1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 100 101 102 103 104 105 106 107 108 109 110 111 112 113 114 115 116 117 118 119 120 121 122 123 124 125 126 127 128 129 130 131 132 133 134 135 136 137 138 139 140 141 142 143 144 145 146 147 148 149 150
☆☆☆
Ambahanon sa Tion sang Pungsodnon nga Kagamo
1 O GINOO, magakanta ako gihapon nahanungod sang imo mapinadayunon nga gugma, sa tanan nga tion ibantala ko ang imo katutom.2 Nakahibalo ako nga ang imo gugma magapadayon sa walay katapusan, nga ang imo katutom wala sing katapusan subong sang langit.
3 Nagsiling ka, “Naghimo ako sing kasugtanan sa tawo nga akon ginpili; nagsaad ako sa akon alagad nga si David,
4 ‘Ang isa sang imo mga kaliwat manginhari sa wala sing katubtoban; tipigan ko ang imo ginharian sa wala sing katapusan.’”
5 Ang kalangitan nagakanta sang makatilingala nga mga butang nga imo ginahimo; ang mga balaan nagakanta sang imo katutom, O GINOO.
6 Wala sing isa sa langit nga kaangay sa imo, O GINOO, wala sing isa sa mga dios nga makatupong sa imo.
7 Ginatahod ikaw sa katilingban sang mga balaan, kag ginakahadlukan gid ikaw sang tanan nga yara sa palibot nimo.
8 O GINOONG Dios nga Makagagahom, wala sing gamhanan subong sa imo; sa tanan nga mga butang matutom ikaw O GINOO.
9 Ginagamhan mo ang mabalod nga kadagatan, ginapalinaw mo ang iya nagabalingaso nga mga balod.
10 Ginlasa mo ang dako nga sapat nga si Rahab kag ginpatay mo sia, paagi sa imo gamhanan nga kusog ginlutos mo ang imo mga kaaway.
11 Imo ang langit, kag subong man ang duta, gintuga mo ang kalibutan kag ang tanan nga yara sa sini;
12 ginhimo mo ang aminhan kag ang bagatnan, ang bukid sang Tabor kag ang bukid sang Hermon nagakanta sa imo sa kalipay.
13 Daw ano ka gamhanan sa imo! Daw ano kadaku sang imo kusog!
14 Ang imo ginharian napasad sa katarungan kag hustisya, ang tanan mo nga ginahimo may gugma kag katutom.
15 Bulahan ang mga tawo nga nagasimba sa imo sa mga ambahanon, nga nagakabuhi sa kapawa sang imo kaayo.
16 Tungod sa imo nagakalipay sila sa bug-os nga adlaw, kag nagadayaw sa imo tungod sang imo kaayo.
17 Ginahatagan mo kami sing dalagku nga mga pagdaog; sa imo kaayo ginapadaog mo kami,
18 kay ikaw, O GINOO, ang nagpili sang amon mangangapin; ikaw, ang Balaan nga Dios sang Israel, amo ang naghatag sa amon sang amon hari.
Ang Saad sang Dios kay David
19 Sa isa ka palanan-awon sang una nagsiling ikaw sa imo matutom nga mga alagad, “Ginkoronahan ko ang isa ka bantog nga soldado; ginhatag ko ang trono sa isa nga pinili sa mga tawo.20 Ginhimo ko nga hari si David nga akon alagad paagi sa paghaplas sa iya sing balaan nga lana.
