Genesis 45

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Si Jose Nagpakilala sa Iya mga Utod

1 Si Jose indi na makapugong sang iya kaugalingon sa atubangan sang tanan nga nagaalagad sa iya, gani, ginmanduan niya sila tanan sa paggowa. Gani, wala sing iban nga tawo nga nagatambong sang pagsugid ni Jose sa iya mga utod kon sin-o sia.

2 Tudo gid ang iya urahab sa bagay nga ang mga Egiptohanon nakabati sini kag ginsugid nila ini sa palasyo sang hari.

3 Si Jose nagsiling sa iya mga utod, “Si Jose ako. Buhi pa bala ang akon amay?” Pero ang iya mga utod hinadlukan gid sa iya, gani indi sila makasabat.

4 Dayon si Jose nagsiling sa ila, “Kon mahimo magpalapit kamo sa akon.” Nagpalapit sila, kag nagsiling sia, “Utod ninyo ako nga si Jose, nga inyo ginbaligya sa Egipto.

5 Karon, indi kamo magkalisod ukon magpakalain sang inyo kaugalingon kay ginbaligya ninyo ako diri. Ang Dios amo ang nagpauna sa akon diri sa pagluwas sang inyo mga kabuhi.

6 Ikaduha pa lang ini nga tuig sang tiggulotom sa duta. May lima pa ka tuig nga wala sing pag-arado ukon pag-ani.

7 Ang Dios nagpadala sa akon sing una sa inyo sa pagluwas sa inyo sa sining makatilingala nga paagi agod indi kamo kag ang inyo mga kaliwat magkalamatay.

8 Gani indi kamo ang nagpadala sa akon diri, kundi ang Dios. Ginhimo niya ako subong nga amay sa hari. Ako ang manugdumala sang iya bug-os nga duta, kag ako ang nagagahom sang bug-os nga Egipto.

9 “Karon dalidali kamo kag magbalik sa akon amay kag singgana sia nga amo ini ang ginasiling sang iya anak nga si Jose, ‘Ang Dios naghimo sa akon nga manugdumala sang bug-os nga Egipto. Magkari ka diri sa akon sa labing madali.

10 Ikaw sarang makapuyo sa duta sang Gosen upod sa imo mga kabataan, mga kaapuhan, mga karnero kag mga kanding, mga baka kag ang tanan mo nga pagkabutang sa diin manginmalapit ikaw sa akon.

11 Kon didto ikaw sa Gosen, matatapan ko ikaw. May lima pa ka tuig nga tiggulotom, kag indi ako luyag nga ikaw, ang imo panimalay kag ang tanan mo nga kahayupan magutoman.’”

12 Si Jose nagpadayon sa pagsiling, “Karon tanan kamo, kag ikaw man, Benjamin, makakita nga ako gid si Jose.

13 Sugiri ang akon amay kon daw ano kagamhanan sa akon diri sa Egipto, kag sugiri sia sang tanan nga inyo nakita. Dayon magdalidali kamo kag dalha sia diri.”

14 Ginhakos niya ang iya utod nga si Benjamin kag naghibi. Si Benjamin nagahibi man sang ginahakos niya sia.

15 Ginhalukan man niya ang tanan niya nga mga utod, kag nagahilibion sia sa ginahakos niya sila. Sa tapos sini, ang iya mga utod nakapakighambal sa iya.

16 Sang mabatian ang balita sa palasyo nga ang mga utod ni Jose nag-abot, ang hari kag ang iya mga opisyales nalipay.

17 Ang hari nagsiling kay Jose, “Singgana ang imo mga utod nga kargahan nila ang ila mga hayop, kag magbalik sa duta sang Canaan.

18 Sugaton nila didto ang ila amay kag ang ila mga panimalay, kay magbalik diri. Hatagan ko sila sang pinakamaayo nga duta sa Egipto, kag ang inyo mapatubas sa duta magasobra sa inyo kinahanglanon.

19 Singgana man sila nga magdala sila sing mga karo halin sa Egipto para sa ila mga asawa kag magamay nga mga kabataan. Singgana sila nga dalhon nila ang ila amay kag magkari diri.

20 Indi sila magkanugon kon may mga pagkabutang sila nga mabilin, kay ang pinakamaayo sang bug-os nga duta sang Egipto mangin-ila.”

21 Gintuman ini sang mga anak ni Israel. Ginhatagan sila ni Jose sing mga karo, suno sa ginsiling sang hari, kag ginpabalunan niya sila sing pagkaon sa dalanon.

22 Ginhatagan man niya ang tagsa sa ila sing isa ka ilislan nga bayu, pero ginhatagan niya si Benjamin sing 300 ka bilog nga pilak kag lima ka ilislan nga bayu.

23 Ginpadalhan niya ang iya amay sing napulo ka asno nga kargado sang pinakamaayo nga patubas sang Egipto, kag may napulo pa gid ka mga asno nga kargado sing trigo, tinapay, kag iban nga kalan-on para sa iya amay sa dalanon.

24 Ginpalakat niya ang iya mga utod, kag sang paglakat nila nagsiling sia sa ila, “Indi kamo mag-inaway sa dalanon.”

25 Naghalin sila sa Egipto kag nagpauli sa ila amay nga si Jacob sa Canaan.

26 Nagsugid sila sa iya, “Si Jose buhi pa gali! Manugdumala sia karon sang bug-os nga Egipto!” Si Jacob naurongan, kag indi sia makapati sa ila.

27 Pero sang ginsugiran nila sia sang tanan nga ginsiling ni Jose sa ila, kag sang nakita niya ang mga karo nga ginpadala ni Jose nga magakuha sa ila pa Egipto, nakunyag sia.

28 Dayon nagsiling sia, “Si Jose nga akon anak buhi pa! Tuman na ini para sa akon! Magakadto ako kag magpakigkita sa iya sa wala pa ako mapatay.”

Genesis 44 | Genesis 46