"Ginhigugma gid sang Dios ang Kalibutan sa Bagay nga Ginhatag Niya sa Aton ang Iya Bugtong nga Anak"

Balasahon Subong nga Adlaw

(Domingo, March 11, 2018)

Nahauna nga Balasahon:

2 Mga Cronica 36:14-17, 19-23

Wala labot sini, ang mga pangulo sang Juda, ang mga pari, kag ang mga tawo nagsunod sang malaut nga ginahimo sang mga pungsod sa ila palibot sa pagsimba sang mga diosdios, kag gindagtaan nila ang Templo, nga ginpakabalaan sang GINOO mismo. Ang GINOO, ang Dios sang ila mga katigulangan, nagapadayon sa pagpadala sang mensahero sa pagpaandam sa ila, kay luyag niya nga luwason ang iya mga tawo kag ang iya Templo. Pero gin-uligyat nila ang mga mensahero sang Dios, wala ginsapak ang iya mga pulong, kag ginkadlawan ang iya mga propeta, tubtob nga sang ulihi ang kaakig sang GINOO nagdabdab batok sa ila nga indi na sila makapalagyo. Gani ginpakari sang GINOO ang hari sang Babilonia nga nagpamatay sang mga pamatan-on nga lalaki sang Juda, bisan sa Templo. Wala sia sing kaluoy sa bisan kay sin-o, bata ukon tigulang, lalaki ukon babayi, masakiton ukon maayo sing lawas. Gintugyan sang Dios sila tanan sa iya. Ginsunog niya ang Templo kag ang siyudad, lakip ang tanan niya nga mga palasyo kag manggad, kag ginguba ang pader sang siyudad. Ang nabilin nga buhi iya gindala sa Babilonia, sa diin nag-alagad sila sa iya kag ang iya mga kaliwat subong mga ulipon, tubtob sa  paggahom sang Ginharian sang Persia. Amo ini ang katumanan sang ginsiling sang GINOO paagi sa iya propeta nga si Jeremias: “Ang duta manginmamingaw ini sa sulod sang 70 ka tuig, bilang bayad sang Inugpahuway sang duta nga wala gintuman.” Sa nahauna nga tuig nga si Ciro amo ang emperador sang Persia, ang GINOO nagpanghikot sa iya mga maghimo sang isa ka mando nga isulat kag ipabantala bisan diin sa bug-os nga ginharian. Ini ginhimo sa pagtuman sang ginsiling sang GINOO paagi kay Jeremias nga propeta. “Amo ini ang mando ni Ciro, Emperador sang Persia. “Ang GINOO, ang Dios sang langit, naghimo sa akon nga hari sa bug-os nga kalibutan kag naghatag sa akon sing katungdanan sa pagpatindog sing Templo para sa iya sa Jerusalem, sa Juda. Karon, tanan kamo nga mga tawo sang Dios, magpauli didto,  kag kabay ang Dios mag-ubay sa inyo.”

Salmo sa Pagsabat:

Mga Salmo 137:1-2, 3, 4-5, 6

Sa ubay sang mga suba sang Babilonia nagpungko kami kag naghibi sang madumdoman namon ang Sion. Sa mga kahoy nga sawse didto ginsang-at namon ang amon mga arpa. Ang mga nagbihag sa amon nagsugo sa amon sa pagkanta, ginsugo nila kami sa paglingaw sa ila: “Kantahi kami sing ambahanon nahanungod sa Sion!” Paano abi ang pagkanta namon sang ambahanon sang GINOO sa duta sang mga dumoluong? Kabay nga indi na gid ako makatukar liwat sang arpa, kon malimtan ko ikaw, O Jerusalem! Kabay nga indi na gid ako makakanta liwat,  kon indi ako magdumdom sa imo, kon indi ako magpanumdom sa imo subong nga akon labing daku nga kalipay!

Ikaduwa nga Balasahon:

Efeso 2:4-10

Pero bugana kaayo ang kaluoy sang Dios, kag daku gid ang iya gugma sa aton, sa bagay nga bisan nga patay kita sa espirituhanon nga kabuhi tungod sang aton mga paglapas, iya kita ginbuhi upod kay Cristo. Paagi sa grasya sang Dios naluwas kamo. Sa aton paghiusa kay Cristo Jesus ginbanhaw niya kita upod sa iya sa paggahom upod man sa iya sa langitnon nga ginharian. Ginhimo niya ini agod mapakita sa tanan nga palaabuton nga panahon ang bugana nga mga manggad sang iya grasya, sa gugma nga iya ginpakita sa aton kay Cristo Jesus. Kay sa grasya sang Dios naluwas kamo paagi sa pagtuo. Indi ini paagi sa inyo nahimo, kundi bugay ini sang Dios. Wala kamo sing may ipabugal sini, kay indi ini bunga sang inyo kaugalingon nga mga pagpaninguha. Ang Dios amo ang aton Manunoga, kag sa aton paghiusa kay Cristo Jesus gintuga niya kita sa pagkabuhi agod maghimo sing maayo nga mga buhat, nga iya na nga daan gin-aman agod himuon naton. 

Bersikulo Antes ang Ebanghelyo:

 Juan 3:16

Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. 

Ebanghelyo Subong nga Adlaw:

Juan 3:14-21

Subong nga si Moises nagbayaw sang man-og nga saway sa isa ka tukon didto sa desierto, sa amo man nga bagay pagabayawon ang Anak sang Tawo, agod nga ang tagsatagsa nga magtuo sa iya may kabuhi nga wala sing katapusan. Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang tagsatagsa nga nagatuo sa iya indi na mapatay, kundi may kabuhi nga wala sing katapusan. Kay ang Dios wala magpadala sang iya Anak sa kalibutan sa paghukom sang kalibutan, kundi sa pagluwas sang kalibutan. Ang bisan sin-o nga nagatuo sa Anak indi pagkondenahon, pero ang bisan sin-o nga wala nagatuo nakondenar na, bangod kay wala sia magtuo sa bugtong nga Anak sang Dios. Amo ini ang kabangdanan sang pagkondenar: ang kapawa nagkari sa kalibutan, pero ang mga tawo naghigugma sang kadudolman sa baylo sang kapawa, kay malaut ang ila ginahimo. Kag ang bisan sin-o nga nagahimo sing malaut nagakontra sa kapawa kag indi magpalapit sa kapawa, kay indi sia luyag nga masapwan ang iya malain nga binuhatan. Pero ang bisan sin-o nga nagaginawi suno sa kamatuoran nagapalapit sa kapawa, agod mapahayag sang kapawa ang tanan nga iya ginhimo sa pagtuman sa Dios. 

March 10 | March 12