga kamot sa iya ulo.”

19 Pero ang iya amay nagpangindi nga nagasiling, “Nakahibalo ako, toto, nakahibalo ako. Ang mga kaliwat ni Manases mangingamhanan man nga mga tawo, pero ang iya manghod mangingamhanan pa sa iya, kag ang iya mga kaliwat mangingamhanan nga mga pungsod.”

20 Gani, ginbendisyunan niya sila sadto nga adlaw nga nagasiling, “Ang mga Israelinhon magagamit sang inyo ngalan sa pagbendisyon. Magasiling sila, ‘Kabay nga ang Dios maghimo sa inyo subong kay Efraim kag kay Manases.’” Sa sini nga paagi ginpauna ni Jacob si Efraim kay Manases.

21 Dayon si Jacob nagsiling kay Jose, “Tan-awa, madali na lang ako mapatay, pero ang Dios magaupod sa imo, kag pabalikon niya ikaw sa duta sang imo mga ginikanan.

22 Sa imo ko ginahatag ang Siquem, kag indi sa imo mga utod, inang pinili nga bahin nga akon ginkuha sa mga Amornon paagi sa espada kag pana.”

Genesis 47 | Genesis 49