Genesis 19

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50

☆☆☆

Ang Pagkamakasasala sang Sodoma

1 Sang mag-abot ang duha ka anghel sa Sodoma sadto nga kasisidmon, si Lot nagapungko sa puwerta sang siyudad. Sang pagkakita ni Lot sa ila, nagtindog sia sa pagsugata sa ila. Nagluhod sia sa atubangan nila nga nagaduko sang iya ulo,

2 kag magsiling, “Sir, ano ang mahimo ta sa inyo, kon mahimo sulod kamo anay sa akon balay. Makapanghinaw kamo sang inyo mga tiil kag makatulog kamo diri karon nga gab-i. Buas na lang kamo sa aga pa magpadayon sang inyo pagpanglakaton.” Pero nagsabat sila, “Indi na lang kay diri na lang kami matulog sa plasa karon nga gab-i.”

3 Ginpilit gid niya sila, kag sang ulihi nag-upod sila sa iya balay. Si Lot nagpaluto sing tinapay kag nag-aman sing manamit nga mga pagkaon, kag dayon nagpanihapon sila.

4 Sang wala pa magtulog ang mga bisita, ginlibutan sang mga lalaki nga taga-Sodoma ang balay. Ang tanan nga mga lalaki sang siyudad, mga tigulang kag mga pamatan-on, yadto didto.

5 Gintawag nila si Lot kag ginpamangkot, “Diin na ang mga lalaki nga nag-abot sa pagdayon sa imo karon nga gab-i? Pagwaa sila diri sa amon kay luyag kami magpakighilawas sa ila.”

6 Si Lot naggwa kag ginsirhan niya ang puwertahan.

7 Ginsingganan niya sila, “Mga abyan, ginapakiluoy ko sa inyo nga indi ninyo paghimuon ining malaut nga butang!

8 Yari may duha ako ka anak nga babayi nga mga ulay pa. Ihatag ko sila sa inyo kag himoa ninyo ang luyag ninyo sa ila. Pero indi ninyo pag-anha ining mga tawo, kay mga bisita ko sila, kag dapat ko sila apinan.”

9 Pero nagsiling sila, “Indi kami pagbalabagi, ikaw nga dumoluong! Sin-o ka nga magtudlo sa amon? Halin dira, karon patilawon ka namon sing sobra sang sa ila.” Gintikwang nila si Lot, kag nagsaka sila sa pagbungkal sang puwertahan.

10 Pero gindawhat sang duha ka tawo si Lot kag ginbutong pasulod sa balay kag ginsirahan nila ang puwertahan.

11 Dayon ginbulag nila ang tanan nga mga tawo sa gwa, gani indi na sila makatultol kon diin ang puwertahan.

Si Lot Naghalin sa Sodoma

12 Ang duha ka tawo nagsiling kay Lot, “Kon may iban ka pa diri nga mga anak nga lalaki, nga mga anak nga babayi, mga umagad nga lalaki ukon iban pa nga mga himata sa sini nga siyudad, pahalina sila diri,

13 kay pagalaglagon namon ini nga duog. Ginpamatian sang GINOO ang tama nga panumbong batok sining mga tawo, kag ginpadala niya kami sa paglaglag sang Sodoma.”

14 Dayon ginkadtoan ni Lot ang mga lalaki nga mangin-umagad niya kag ginsingganan, “Magdalidali kamo kag maghalin diri kay pagalaglagon sang GINOO ini nga duog.” Pero ang hunahona nila nga nagalahog lang sia.

15 Sang kaagahon, ang mga anghel nagtinguha sa pagpadalidali kay Lot sa paggwa. Nagsiling sila, “Dalidali ka! Dalha ang imo asawa kag ang imo duha ka bata nga babayi kag maghalin diri, agod nga indi kamo mapatay kon laglagon ang siyudad.”

16 Daw indi pa kuntani maglakat si Lot, pero ang GINOO naluoy sa iya. Gani, sia, ang iya asawa kag ang iya duha ka anak nga babayi gindala sang duha ka lalaki kag ginpagwa nila sila sa siyudad.

