"Ini Amo ang Akon Dugo sang Kasugtanan, nga Ginaula para sa Madamo"

Liturhiya sang Pulong

(Domingo, Hunyo 3, 2018)

1. Ang Pagbasa gikan sa Libro sang:

Exodo 24:3-8

Naglakat si Moises, kag ginsugiran ang mga tawo sang tanan nga ginsugo sang GINOO, kag sang iya mga pagsulondan. Ang tanan nga mga tawo nagsabat sing dungan, “Tumanon namon ang tanan nga ginsiling sang GINOO.” Ginsulat ni Moises ang tanan nga mga sugo sang GINOO. Aga pa sang madason nga adlaw nagpatindog sia sa kunsaran sang bukid sing altar, kag sang 12 ka monumento nga mga bato para sa 12 ka tribo sang Israel. Dayon nagpadala sia sing pamatan-on nga mga lalaki sang Israel, nga nagdulot sang mga halad nga sinunog kag nag-ihaw man sang mga toro nga baka agod ihalad sa GINOO, subong halad sa paghiambit. Ginkuha ni Moises ang katunga sang dugo kag ginbutang ini sa mga yahong, kag ang katunga ginwisik sa altar. Dayon ginkuha niya ang libro sang kasugtanan kag ginbasa ini sing mabaskog sa mga tawo, kag nagsiling sila, “Himuon namon ang tanan nga mga sugo sang GINOO. Tumanon namon sia.” Dayon ginkuha ni Moises ang dugo sa mga yahong kag ginwisik sa mga tawo. Nagsiling sia, “Ini amo ang dugo nga nagasilyo sang kasugtanan nga ginhimo sang GINOO sa inyo sa paghatag niya sining tanan nga mga sugo.”

Salmo sa Pagsabat:

Mga Salmo 116:12-13, 15-16, 17-18

(S) Magadala ako sing halad nga ilimnon sa Ginoo kag magatawag ako sang iya ngalan.

Ano bala ang mahatag ko sa GINOO tungod sang tanan niya nga kaayo sa akon? Magadala ako sing halad nga ilimnon sa GINOO, sa pagpasalamat sa iya sang pagluwas niya sa akon. (S)
Daw ano kasakit para sa GINOO kon ang isa sang iya mga tawo mapatay! Alagad mo ako, O GINOO; ginaalagad ko ikaw, subong sang ginhimo sang akon iloy. Ginhilway mo ako. (S)
Magadulot ako sa imo sang halad sang pagpasalamat, kag magapangamuyo ako sa imo. Sa pagtilipon sang tanan mo nga mga tawo, ihatag ko sa imo ang akon ginsaad. (S)

2. Ang Pagbasa gikan sa Sulat ni San Pablo nga Apostol sa mga:

Hebreo 9:11-15

Pero si Cristo nakaabot na subong Pinakamataas nga Pari sang maayo nga mga butang nga yari na. Ang tolda diin sia nagaalagad labi pa ka daku kag himpit. Indi mga tawo ang naghimo sini, kon sayuron, indi iya sining tinuga nga kalibutan. Sang pagsulod ni Jesus sa tolda nagsulod sia sing makaisa gid lang sa Labing Balaan nga Duog, indi sa paghalad sang dugo sang mga kanding kag tinday nga mga baka, kundi, sang iya kaugalingon nga dugo kag natigayon niya ang wala sing katapusan nga kaluwasan para sa aton. Ang dugo sang mga kanding kag toro nga mga baka, kag ang abo sang sinunog nga tinday nga baka nga babayi ginawisik sa mga tawo nga nadagtaan, kag ini nagatinlo sa ila dagta nga lawasnon. Kon matuod ini, daw ano pa gid ang nahimo sang dugo ni Cristo! Paagi sa Espiritu nga wala sing katapusan ginhalad niya ang iya kaugalingon subong himpit nga halad sa Dios. Ang iya dugo magatinlo sang aton mga konsyensya sa wala sing pulos nga mga buhat, agod nga makaalagad kita sa Dios nga buhi. Sa sini nga kabangdanan si Cristo amo ang manugpatigayon sang bag-o nga kasugtanan, agod nga ang mga gintawag sang Dios makabaton sang walay katapusan nga mga panublion nga ginsaad sang Dios. Sarang ini mahimo kay may kamatayon nga nagahilway sa mga tawo sa sala nga ila nahimo, samtang yara sila sa idalom sang nahauna nga kasugtanan.

