Ang Maayong Balita ni Jesu-Cristo suno kay MARCOS
Panguna
Ang Maayong Balita ni Jesu-Cristo suno kay Marcos nagapamuno sa sini nga mga pulong, “Ini ang Maayong Balita nahanungod kay Jesu-Cristo, ang Anak sang Dios.” Si Jesus ginalarawan diri nga may awtoridad kag isa ka persona nga magabuhat gilayon sang iya bulohaton. Ang iya awtoridad makita sa iya pagtudlo, sa iya gahom batok sa mga demonyo, kag sa pagpatawad sang mga sala sang mga tawo. Si Jesus nagasiling nga sia Anak sang Tawo, nga nagkari sa paghatag sang iya kabuhi sa pagluwas sang mga tawo gikan sa sala.
Si Marcos nagasugid sang kabuhi ni Jesus sa maathag kag gamhanan nga paagi kag ang ginapatalupangod gid niya amo ang ginhimo ni Jesus kag indi lang ang iya mga pulong kag pagtudlo. Sa tapos ang malip-ot nga panguna nahanungod kay Juan Bautista kag ang pagbautiso kag pagsulay kay Jesus, ang manunolat nagpahayag gilayon sang pag-alagad ni Jesus sa pagpang-ayo kag pagpanudlo. Sa nagalakat ang panahon, nagdugang ang paghangop sang mga sumolunod ni Jesus sa iya, pero ang iya mga kaaway nagkontra pa gid sa iya. Ang katapusan nga mga kapitulo nagasugid sang hitabo sang katapusan nga semana sang kabuhi ni Jesus diri sa duta, labi na gid ang paglansang sa iya kag ang iya pagkabanhaw.
Ang duha ka katapusan sang libro nga nabutang diri sa sini nga tanda [ ] ginakabig nga ginsulat sang lain nga manunolat.
Balayan sang Kaundan
Ang pamuno sang maayong balita 1:1-13
Ang pag-alagad ni Jesus sa mga katawuhan sa Galilea 1:14-9:50
Halin sa Galilea pa Jerusalem 10:1-52
Ang katapusan nga semana sa Jerusalem kag sa kaingod nga mga duog 11:1-15:47
Ang pagkabanhaw ni Jesus 16:1-8
No comments:
Post a Comment