"Pagatahuron gid Nila ang Akon Ginhigugma nga Anak"

Liturhiya sang Pulong

(Lunes, Hunyo 4, 2018)

Ang Pagbasa gikan sa Ikaduha nga Sulat ni:

San Pedro 1:2-7

Kabay nga ang grasya kag paghidait magbugana sa inyo, paagi sa inyo pagkilala sa Dios kag kay Jesus nga aton Ginoo. Ang gahom sang Dios naghatag sa aton sang tanan naton nga mga kinahanglanon sa pagkabuhi sang diosnon nga kabuhi paagi sa aton pagkilala sang nagtawag sa aton sa pag-ambit sang iya himaya kag kaayo. Sa sini nga paagi, iya kita ginhatagan sing hamili kag dalagku nga mga saad, agod nga paagi sa iya ginsaad, malikawan ninyo ang makahalalit nga kailigbon sa sini nga kalibutan, kag maambit ninyo ang diosnon nga kinaugali. Tungod sini, tinguhaa ninyo nga idugang sa inyo pagtuo ang kaayo, kag sa kaayo ang ihibalo, sa ihibalo ang pagpugong sang kaugalingon, sa pagpugong sang kaugalingon ang pagbatas, sa pagbatas ang pagkadiosnon, sa pagkadiosnon ang kalulo, kag sa kalulo ang paghigugma. 

Salmo sa Pagsabat:

Mga Salmo 91:1-2, 14-15, 15-16

(S) Ikaw ang akon Dios, sa Imo nagasalig amo.

Ang bisan sin-o nga nagadangop sa Labing Mataas, ang bisan sin-o nga nagapabilin sa idalom sang pagpangapin sang Labing Makagagahom, makasiling sa GINOO, “Ikaw ang akon palalipdan kag mangangapin! Ikaw ang akon Dios, sa imo nga akon nagasalig ako.” (S)
Ang Dios nagasiling, “Luwason ko ang mga nagahigugma sa akon, kag apinan ko ang mga nakakilala sa akon. Kon magpanawag sila sa akon, ako magasabat sa ila, kon yara sila sa kalisod, ako magaupod sa ila. (S)
Luwason kag padunggan ko sila. Pagapadyaan ko sila sang malawig nga kabuhi, kag pagaluwason ko gid sila.” (S)

Aleluya:

Bugna 1:5

O Jesu-Cristo, ang matutom nga saksi, ang panganay nga Anak nga ginbanhaw; nga amo man ang nagagahom sa mga hari sang duta. Ginhigugma Mo kami, kag paagi sa Imo pagkamatay Imo kami ginhilway sa amon mga sala.

Ang Pagbasa sang Santos nga Ebanghelyo suno kay:

San Marcos 12:1-12

Dayon naghambal si Jesus sa ila paagi sa mga palaanggiran. “May isa ka tawo nga nagpananom sing ubas sa iya talamnan, iya ini ginkudalan palibot, nagkutkot sia sing buho nga pulogaan sang ubas kag nagpatindog sing isa ka balantayan. Iya ini ginpaagsahan kag nagpanglakaton. Sang tion na sa pagpamupo sang ubas, iya ginpadala ang isa niya ka suloguon sa mga agsador sa pagkuha sa ila sang iya parti sang patubas. Gindakop nila ang suloguon, ginbunal kag ginpabalik nga wala sing dala. Nagpadala sia liwat sing isa pa gid ka suloguon, pero ginlampusan nila sia sa ulo kag ginpakahuy-an. Nagpadala na man sia sing isa pa gid ka suloguon, kag ini ginpatay nila. Amo man ang ginhimo nila sa iban pa gid, ang iban ila ginpamunal kag ang iban ila ginpamatay. Sang ulihi ang nabilin na lang nga iya sarang masugo amo ang iya gid pinalangga nga anak. Sa katapusan iya sia ginpadala sa ila nga nagasiling sa iya kaugalingon, ‘Pagatahuron gid nila ang akon anak.’ Pero ang mga agsador nagsinilingay, ‘Amo ini ang manunobli! Dali, patyon naton sia, agod mangin-aton ang palanublion!’ Gani gindakop nila sia, kag ginpatay, kag ginhaboy nila ang iya bangkay sa gwa sang talamnan sang ubas. “Karon, ano ang himuon sang tag-iya sang talamnan sang ubas? Balikan niya ang mga agsador kag pamatyon, kag paagsahan niya sa iban ang iya talamnan sang ubas. Wala bala ninyo ini mabasahi? ‘Ang bato Nga ginsikway sang mga manunokod, Nanginpamakod nga bato. Ang Ginoo amo ang naghimo sini, Daw ano ini ka makatilingala!’ ” Ang mga pangulo sang mga Judio luyag kuntani magdakop kay Jesus, kay nahibaluan nila nga yadto nga palaanggiran iya ginpatungod batok sa ila. Ugaling nahadlok sila sa mga tawo, gani ginpabay-an nila sia kag naglakat. 

Hunyo 3 | Hunyo 5