Mga Salmo 105

1  2  3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33  34  35  36  37  38  39  40  41  42  43  44  45  46  47  48  49  50  51  52  53  54  55  56  57  58  59  60  61  62  63  64  65  66  67  68  69  70  71  72  73  74  75  76  77  78  79  80  81  82  83  84  85  86  87  88  89  90  91  92  93  94  95  96  97  98  99  100  101  102  103  104  105  106  107  108  109  110  111  112  113  114  115  116  117  118  119  120  121  122  123  124  125  126  127  128  129  130  131  132  133  134  135  136  137  138  139  140  141  142  143  144  145  146  147  148  149  150

☆☆☆

Ang Dios kag ang Iya mga Tawo

(1 Cron. 16:8-22)

1 Magpasalamat kamo sa GINOO, ibantala ninyo ang iya pagkagamhanan, kag ipakilala sa mga kapungsaran ang iya mga binuhatan!
2 Mag-amba kamo sa iya, magkanta kamo sing pagdayaw sa iya; isugid ninyo ang tanan nga makatilingala nga mga binuhatan niya!
3 Magakalipay kamo kay iya kita; ang tanan nga nagaalagad sa GINOO magkalipay!
4 Magdangop kamo sa GINOO agod buligan; magpabilin kamo sa iya atubangan sa gihapon.
5-6 Kamo nga mga kaliwat ni Abraham nga iya mga alagad, kamo nga mga kaliwat ni Jacob nga iya mga pinili: dumdoma ninyo ang iya gamhanan kag makatilingala nga mga milagro, kag ang mga paghukom sa iya ginhatag.
7 Ang GINOO amo ang aton Dios; ang iya mga sugo para sa bug-os nga kalibutan.
8 Pagatumanon niya sa gihapon ang iya kasugtanan, ang iya mga saad tubtob sa isa ka libo ka mga kaliwatan,
9 ang kasugtanan nga iya ginhimo kay Abraham, kag ang iya saad kay Isaac.
10 Ang Ginoo naghimo sing kasugtanan nga wala sing katapusan kay Jacob, ang wala sing katapusan nga kasugtanan kay Israel, sang iya pagsiling,
11 "Ihatag ko sa imo ang duta sang Canaan, mangin-imo ini pagkabutang.”
12 Pila lamang ka bilog ang mga tawo sang Dios, kag mga dumoluong sila sa sadto nga duta.
13 Nagdalangdalang sila halin sa isa ka pungsod pakadto sa isa, halin sa isa ka ginharian pakadto sa isa.
14 Pero wala ang Dios magtugot nga piguson sila sang bisan sin-o, kag ginsabdong niya ang mga hari tungod sa ila.
15 Nagsiling sia, “Indi pagtanduga ang akon pinili nga mga alagad; indi paghaliti ang akon mga propeta!"
16 Sang pagpadala sang Dios sing gutom sa ila pungsod, kag pagkuha niya sang tanan nila nga kalan-on,
17 ginpadala niya sing una sa ila si Jose, nga ginbaligya subong isa ka ulipon.
18 Nasamad ang iya mga tiil tungod sang hugot nga mga kadena, kag gintakdan sia sang salsalon sa liog,
19 tubtob napamatud-an ang iya gintagna. Ang pulong sang GINOO nagpamatuod nga matarong sia.
20 Dayon ginpabuy-an sia sang hari sang Egipto; ang pangulo sang mga pungsod naghilway sa iya.
21 Gintugyan sa iya sang hari ang pagdumala sang iya ginharian, kag ginhimo sia nga pangulo sa bug-os nga duta,
22 nga may bug-os nga awtoridad sa mga opisyales sang hari, kag gahom sa pagtudlo sang mga palamangkutan sang hari.
23 Sang ulihi, si Jacob nagkadto sa Egipto, kag nagpuyo sa sadto nga pungsod.
24 Ginpadamo sang Ginoo ang mga kaanakan sang iya mga tawo, kag ginpalig-on sila labaw pa sa ila mga kaaway.
25 Ginpadumot niya ang mga Egiptohanon sa iya mga tawo, kag ginlimbungan nila ang iya mga alagad.
26 Dayon ginpadala niya si Moises nga iya alagad, kag si Aaron nga iya ginpili.
27 Ginhimo nila ang gamhanan nga mga buhat sang Dios, kag naghimo sila sing mga milagro sa Egipto.
28 Ginpadulom sang Dios ang duta, pero ang mga Egiptohanon wala magtuman sang iya sugo.
29 Ginhimo niya nga dugo ang tubig sa suba, kag ginpamatay ang ila mga isda.
30 Ang ila pungsod napuno sang mga paka, bisan pa ang palasyo sang hari.
31 Ang Dios nagmando, kag ang bug-os nga pungsod napuno sang mga langaw kag kuto.
32 Sa baylo sang ulan, nagpadala sia sing yelo nga daw mga bato kag mga kilat sa ila duta;
33 ginlaglag niya ang ila mga tanom nga ubas kag ang ila mga higera, kag ginpangbali niya ang mga kakahuyan.
34 Nagmando sia, kag naghugpa ang mga apan, minilyon sila nga indi maisipan.
35 Ginkaon nila ang tanan nga mga tanom sa duta; ginkaon nila ang tanan nga mga patubas.
36 Ginpamatay niya ang tanan nga mga panganay nga lalaki sang tanan nga mga panimalay sang Egipto.
37 Dayon gintuytoyan niya sa paggwa ang mga Israelinhon; gindala nila ang mga pilak kag bulawan, kag tanan sila mabakod kag maayo sing lawas.
38 Ang mga Egiptohanon nagkasadya sang paghalin nila, tungod kay nahadlok sila sa ila.
39 Nagbutang sia sing panganod sa ibabaw sang iya mga tawo, kag kalayo nga magaiwag sa ila sa kagab-ihon.
40 Nagpangayo sila, kag nagpadala sia sing mga pitaw, ginhatagan niya sila sing kalan-on gikan sa langit sa pagbusog sa ila.
41 Ginpalitik niya ang bato, kag nagsagawak ang tubig, nga nagailig sa desierto subong sang isa ka suba.
42 Gindumdom niya ang iya balaan nga saad kay Abraham nga iya alagad.
43 Gani glnpangulohan niya ang iya mga tawo sa paggwa nga nagakanta, ang iya pinili nga mga tawo nga nagahinugyaw.
44 Ginhatag niya sa ila ang mga duta sang iban nga mga tawo, kag ginpanag-iyahan nila ang ila mga kaumhan,
45 agod ang iya mga tawo magtuman sang iya mga kasugoan, kag magbantay sang iya mga sugo. Dayawa ang Ginoo!

Mga Salmo 104 | Mga Salmo 106