Sekwensya:
Tan-awa ang tinapay sang mga Angheles nahimo nga kalan-on sang mga nagapanglakaton; matuod nga kalan-on sang mga anak nga wala ginhaboy sa mga ido subong tanda, ginpat-in ini nga daan dira sa paghalad kay Isaac. Ang Kordero Paskwal gintalana sa paghatag sing Mana sa kaliwatan. Maayo nga manugbantay, matuod nga tinapay O Jesus, maluoy ka sa amon; pahalba kami, tamda kami, buhata nga makita man ikaw, sa duta sang mga nagakabuhi. Ikaw nga nakahibalo sang tanan kag nagahatag kaayohan sa tanan, ikaw nga nagatatap sa mga mamalatyon: buhata nga magakaon kami upod sa imo, sa imo mga pinili kag mga manunubli sa bangkete sang mga Santos.

Aleluya:

Juan 6:51

Ako amo ang buhi nga tinapay nga naghalin sa langit, siling sang Ginoo, ang bisan sin-o nga magkaon sini nga tinapay magakabuhi sing dayon.

Ang Pagbasa sang Santos nga Ebanghelyo suno kay:

San Marcos 14:12-16, 22-26

Sang nahauna nga adlaw sang Piesta sang Tinapay nga wala sing Lebadora, sang ginaihaw ang mga cordero nga palascuahan para sa Piesta sang Pascua, ang mga gintuton-an nagpamangkot kay Jesus, “Diin bala kami maaman sang aton panihapon sa pagsaulog sang Piesta sang Pascua?” Dayon ginsugo niya ang duha sang iya mga gintuton-an nga iya ginsingganan, “Kadto kamo sa siyudad kag didto masugata ninyo ang isa ka tawo nga nagadala sang isa ka tibod nga tubig. Sunda ninyo sia kag kon diin nga balay sia magsulod, singgana ninyo ang tagbalay, ‘Ang Manunodlo nagasiling, Diin ang kuwarto nga akon pagakan-an sang panihapon sang Piesta sang Pascua upod sa akon mga gintuton-an?’ Kag ipakita niya sa inyo ang isa ka daku nga kuwarto sa ibabaw nga naaman na. Didto kamo maghanda para sa aton.” Ang mga gintuton-an naglakat kag sang nakaabot sila sa siyudad, nakita nila ang tanan suno sa ginpamulong ni Jesus sa ila, kag naghanda sila sang panihapon sang Piesta sang Pascua. Sang nagakaon sila, si Jesus nagkuha sang tinapay, nagpasalamat sa Dios, kag iya ginpamihakpihak ini kag ginhatag sa iya mga gintuton-an nga nagasiling, “Kuha kamo sini, ini amo ang akon lawas.”

"Ini amo ang akon lawas." (14:22)

Dayon nagkuha sia sang kupa, nagpasalamat sia sa Dios, kag ginhatag ini sa ila, kag sila tanan nag-inom. Nagsiling si Jesus, “Ini amo ang akon dugo nga ginaula para sa madamo, ang akon dugo nga nagapalig-on sang kasugtanan sang Dios. Ginasiling ko sa inyo nga indi na ako mag-inom sini nga bino tubtob sa adlaw nga mainom ko ang bag-o nga bino sa Ginharian sang Dios.” Sa tapos sila makakanta sang isa ka ambahanon nagkadto sila sa bukid sang mga Olivo.

Hunyo 2 | Hunyo 4