1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50
☆☆☆
Asawa para kay Isaac
1 Si Abraham tigulang na gid, kag ang GINOO nagbendisyon sang tanan nga iya ginhimo.
2 Nagsiling sia sa iya labing tigulang nga suloguon nga amo ang nagaatipan sang tanan niya nga pagkabutang, “Ibutang ang imo kamot sa gin-utlan sang duha ko ka paa kag magsumpa ka.
3 Luyag ko nga magsumpa ka sa akon sa ngalan sang GINOO, ang Dios sang langit kag duta, nga indi ka magpili sing asawa para sa akon anak diri sa mga taga-Canaan sa diin ako nagapuyo.
4 Magbalik ka didto sa akon ginhalinan nga duta kag magkuha gikan sa akon mga paryente sang babayi nga ipaasawa mo kay Isaac nga akon anak.”
5 Pero ang suloguon nagpamangkot, “Abi kon ang babayi indi mag-upod sa akon sa sini nga duta? Pakadtuon ko bala ang imo anak didto sa duta nga imo ginhalinan?”
6 Si Abraham nagsabat, “Indi mo gid pagpabalikon ang akon anak didto!
7 Ang GINOO nga Dios sang langit, nagdala sa akon diri gikan sa puloy-an sang akon amay kag gikan sa duta sang akon mga paryente, kag nagsaad sia sa akon nga nagapanumpa nga ihatag niya ini nga duta sa akon mga kaliwat. Ipadala niya ang iya anghel sa pag-una sa imo, agod nga makakuha ka didto sing asawa para sa akon anak.
8 Kon ang babayi indi mag-upod sa imo, wala na ikaw sing salabton sa sining saad mo sa akon. Pero bisan ano ang matabo, indi mo gid pagpabalikon didto ang akon anak.”
9 Gani ang suloguon nagbutang sang iya kamot sa gin-utlan sang mga paa ni Abraham nga iya agalon, kag nagsumpa sia nga tumanon niya ang ginsiling sa iya ni Abraham.
10 Ang suloguon nga nagaatipan sang tanan nga pagkabutang ni Abraham, nagkuha sang napulo ka kamelyo sang iya agalon kag naghanda sa paglakat sa siyudad ni Nahor, sa Mesopotamia.
11 Sang pag-abot niya, ginpaluko niya ang mga kamelyo sa luyo sang bubon sa gwa sang siyudad. Kasisidmon na sadto, tion sa pagpanag-ob sang mga babayi.
12 Nagpangamuyo ang suloguon, “GINOO, Dios sang akon agalon nga si Abraham, karon patigayuna ang akon tinutoyo kag tumana ang imo saad sa akon agalon.
13 Yari ako karon sa bubon diin ang mga dalaga sang siyudad magakadto sa pagsag-ob sing tubig.
14 Magasiling ako sa isa ka dalaga, ‘Panubonuboa man palihog ang imo tibod kag paimna ako.’ Kon magsiling sia, ‘Mag-inom ka, kag paimnon ko man ang imo mga kamelyo,’ kabay nga sia ang imo napilian para sa imo alagad nga si Isaac. Kon matabo ini, mahibal-an ko nga imo gintuman ang imo saad sa akon agalon.”
15 Sa wala pa sia makatapos sing pangamuyo, si Rebeca nag-abot nga nagapas-an sang iya tibod nga salag-uban. Bata sia ni Betuel nga anak nga lalaki ni Milca. Si Milca asawa ni Nahor nga utod ni Abraham.
16 Isa sia ka matahom nga pamatan-on nga babayi nga ulay pa. Nagdulhog sia pakadto sa bubon, ginsudlan ang iya tibod kag nagbalik.
17 Ang suloguon nagdalagan sa pagsugata sa iya kag nagsiling, “Kon mahimo paimna man ako sa imo tibod.”
18 Nagsiling sia, “Sigi, tyoy, mag-inom ka.” Ginkuha niya sa iya abaga ang tibod kag gin-uyatan samtang nag-inom ang suloguon.
19 Sang pagkatapos niya inom nagsiling ang dalaga, “Dalhan ko man sing tubig ang imo mga kamelyo kag pagustohan sila sing inom.”
20 Dalidali nga ginbubo niya ang tubig sa iya tibod sa ilimnan sang mga sapat kag nagdalagan sia pakadto sa bubon sa pagkuha pa gid sing tubig tubtob nga napainom ang tanan nga mga kamelyo sang suloguon.
21 Ang suloguon nagabantay sing hipos lang sa iya sa paghibalo kon bala ang GINOO nagapatigayon sang iya tinutoyo.
22 Sang matapos ni Rebeca painom ang mga kamelyo, ang suloguon nagkuha sing malahalon nga singsing nga bulawan kag ginhatag ini sa iya, kag duha ka dalagku nga pulseras nga bulawan kag ginsuksok sa iya mga butkon.
