Mga Salmo 109

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Ang Reklamo sang Isa ka Tawo nga Yara sa Kapipit-an

1 Ginadayaw ko ikaw, O Dios, indi ka maghipos!
2 Ang malaut nga mga tawo kag mga butigon naglibak sa akon, nga nagasugid sing kabutigan nahanungod sa akon.
3 Indi magkalaamo ang ginahambal nila batok sa akon, ginapakalain nila ako sa walay kabangdanan.
4 Ginakontra nila ako, bisan nga ginahigugma ko sila, kag nagpangamuyo ako para sa ila.
5 Ginbalusan nila sing malaut ang akon maayo, kag sang dumot sa baylo ang akon gugma.
6 Magpili ka sing malaut nga tawo sa paghukom sa akon kaaway, kag ipasumbong sia sa isa sang iya mga kasumpong.
7 Kabay nga hukman sia kag masapwan nga nakasala, kabay nga bisan ang iya pangamuyo kabigon nga sala!
8 Kabay nga mapatay sia sa indi madugay, kabay nga ang isa ka tawo magakuha sang iya palangakuan!
9 Kabay ang iya mga kabataan mailo, kag ang iya asawa mabalo!
10 Kabay ang iya mga kabataan manginmanugpakilimos nga walay paulian, kabay nga sila pagatabugon gikan sa mga guba nga ila ginapuy-an!
11 Kabay ang iya inutangan magbutong sang tanan niya nga pagkabutang, kag ang mga dumoluong magkuha sang iya pinangabudlayan.
12 Kabay wala sing may magmaayo sa iya; kabay wala sing may mag-atipan sang iya mga ilo.
13 Kabay ang tanan niya nga mga kaliwat magkalamatay, kag ang iya ngalan malimtan sa madason nga kaliwatan.
14 Kabay nga dumdomon sang Ginoo ang kalautan sang iya mga katigulangan, kag indi gid pagpatawaron ang mga sala sang iya iloy.
15 Kabay indi pagkalimtan sang Ginoo ang ila mga sala, pero kabay nga sila mismo malimtan sing bug-os!
16 Ina nga tawo wala gid magpanumdom sa pagkaluoy, kundi ginhingabot niya kag ginpatay, ang mga imol, ang mga nawad-an kag ang mga maluya.
17 Naluyag gid sia magpakamalaut—kabay nga pakamalauton sia! Indi sia luyag magbendisyon—kabay nga wala sing may magbendisyon sa iya!
18 Mahapos sia magpakamalaut subong kahapos sang pagsuksok niya sang iya bayu, kabay nga ang iya pagpakamalaut magapanalupsop sa iya kaangay sang tubig; kag maglatom sa iya mga tul-an kaangay sang lana!
19 Kabay nga maputos sia nila kaangay sang mga bayu, kag maglikos sa iya kaangay sang paha.
20 Kabay manginkaangay sini ang pagsilot sang Ginoo sang akon mga kaaway, nga nagahambal sing indi magkalaamo batok sa akon!
21 Pero, O Ginoo nga akon Dios, buligi man ako suno sa imo ginsaad, kag tabangi ako tungod sang kaayo sang imo gugma.
22 Imol ako kag nawad-an; nagakasakit gid ang akon tagipusoon.
23 Madali na lang ako mawala subong sang landong sa kahapunanon; ginapalid ako kaangay sang sapatsapat.
24 Ang akon mga tuhod maluya tungod sang kakulang sang pagkaon; ang akon lawas maniwang kag maluming.
25 Kon makita akp sang mga tawo, ginayaguta nila ako; nagalungolongo sila sang ila mga ulo sa paghikay.
26 Buligi ako, O Ginoo nga akon Dios, luwasa ako tungod sang imo mapinadayunon nga gugma!
27 Ipakilala sa akon mga kaaway nga ikaw ang nagaluwas sa akon.
28 Ayhan pakamalauton nila ako, pero ikaw magabendisyon sa akon. Kabay malutos ang mga nagahingabot sa akon, kag kabay ako, nga imo alagad, magkasadya.
29 Kabay maputos sang kahuloy-anan ang akon mga kaaway; kabay nga isuklob nila ang ila kahuloy-anan subong sang kunop.
30 Magapasalamat ako sa mabaskog nga tingog sa Ginoo; dayawon ko sia sa tunga sang pagtilipon sang mga tawo,
31 kay ginaapinan niya ang makaluluoy nga tawo, sa pagluwas sa iya sa mga nagakondenar sa iya sa kamatayon.

Mga Salmo 108 | Mga Salmo 110