21 Ang akon kusog manginyara sa iya sa gihapon, ang akon gahom magapabakod sa iya.
22 Ang iya mga kaaway indi gid magdaog batok sa iya, ang mga malaut indi makalutos sa iya.
23 Pagadugmokon ko ang iya mga kaaway kag pamatyon ko ang tanan nga nagadumot sa iya.
24 Pagahigugmaon kag pagaunongan ko sia sa gihapon, padag-on ko sia sa gihapon.
25 Pasangkaron ko ang iya ginharian halin sa Dagat sang Mediteraneo tubtob sa suba sang Eufrates.
26 Magasiling sia sa akon, ‘Ikaw ang akon amay kag akon Dios; ikaw ang akon mangangapin kag manlulowas.’
27 Pagahimuon ko sia nga akon panganay nga anak nga lalaki, ang labing gamhanan sa tanan nga mga hari.
28 Pagatumanon ko sa gihapon ang akon saad sa iya, kag ang akon kasugtanan sa iya magapadayon sa walay katapusan.
29 Ang isa sang iya mga kaliwat manginhari sa gihapon, ang iya ginharian manginwalay katapusan subong sang langit.
30 “Pero kon ang iya mga kaliwat wala nagatuman sang akon kasugoan, kag wala nagakabuhi suno sa akon mga pagsulondan;
31 kon wala nila ginasapak ang akon mga pagtudlo, kag wala nila ginabantayi ang akon mga sugo,
32 ti silutan ko sila tungod sang ila mga sala. Hanuton ko sila tungod sang ila mga sayop.
33 Pero indi ako mag-untat sa paghigugma kay David, ukon palugaw-an ko sia sang akon saad sa iya.
34 Tumanon ko gid ang akon kasugtanan sa iya, kag indi ko pagbawion ang bisan isa ka saad nga ginhimo ko sa iya.
35 “Sa akon balaan nga ngalan nagtapat ako sa pagsaad: Indi gid ako magbutig kay David!
36 Indi gid sia mawad-an sing mga kaliwat, kag bantayan ko ang iya ginharian tubtob nga ang adlaw nagasilak.
37 Magapadayon gid ini subong sang bulan, subong sinang matutom nga saksi sa langit.”
Panalambiton sa Pagkalutos sang Hari
38 Pero naakig ikaw sa imo pinili nga hari; ginbayaan kag ginsikway mo sia.39 Ginbugras mo ang imo kasugtanan sa imo alagad, kag ginhaboy mo ang iya korona sa duta.
40 Ginrumpag mo ang mga pader sang iya siyudad, kag ginbayaan mo ang iya mga pamakod nga nalaglag.
41 Ang tanan nga nagaagi nagapanguha sang iya mga pagkabutang; ang tanan niya nga mga kaingod nagayaguta sa iya.
42 Ginpadaog mo ang iya mga kaaway; ginpasadya mo sila tanan.
43 Ginhimo mo nga walay pulos ang iya mga hinganiban, kag ginpalutos mo sia sa inaway.
44 Ginkuha mo sa iya ang iya harianon nga setro, kag ginpukan mo ang iya trono sa duta.
45 Ginpatigulang mo sia sa wala pa ang iya tion, kag ginpuno mo sia sing kahuloy-an.
Pangamuyo agod Luwason
46 Tubtob san-o pa bala ikaw magapanago, O Ginoo? Tubtob bala sa katubtoban? Tubtob pa bala san-o ang pagdabdab sang imo kaakig subong sang kalayo?47 Dumdoma, O Ginoo, kon daw ano kalip-ot sang kabuhi sang tawo, dumdoma bala nga gintuga mo ang tanan nga mga tawo nga mamalatyon!
48 Sin-o bala ang nagakabuhi nga indi gid mapatay? Ano bala ang paglikaw sang tawo sa lulobngan?
49 Ginoo, diin na bala yadtong mga pamatuod sang imo gugma? Diin na bala ang mga saad mo kay David?
50 Indi pagkalimti kon daw ano ang pagpakahuya sa akon nga imo alagad, kon daw ano ang akon pagbatas sang mga pagpasipala sang mga di-diosnon.
51 Daw ano ang pagpasipala sang imo kaaway sa imo pinili nga hari, O Ginoo! Ginapakahuy-an nila sia bisan diin sia magkadto.
52 Dayawon ta ang GINOO sa walay katapusan! Kabay pa! Kabay pa!
No comments:
Post a Comment