23 Nagpamangkot ang suloguon, “Sugiri man ako kon sin-o ang tatay mo? May lugar bala sa balay ninyo nga matulogan ko kag sang akon mga tinawo karon nga gab-i?”
24 Nagsabat sia, “Bata ako ni Betuel nga anak nga lalaki ni Nahor kag ni Milca.
25 May madamo nga dagami kag kumpay sa amon balay, kag may lugar man nga mapahuwayan ninyo.”
26 Dayon ang tawo nagluhod kag nagsimba sa GINOO.
27 Kag nagsiling sia, “Pagadayawon ang GINOO, ang Dios sang akon agalon nga si Abraham, nga matutom sa pagtuman sang iya saad sa akon agalon. Ang GINOO nagtuytoy sa akon padulong sa mga paryente sang akon agalon.”
28 Ang dalaga nagdalagan pauli kag nagpanugid sang bug-os nga natabo.
29 Si Laban, ang utod nga lalaki ni Rebeca, naggwa kag nagdalagan pakadto sa bubon sa diin ang suloguon.
30 Nakita niya ang singsing kag ang mga pulseras sa mga kamot sang iya utod nga babayi kag nabatian niya ang ginpanugid sang iya utod nahanungod sa ginsiling sang suloguon. Dayon nagkadto sia sa diin ang suloguon ni Abraham nagatindog sa luyo sang iya mga kamelyo sa bubon.
31 Nagsiling si Laban, “Dali sa balay. Ikaw ang tawo nga ginbendisyunan sang GINOO. Ngaa diri ka lang sa gwa? May naaman ako nga kuwarto sa balay para sa imo kag sa imo mga kamelyo.”
32 Gani ang suloguon nagsulod sa balay, kag si Laban nagkuha sang mga karga sang mga kamelyo kag ginhatagan niya sila sing dagami kag kumpay. Dayon gindalhan niya sing tubig ang suloguon ni Abraham kag ang iya mga tinawo agod makapanghugas sila sang ila mga tiil.
33 Sang mabutangan na sila sing pagkaon, ang suloguon nagsiling, “Indi ako anay magkaon kon indi ko pa mapabutyag ang akon inugsiling.” Si Laban nagsiling, “Sigi, maghambal ka.”
34 Nagsugod sia sa paghambal, “Suloguon ako ni Abraham.
35 Ang GINOO naghatag sa akon agalon sing madamo nga mga kaayuhan kag nagpamanggad sa iya. Ginhatagan niya sia sing madamo nga mga karnero kag mga kanding, mga baka, pilak, bulawan, mga ulipon nga lalaki kag babayi, mga kamelyo, kag mga asno.
36 Si Sara nga asawa sang akon agalon, nag-anak sing lalaki bisan tigulang na gid sia. Ang akon agalon naghatag sa iya anak sang tanan niya nga pagkabutang.
37 Ginpasumpa niya ako nga tumanon ko ining iya sugo, ‘Indi ka magkuha sing asawa para sa akon anak nga lalaki sa mga dalaga diri sa duta sang Canaan,
38 kondi magkadto ka didto sa mga himata sang akon amay, sa akon mga paryente, kag magpili ka sing palangasaw-on sang akon anak nga lalaki.’
39 Kag nagsiling ako sa akon agalon, ‘Abi, kon ang babayi indi mag-upod sa akon?’
40 Nagsabat sia, ‘Ang GINOO nga akon ginatuman sa tanan nga tion magapadala sang iya anghel upod sa imo kag magatigayon sang imo tinutoyo. Magakuha ikaw sing isa ka babayi didto sa akon mga himata, sa panimalay sang akon amay, nga mangin-asawa sang akon anak.
41 May isa lamang ka paagi nga mahilway ka sa imo ginsumpaan. Kon magkadto ka sa akon panimalay kag indi nila ikaw pagbatunon, ti, wala ka salabton sa imo ginsumpaan.’
42 “Sang pag-abot ko sa bubon karon nga adlaw, nagpangamuyo ako, ‘GINOO, Dios sang akon agalon nga si Abraham, kon mahimo patigayuna man ang akon tinutoyo.
43 Yari ako diri sa bubon. Kon may isa ka dalaga nga maggwa sa pagsag-ob sing tubig, magasiling ako sa iya, “Kon mahimo, paimna man ako sa imo tibod.”
44 Kon magsabat sia, “Sigi mag-inom ka, kag paimnon ko man ang imo mga kamelyo,” kabay nga sia ang napilian sang GINOO nga asawa sang anak sang akon agalon.’
45 Sa wala pa ako makatapos sang akon hipos nga pangamuyo, si Rebeca nag-abot nga may tibod nga sulodlan sang tubig sa iya abaga, kag nagdulhog sia pakadto sa bubon sa pagsag-ob. Nagsiling ako sa iya, ‘Kon mahimo paimna man ako.’
