Genesis 9

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ang Saad sang Dios kay Noe

1 Ginbedisyunan sang Dios si Noe kag ang iya mga anak nga lalaki kag ginsingganan niya sila, “Magpamata kamo sing madamo agod ang inyo mga kaliwat maglapnag sa bug-os nga duta.

2 Ang tanan nga mga sapat, mga pispis, kag ang mga isda, magakahadlok sa inyo. Kamo ang magagahom sa ila.

3 Karon makakaon kamo sang tanan nga mga sapat kag subong man sang tanan nga mga tanom. Ginahatag ko ini tanan sa inyo nga inyo kalan-on.

4 May isa lamang ka butang nga indi ninyo pagkaunon. Ini amo ang karne nga may dugo, kay ang kabuhi yara sa dugo.

5 Kon may magkuha sang kabuhi sang tawo, pagasilutan ko sia. Pagapatyon ko ang sapat nga magapatay sang tawo.

6 Ang bisan sin-o nga magpatay sang tawo pagapatyon man sang pareho niya nga tawo. Kay ang tawo ginhimo nga kaangay sa Dios.

7 “Karon magbata kamo sing madamo, agod ang inyo mga kaliwat magadamo kag magalapnag sa bug-os nga duta.”

8 Karon ang Dios nagsiling kay Noe kag sa iya mga anak nga lalaki,

9 “Karon magahimo ako sing kasugtanan sa inyo kag sa inyo mga kaliwat,

10 kag sa tanan nga mga tinuga nga nagakabuhi—mga pispis, tanan nga mga sapat—ang tanan nga naggowa sa arka upod sa inyo.

11 Sa sini nga mga pulong magahimo ako sing kasugtanan sa inyo: Indi ko na gid paglaglagon ang buhi nga mga tinuga paagi sa anaw. Indi na gid mag-anaw liwat sa paglaglag sang duta.

12 Subong tanda sang walay katapusan nga kasugtanan nga akon ginahimo upod sa inyo kag sa tanan nga mga tinuga nga nagakabuhi,

13 ginabutang ko ang akon balangaw sa mga panganod. Ini mangintanda sang akon kasugtanan sa kalibutan.

14 Kon magpadala ako sing panganod sa ibabaw sang duta, kag ang balangaw magapakita sa mga panganod,

15 dayon dumdomon ko ang akon saad sa imo kag sa tanan nga mga sapat, nga wala na sing anaw nga magalaglag sang tanan nga buhi nga mga tinuga.

16 Kon ang balangaw magpakita sa mga panganod, makita ko ini kag dumdomon ko ang akon walay katubtoban nga kasugtanan sa tanan nga mga tinuga nga nagakabuhi sa duta.

17 Ang Dios nagsiling kay Noe, “Amo ini ang tanda sang akon saad sa tanan nga mga tinuga nga nagakabuhi sa duta.” 

Si Noe kag ang Iya mga Anak nga Lalaki

18 Ang mga anak ni Noe nga lalaki nga naggwa sa arka amo si Sem, si Ham, kag si Jafet. (Si Ham amo ang amay ni Canaan.)

19 Ining tatlo ka anak ni Noe amo ang ginhalinan sang tanan nga mga tawo sa duta.

20 Si Noe isa ka mangungoma. Sia ang nahauna nga nagpatanom sing mga ubas.

21 Sang makainom sia sang bino sang iya ubas, nahubog sia, nag-uba kag naghigda nga hublas sa iya tolda.

22 Sang makita ni Ham nga amay ni Canaan nga ang iya amay hublas, naglakat sia kag ginsugiran ang duha niya ka utod.

23 Dayon si Sem kag si Jafet nagkuha sing panapton kag gin-umbilay nila ini. Karon nagkadto sila sa tolda nga nagaisol kag gintabunan nila ang iya amay. Wala sila mag-atubang agod indi nila makita ang ila amay nga hublas.

24 Sang naumpawan si Noe kag sang mahibal-an niya ang ginhimo sa iya sang iya kamanghuran nga anak,

25 nagsiling sia: “Ang pagpakamalaut mangin kay Canaan! Mangin-ulipon sia sang iya mga utod.

26 “Dayawon ang GINOO, ang Dios ni Sem. Si Canaan mangin-ulipon si Sem.

27 Kabay nga ang Dios magpamuad kay Jafet; kag kabay nga ang iya kaliwat magpuyo upod sa mga kaliwat ni Sem. Si Canaan mangin-ulipon ni Jafet.”

28 Sa tapos ang anaw, si Noe nagkabuhi sing 350 pa ka tuig,

29 kag sang nagaedad sia sing 950 ka tuig napatay sia.

Genesis 8 | Genesis 10