17 Sang napagwa na nila sila sa siyudad, ang isa sang mga anghel nagsiling, “Dalagan kamo agod indi kamo maano! Indi kamo magbulobalikid kag indi magdulog sa patag. Magdalagan kamo didto sa mga bakulod, agod indi kamo mapatay.”

18 Pero si Lot nagsabat, “Sir, indi mahimo ina.

19 Daku gid ang imo nahimo sa akon kag ginluwas mo ang akon kabuhi. Pero ang mga bakulod tama kalayo kag malambot pa ako sang kalaglagan sa wala pa ako makaabot didto.

20 Nakita mo bala inang diutay nga banwa? Malapit ina nga lambuton ko. Papalagyuha ako didto. Makita mo nga diutay ina nga duog, kag indi ako maano didto.”

21 Nagsabat sia, “Sigi, indi ko paglaglagon ina nga banwa.

22 Hala, dalagan na! Wala ako sing mahimo tubtob makalambot ikaw didto.” Tungod kay gintawag ni Lot ang banwa nga diutay, ginhingalanan ini nga Zoar.

Ang Paglaglag sang Sodoma kag Gomorra

23 Nagabutlak gid ang adlaw sang pag-abot ni Lot sa Zoar.

24 Sa hinali ginpaulan sang GINOO ang nagadabdab nga asupre sa Sodoma kag Gomorra,

25 kag ginlaglag sang GINOO ini nga mga siyudad kag ang bug-os nga patag, upod ang mga tawo didto, kag ang tanan nga nagatubo sa sadto nga duta.

26 Pero ang asawa ni Lot nagbalikid, kag nahimo sia nga daw haligi nga asin.

Ang asawa ni Lot nagbalikid. (19:26)

27 Aga pa gid sang madason nga adlaw si Abraham nagdalidali sa pagkadto sa duog diin sia nagtindog sa atubangan sang GINOO.

28 Ginlantaw niya ang Sodoma kag Gomorra, kag ang bug-os nga kapatagan, kag nakita niya ang aso nga nagatub-ok halin sa duta, subong sang aso nga nagahalin sa isa ka daku nga hurnohan.

29 Pero sang paglaglag sang Dios sang mga siyudad sang kapatagan sa diin si Lot nagpuyo gindumdom niya si Abraham kag ginpapalagyo niya si Lot agod indi sia maano.

Ang Ginhalinan sang Moabnon kag Amonhon

30 Tungod kay si Lot nahadlok magtener sa Zoar, nagsaylo sia sa mga bakulod upod ang duha niya ka anak nga babayi. Didto nagpuyo sila sa isa ka kuweba.

31 Ang magulang nagsiling sa manghod, “Si tatay nagatigulang na, kag wala na sing lalaki nga nabilin sa bug-os nga kalibutan nga aton mapamana agod makapamata kita.

32 Dali, hugbon ta sia kag maghiusa sa iya agod nga makapamata kita tungod sa iya.”

33 Sadto nga gab-i ginpainom nila sia sing bino. Ang magulang naghiusa sa iya amay, pero ang amay tama kahubog kag wala sia makahibalo sini.

34 Sang madason nga adlaw nagsiling ang magulang sa manghod, “Naghiusa ako kay tatay kagab-i, sa aton amay. Kag karon sa gab-i hugbon ta na man sia sang bino hasta nga mahubog siya, kag ikaw na man ang maghiusa sa iya subong sang ginhimo ko. Dayon agod nga duha makapamata kita tungod sa aton amay.”

35 Gani ginhubog nila sia sadto nga gab-i, kag ang manghod naghiusa sa iya. Tama na man sia kahubog kag wala sia makahibalo sini.

36 Sa sini nga paagi ang duha ka bata nga babayi ni Lot nagbusong tungod sa ila amay.

37 Ang magulang nagbata sing lalaki kag ginhingalanan niya ini kay Moab. Sia ang ginhalinan sang mga Moabnon karon.

38 Ang manghod nagbata man sing lalaki kag ginhingalanan niya ini kay Benami. Sia ang ginhalinan sang mga Amonhon.

Genesis 18 | Genesis 20