46 Gilayon ginkuha niya sa iya abaga ang tibod kag nagsiling, ‘Sigi, mag-inom ka kag paimnon ko man ang imo mga kamelyo.’ Gani nag-inom ako kag ginpainom man niya ang mga kamelyo.
47 Ginpamangkot ko sia, ‘Sin-o bala ang tatay mo?’ Nagsabat sia, ‘Anak ako ni Betuel nga anak nga lalaki ni Nahor kag ni Milca.’ Dayon ginbutangan ko sang singsing ang iya ilong kag ginsuksokan ko sang mga pulseras ang iya mga butkon.
48 Nagluhod ako kag nagsimba sa GINOO, kag gindayaw ko ang GINOO, ang Dios sang akon agalon nga si Abraham, ang Dios nga nagtuytoy gid sa akon. Gindala niya ako sa utod nga lalaki sang akon agalon, sa diin nakita ko ang iya bata nga babayi para sa anak sang akon agalon.
49 Karon kon may tuyo ka sa pagtuman sang imo katungdanan kag sa paghimo sang nagakaigo para sa akon agalon, kon mahimo, sugiri ako. Kon indi ka, sugiri man ako, agod mapat-od ko kon ano ang himuon ko.”
50 Si Laban kag si Betuel nagsabat, “Tungod kay ini nga butang kabubut-on sang GINOO indi kami dapat magpamalabag,
51 yari si Rebeca; dalha sia kag maglakat. Ipaasawa sia sa anak sang imo agalon, suno sa ginsiling sang GINOO.”
52 Sang pagkabati sang suloguon ni Abraham sang ila mga pulong, nagluhod sia nga nagaduko sa pagsimba sa GINOO.
53 Dayon nagkuha sia sing pilak kag bulawan nga mga alahas kag mga bayu kag ginhatag ini tanan kay Rebeca. Ginhatagan man niya sing malahalon nga mga regalo ang utod nga lalaki ni Rebeca kag ang iya iloy.
54 Dayon ang suloguon kag ang mga tinawo niya nagkaon kag nag-inom, kag nagtulog didto sadto nga gab-i. Pagmata nila sang aga, nagsiling sia, “Mapauli ako sa akon agalon.”
55 Pero ang iloy ni Rebeca kag ang iya utod nga lalaki nagsiling, “Patenira anay ang dalaga diri sing isa ka simana ukon napulo ka adlaw kag sa tapos sina makalakat na sia.”
56 Pero nagsiling sia, “Indi man ninyo ako pagpadugaya diri. Natigayon sang GINOO ang akon tinutoyo, gani tugoti ninyo ako sa pagbalik sa akon agalon.”
57 Nagsabat sila, “Tawgon ta si Rebeca kag tan-awon ta kon ano ang masiling niya.”
58 Gani gintawag nila si Rebeca kag ginpamangkot, “Luyag ka bala mag-upod sa sini nga tawo?” Nagsabat sia, “Huo, maupod ako.”
59 Gani ginpaupod nila ang ila utod nga si Rebeca kag ang iya manug-atipan sa suloguon ni Abraham kag sa iya mga tinawo.
60 Kag ila ginbendisyunan si Rebeca sa sini nga mga pulong: “Kabay nga ikaw nga utod namon nga babayi mangin-iloy sang linibo. Kabay nga ang imo kaliwat magaagaw sang mga siyudad sang ila mga kaaway.”
61 Dayon si Rebeca kag ang iya manug-atipan nga mga dalaga nag-aman kag nagsakay sa mga kamelyo sa pag-upod sa suloguon ni Abraham, kag naglakat sila.
62 Karon si Isaac nakaabot sa desierto sang “Bubon sang Nagakabuhi nga Nagatan-aw sa Akon,” kag nagpuyo sia sa nabagatnan nga bahin sang Canaan.
63 Sang kahapunanon naggwa sia sa paglakatlakat sa latagon, kag nakita niya ang mga kamelyo nga nagapadulong sa iya.
64 Sang nakita ni Rebeca si Isaac nagpanaog sia sa iya kamelyo,
65 kag ginpamangkot niya ang suloguon ni Abraham, “Sin-o inang tawo sa latagon nga nagapadulong sa aton?” Ang suloguon nagsabat, “Amo ina sia ang akon agalon.” Gani ginkuha ni Rebeca ang iya takurong kag iya gintabunan ang iya guya.
66 Ang suloguon nagsugid kay Isaac sang tanan nga iya ginhimo.
67 Dayon gindala ni Isaac sa iya tolda si Rebeca kag nangin-iya sia asawa. Si Isaac nagpalangga kay Rebeca, gani si Isaac naumpawan sa iya kasubo sang pagtaliwan sang iya iloy.
No comments:
Post a Comment